१. विभङ्गवारो

नहेतुपच्चयादि

३८९. उपादा धम्मं पच्चया नोउपादा धम्मो उप्पज्जति नहेतुपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नोउपादा खन्धा; अहेतुकपटिसन्धिक्खणे…पे… वत्थुं पच्चया विचिकिच्छासहगतो उद्धच्चसहगतो मोहो. (१)

नोउपादा धम्मं पच्चया नोउपादा धम्मो उप्पज्जति नहेतुपच्चया – अहेतुकं नोउपादा एकं खन्धं पच्चया तयो खन्धा नोउपादा च चित्तसमुट्ठानं रूपं…पे… द्वे खन्धे…पे… अहेतुकपटिसन्धिक्खणे…पे… एकं महाभूतं…पे… (याव असञ्ञसत्ता) विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो (तीणिपि पटिच्चसदिसा, निन्नानाकरणा). (३)

उपादा च नोउपादा च धम्मं पच्चया नोउपादा धम्मो उप्पज्जति नहेतुपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे च…पे… कायविञ्ञाणसहगतं…पे… अहेतुकं नोउपादा एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे… विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चया तीणि, नआसेवनपच्चया पञ्च.

नकम्मपच्चयादि

३९०. उपादा धम्मं पच्चया नोउपादा धम्मो उप्पज्जति नकम्मपच्चया – वत्थुं पच्चया नोउपादा चेतना. (१)

नोउपादा धम्मं पच्चया नोउपादा धम्मो उप्पज्जति नकम्मपच्चया – नोउपादा खन्धे पच्चया सम्पयुत्तका चेतना; बाहिरं आहारसमुट्ठानं उतुसमुट्ठानं…पे… द्वे महाभूते पच्चया द्वे महाभूता. (१)

नोउपादा धम्मं पच्चया उपादा धम्मो उप्पज्जति नकम्मपच्चया – बाहिरे आहारसमुट्ठाने उतुसमुट्ठाने महाभूते पच्चया उपादारूपं. (२)

नोउपादा धम्मं पच्चया उपादा च नोउपादा च धम्मा उप्पज्जन्ति नकम्मपच्चया – बाहिरं आहारसमुट्ठानं उतुसमुट्ठानं एकं महाभूतं पच्चया तयो महाभूता उपादा च रूपं…पे… द्वे महाभूते…पे…. (३)

उपादा च नोउपादा च धम्मं पच्चया नोउपादा धम्मो उप्पज्जति नकम्मपच्चया – नोउपादा खन्धे च वत्थुञ्च पच्चया नोउपादा चेतना. (१)

नविपाकपच्चया पञ्च, नआहारपच्चया तीणि, नइन्द्रियपच्चया तीणि.

नझानपच्चयादि

३९१. उपादा धम्मं पच्चया नोउपादा धम्मो उप्पज्जति नझानपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. (१)

नोउपादा धम्मं पच्चया नोउपादा धम्मो उप्पज्जति नझानपच्चया – पञ्चविञ्ञाणसहगतं एकं खन्धं पच्चया तयो खन्धा…पे… द्वे खन्धे…पे… बाहिरं आहारसमुट्ठानं उतुसमुट्ठानं असञ्ञसत्तानं…पे… द्वे महाभूते पच्चया द्वे महाभूता. (१)

नोउपादा धम्मं पच्चया उपादा धम्मो उप्पज्जति नझानपच्चया – बाहिरे आहारसमुट्ठाने उतुसमुट्ठाने असञ्ञसत्तानं महाभूते पच्चया उपादा कटत्तारूपं. (२)

नोउपादा धम्मं पच्चया उपादा च नोउपादा च धम्मा उप्पज्जन्ति नझानपच्चया – बाहिरं आहारसमुट्ठानं उतुसमुट्ठानं असञ्ञसत्तानं एकं महाभूतं पच्चया तयो महाभूता उपादा च कटत्तारूपं…पे… द्वे…पे…. (३)

उपादा च नोउपादा च धम्मं पच्चया नोउपादा धम्मो उप्पज्जति नझानपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे च…पे…. (१)

नमग्गपच्चया पञ्च, नसम्पयुत्तपच्चया तीणि, नविप्पयुत्तपच्चया तीणि, नोनत्थिपच्चया तीणि, नोविगतपच्चया तीणि.