१. विभङ्गवारो

हेतुपच्चयो

३९४. नोउपादा धम्मो नोउपादा धम्मस्स हेतुपच्चयेन पच्चयो – नोउपादा हेतू सम्पयुत्तकानं खन्धानं नोउपादा च चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (१)

नोउपादा धम्मो उपादा धम्मस्स हेतुपच्चयेन पच्चयो – नोउपादा हेतू उपादा चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (२)

नोउपादा धम्मो उपादा च नोउपादा च धम्मस्स हेतुपच्चयेन पच्चयो – नोउपादा हेतू सम्पयुत्तकानं खन्धानं उपादा च नोउपादा च चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

३९५. उपादा धम्मो नोउपादा धम्मस्स आरम्मणपच्चयेन पच्चयो – चक्खुं…पे… कायं… रूपे…पे… रसे वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… रसायतनं जिव्हाविञ्ञाणस्स आरम्मणपच्चयेन पच्चयो, उपादा खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोउपादा धम्मो नोउपादा धम्मस्स आरम्मणपच्चयेन पच्चयो – दानं…पे… सीलं …पे… उपोसथकम्मं कत्वा तं पच्चवेक्खति, अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति; पुब्बे…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. अरिया पहीने किलेसे पच्चवेक्खन्ति, विक्खम्भिते किलेसे…पे… पुब्बे…पे… फोट्ठब्बे नोउपादा खन्धे अनिच्चतो…पे… दोमनस्सं उप्पज्जति; चेतोपरियञाणेन नोउपादाचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… फोट्ठब्बायतनं कायविञ्ञाणस्स आरम्मणपच्चयेन पच्चयो; नोउपादा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अधिपतिपच्चयो

३९६. उपादा धम्मो नोउपादा धम्मस्स अधिपतिपच्चयेन पच्चयो. आरम्मणाधिपति – चक्खुं…पे… कायं… रूपे…पे… रसे वत्थुं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

नोउपादा धम्मो नोउपादा धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं गरुं कत्वा…पे… फलं…पे… निब्बानं गरुं कत्वा पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; फोट्ठब्बे नोउपादा खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोउपादाधिपति सम्पयुत्तकानं खन्धानं नोउपादा च चित्तसमुट्ठानानं रूपानं अधिपतिपच्चयेन पच्चयो. (१)

नोउपादा धम्मो उपादा धम्मस्स अधिपतिपच्चयेन पच्चयो. सहजाताधिपति – नोउपादाधिपति उपादा चित्तसमुट्ठानानं रूपानं अधिपतिपच्चयेन पच्चयो. (२)

नोउपादा धम्मो उपादा च नोउपादा च धम्मस्स अधिपतिपच्चयेन पच्चयो. सहजाताधिपति – नोउपादाधिपति सम्पयुत्तकानं खन्धानं उपादा च नोउपादा च चित्तसमुट्ठानानं रूपानं अधिपतिपच्चयेन पच्चयो. (३)

अनन्तरपच्चयादि

३९७. नोउपादा धम्मो नोउपादा धम्मस्स अनन्तरपच्चयेन पच्चयो – पुरिमा पुरिमा नोउपादा खन्धा पच्छिमानं पच्छिमानं नोउपादा खन्धानं अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

समनन्तरपच्चयेन पच्चयो… सहजातपच्चयेन पच्चयो (पटिच्चसदिसं)… अञ्ञमञ्ञपच्चयेन पच्चयो (पटिच्चसदिसं)… निस्सयपच्चयेन पच्चयो (पच्चयवारे निस्सयसदिसं).

उपनिस्सयपच्चयो

३९८. उपादा धम्मो नोउपादा धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – चक्खुसम्पदं…पे… कायसम्पदं… वण्णसम्पदं… सद्दसम्पदं… गन्धसम्पदं… रससम्पदं… भोजनं उपनिस्साय दानं देति…पे… सङ्घं भिन्दति, चक्खुसम्पदा…पे… कायसम्पदा… वण्णसम्पदा… सद्दसम्पदा… गन्धसम्पदा… रससम्पदा… भोजनं सद्धाय…पे… फलसमापत्तिया उपनिस्सयपच्चयेन पच्चयो. (१)

