१. विभङ्गवारो

हेतुपच्चयो

३८६. उपादा धम्मं पच्चया नोउपादा धम्मो उप्पज्जति हेतुपच्चया – वत्थुं पच्चया नोउपादा खन्धा; पटिसन्धिक्खणे…पे…. (१)

नोउपादा धम्मं पच्चया नोउपादा धम्मो उप्पज्जति हेतुपच्चया… तीणि (नोउपादामूलके तीणिपि पटिच्चसदिसा, निन्नानाकरणा). (३)

उपादा च नोउपादा च धम्मं पच्चया नोउपादा धम्मो उप्पज्जति हेतुपच्चया – नोउपादा एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे…. (१)

आरम्मणपच्चयो

३८७. उपादा धम्मं पच्चया नोउपादा धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया नोउपादा खन्धा; पटिसन्धिक्खणे…पे…. (१)

नोउपादा धम्मं पच्चया नोउपादा धम्मो उप्पज्जति आरम्मणपच्चया… एकं (पटिच्चसदिसं). (१)

उपादा धम्मञ्च नोउपादा धम्मञ्च धम्मं पच्चया नोउपादा धम्मो उप्पज्जति आरम्मणपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे च…पे… कायविञ्ञाणसहगतं…पे… नोउपादा एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे… (संखित्तं). (१)