नोउपादा धम्मो नोउपादा धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति; सीलं…पे… पञ्ञं… रागं …पे… पत्थनं… कायिकं सुखं… कायिकं दुक्खं… उतुं… सेनासनं उपनिस्साय दानं देति…पे… सङ्घं भिन्दति; सद्धा…पे… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

पुरेजातपच्चयो

३९९. उपादा धम्मो नोउपादा धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… रसायतनं जिव्हाविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं…पे… वत्थु नोउपादा खन्धानं पुरेजातपच्चयेन पच्चयो. (१)

नोउपादा धम्मो नोउपादा धम्मस्स पुरेजातपच्चयेन पच्चयो. आरम्मणपुरेजातं – फोट्ठब्बे अनिच्चतो…पे… दोमनस्सं उप्पज्जति; फोट्ठब्बायतनं कायविञ्ञाणस्स पुरेजातपच्चयेन पच्चयो. (१)

उपादा च नोउपादा च धम्मा नोउपादा धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. फोट्ठब्बायतनञ्च कायायतनञ्च कायविञ्ञाणस्स पुरेजातपच्चयेन पच्चयो; फोट्ठब्बायतनञ्च वत्थु च नोउपादा खन्धानं पुरेजातपच्चयेन पच्चयो. (१)

पच्छाजातासेवनपच्चया

४००. नोउपादा धम्मो नोउपादा धम्मस्स पच्छाजातपच्चयेन पच्चयो – पच्छाजाता नोउपादा खन्धा पुरेजातस्स इमस्स नोउपादा कायस्स पच्छाजातपच्चयेन पच्चयो. (मूलं पुच्छितब्बं) पच्छाजाता नोउपादा खन्धा पुरेजातस्स इमस्स उपादा कायस्स पच्छाजातपच्चयेन पच्चयो. (मूलं पुच्छितब्बं) पच्छाजाता नोउपादा खन्धा पुरेजातस्स इमस्स उपादा कायस्स च नोउपादा कायस्स च पच्छाजातपच्चयेन पच्चयो. (३)

आसेवनपच्चयेन पच्चयो… एकं.

कम्मपच्चयो

४०१. नोउपादा धम्मो नोउपादा धम्मस्स कम्मपच्चयेन पच्चयो – सहजाता, नानाक्खणिका. सहजाता – नोउपादा चेतना सम्पयुत्तकानं खन्धानं नोउपादा च चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोउपादा चेतना विपाकानं खन्धानं नोउपादा च कटत्तारूपानं कम्मपच्चयेन पच्चयो. (१)

नोउपादा धम्मो उपादा धम्मस्स कम्मपच्चयेन पच्चयो – सहजाता, नानाक्खणिका. सहजाता – नोउपादा चेतना उपादा चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोउपादा चेतना उपादा कटत्तारूपानं कम्मपच्चयेन पच्चयो. (२)

नोउपादा धम्मो उपादा च नोउपादा च धम्मस्स कम्मपच्चयेन पच्चयो – सहजाता, नानाक्खणिका. सहजाता – नोउपादा चेतना सम्पयुत्तकानं खन्धानं उपादा च नोउपादा च चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोउपादा चेतना विपाकानं खन्धानं उपादा च नोउपादा च कटत्तारूपानं कम्मपच्चयेन पच्चयो. (३)

विपाकपच्चयो

४०२. नोउपादा धम्मो नोउपादा धम्मस्स विपाकपच्चयेन पच्चयो – विपाको नोउपादा एको खन्धो तिण्णन्नं खन्धानं…पे… द्वे खन्धा…पे… पटिसन्धिक्खणे…पे… तीणि.

आहारपच्चयो

४०३. उपादा धम्मो उपादा धम्मस्स आहारपच्चयेन पच्चयो – कबळीकारो आहारो इमस्स उपादा कायस्स आहारपच्चयेन पच्चयो. (मूलं पुच्छितब्बं) कबळीकारो आहारो इमस्स नोउपादा कायस्स आहारपच्चयेन पच्चयो. (मूलं पुच्छितब्बं) कबळीकारो आहारो इमस्स उपादा कायस्स च नोउपादा कायस्स च आहारपच्चयेन पच्चयो. (३)

नोउपादा धम्मो नोउपादा धम्मस्स आहारपच्चयेन पच्चयो – नोउपादा आहारा सम्पयुत्तकानं खन्धानं नोउपादा च चित्तसमुट्ठानानं रूपानं आहारपच्चयेन पच्चयो; पटिसन्धिक्खणे…पे… (नोउपादामूलके तीणि, पटिसन्धिक्खणे तीणिपि कातब्बा). (३)

इन्द्रियपच्चयो

४०४. उपादा धम्मो उपादा धम्मस्स इन्द्रियपच्चयेन पच्चयो – रूपजीवितिन्द्रियं उपादा कटत्तारूपानं इन्द्रियपच्चयेन पच्चयो. (मूलं कातब्बं) चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स रूपजीवितिन्द्रियं नोउपादा कटत्तारूपानं इन्द्रियपच्चयेन पच्चयो. (मूलं कातब्बं) रूपजीवितिन्द्रियं उपादा च नोउपादा च कटत्तारूपानं इन्द्रियपच्चयेन पच्चयो. (३)

नोउपादा धम्मो नोउपादा धम्मस्स इन्द्रियपच्चयेन पच्चयो… तीणि; पटिसन्धिक्खणे…पे….

उपादा च नोउपादा च धम्मा नोउपादा धम्मस्स इन्द्रियपच्चयेन पच्चयो – चक्खुन्द्रियञ्च चक्खुविञ्ञाणञ्च चक्खुविञ्ञाणसहगतानं खन्धानं इन्द्रियपच्चयेन पच्चयो…पे… कायिन्द्रियञ्च…पे….

झानपच्चयादि

४०५. नो उपादा धम्मो नोउपादा धम्मस्स झानपच्चयेन पच्चयो… तीणि, मग्गपच्चयेन पच्चयो… तीणि; पटिसन्धिक्खणे…पे… सम्पयुत्तपच्चयेन पच्चयो… एकं.

विप्पयुत्तपच्चयो

४०६. उपादा धम्मो नोउपादा धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु नोउपादा खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं…पे… वत्थु नोउपादा खन्धानं विप्पयुत्तपच्चयेन पच्चयो. (१)

नोउपादा धम्मो नोउपादा धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – नोउपादा खन्धा नोउपादा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे नोउपादा खन्धा नोउपादा कटत्तारूपानं विप्पयुत्तपच्चयेन पच्चयो. पच्छाजाता – नोउपादा खन्धा पुरेजातस्स इमस्स नोउपादा कायस्स विप्पयुत्तपच्चयेन पच्चयो. (१)

नोउपादा धम्मो उपादा धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – नोउपादा खन्धा उपादा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – नोउपादा खन्धा पुरेजातस्स इमस्स उपादा कायस्स विप्पयुत्तपच्चयेन पच्चयो. (२)

नोउपादा धम्मो उपादा धम्मस्स च नोउपादा धम्मस्स च विप्पयुत्तपच्चयेन पच्चयो – सहजातं, पच्छाजातं. सहजाता – नोउपादा खन्धा उपादा च नोउपादा च चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – नोउपादा खन्धा पुरेजातस्स इमस्स उपादा कायस्स च नोउपादा कायस्स च विप्पयुत्तपच्चयेन पच्चयो. (३)

अत्थिपच्चयो

४०७. उपादा धम्मो उपादा धम्मस्स अत्थिपच्चयेन पच्चयो – आहारं, इन्द्रियं. कबळीकारो आहारो इमस्स उपादा कायस्स अत्थिपच्चयेन पच्चयो; रूपजीवितिन्द्रियं उपादा कटत्तारूपानं अत्थिपच्चयेन पच्चयो. (१)

उपादा धम्मो नोउपादा धम्मस्स अत्थिपच्चयेन पच्चयो – सहजातं, पुरेजातं, आहारं, इन्द्रियं. सहजातं – पटिसन्धिक्खणे वत्थु नोउपादा खन्धानं अत्थिपच्चयेन पच्चयो. पुरेजातं – चक्खुं अनिच्चतो…पे… (संखित्तं. पुरेजातसदिसं निन्नानाकरणं). कबळीकारो आहारो इमस्स नोउपादा कायस्स अत्थिपच्चयेन पच्चयो; रूपजीवितिन्द्रियं नोउपादा कटत्तारूपानं अत्थिपच्चयेन पच्चयो. (२)

उपादा धम्मो उपादा धम्मस्स च नोउपादा धम्मस्स च अत्थिपच्चयेन पच्चयो – आहारं, इन्द्रियं. कबळीकारो आहारो इमस्स उपादा कायस्स च नोउपादा कायस्स च अत्थिपच्चयेन पच्चयो; रूपजीवितिन्द्रियं उपादा च नोउपादा च कटत्तारूपानं अत्थिपच्चयेन पच्चयो. (३)

४०८. नोउपादा धम्मो नोउपादा धम्मस्स अत्थिपच्चयेन पच्चयो – सहजातं, पुरेजातं, पच्छाजातं. सहजातो – नोउपादा एको खन्धो तिण्णन्नं खन्धानं नोउपादा च चित्तसमुट्ठानानं रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे… एकं महाभूतं तिण्णन्नं महाभूतानं अत्थिपच्चयेन पच्चयो …पे… द्वे महाभूता द्विन्नं महाभूतानं अत्थिपच्चयेन पच्चयो (याव असञ्ञसत्ता). पुरेजातं – फोट्ठब्बे अनिच्चतो…पे… दोमनस्सं उप्पज्जति. फोट्ठब्बायतनं कायविञ्ञाणस्स अत्थिपच्चयेन पच्चयो. पच्छाजाता – नोउपादा खन्धा पुरेजातस्स इमस्स नोउपादा कायस्स अत्थिपच्चयेन पच्चयो. (१)

नोउपादा धम्मो उपादा धम्मस्स अत्थिपच्चयेन पच्चयो – सहजातं, पच्छाजातं. सहजाता – नोउपादा खन्धा उपादा चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे…. पच्छाजाता – नोउपादा खन्धा पुरेजातस्स इमस्स उपादा कायस्स अत्थिपच्चयेन पच्चयो. (२)

नोउपादा धम्मो उपादा च नोउपादा च धम्मस्स अत्थिपच्चयेन पच्चयो – सहजातं, पच्छाजातं. सहजातो – नोउपादा एको खन्धो तिण्णन्नं खन्धानं उपादा च नोउपादा च चित्तसमुट्ठानानं रूपानं अत्थिपच्चयेन पच्चयो; द्वे खन्धा…पे… पटिसन्धिक्खणे…पे…. पच्छाजाता – नोउपादा खन्धा पुरेजातस्स इमस्स उपादा कायस्स च नोउपादा कायस्स च अत्थिपच्चयेन पच्चयो. (३)

४०९. उपादा च नोउपादा च धम्मा उपादा धम्मस्स अत्थिपच्चयेन पच्चयो – पच्छाजातं, आहारं, इन्द्रियं. पच्छाजाता – नोउपादा खन्धा च कबळीकारो आहारो च इमस्स उपादा कायस्स अत्थिपच्चयेन पच्चयो. पच्छाजाता – नोउपादा खन्धा च रूपजीवितिन्द्रियञ्च उपादा कटत्तारूपानं अत्थिपच्चयेन पच्चयो. (१)

उपादा च नोउपादा च धम्मा नोउपादा धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – चक्खुविञ्ञाणसहगतो एको खन्धो च चक्खायतनञ्च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… नोउपादा एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… पटिसन्धिक्खणे नोउपादा एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. पुरेजातं – फोट्ठब्बायतनञ्च कायायतनञ्च कायविञ्ञाणस्स अत्थिपच्चयेन पच्चयो. फोट्ठब्बायतनञ्च वत्थु च नोउपादा खन्धानं अत्थिपच्चयेन पच्चयो. पच्छाजाता – नोउपादा खन्धा च कबळीकारो आहारो च इमस्स नोउपादा कायस्स अत्थिपच्चयेन पच्चयो. पच्छाजाता – नोउपादा खन्धा च रूपजीवितिन्द्रियञ्च नोउपादा कटत्तारूपानं अत्थिपच्चयेन पच्चयो. (२)

उपादा च नोउपादा च धम्मा उपादा धम्मस्स च नोउपादा धम्मस्स च अत्थिपच्चयेन पच्चयो – पच्छाजातं, आहारं, इन्द्रियं. पच्छाजाता – नोउपादा खन्धा च कबळीकारो आहारो च इमस्स उपादा कायस्स च नोउपादा कायस्स च अत्थिपच्चयेन पच्चयो. पच्छाजाता – नोउपादा खन्धा च रूपजीवितिन्द्रियञ्च उपादा च नोउपादा च कटत्तारूपानं अत्थिपच्चयेन पच्चयो. (३)