१. विभङ्गवारो

नहेतुपच्चयो

३७५. उपादा धम्मं पटिच्च नोउपादा धम्मो उप्पज्जति नहेतुपच्चया – अहेतुकपटिसन्धिक्खणे वत्थुं पटिच्च नोउपादा खन्धा. (१)

नोउपादा धम्मं पटिच्च नोउपादा धम्मो उप्पज्जति नहेतुपच्चया – अहेतुकं नोउपादा एकं खन्धं पटिच्च तयो खन्धा नोउपादा च चित्तसमुट्ठानं रूपं…पे… द्वे खन्धे…पे… अहेतुकपटिसन्धिक्खणे…पे… एकं महाभूतं…पे… असञ्ञसत्तानं एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता, विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नोउपादा धम्मं पटिच्च उपादा धम्मो उप्पज्जति नहेतुपच्चया – अहेतुके नोउपादा खन्धे पटिच्च उपादा चित्तसमुट्ठानं रूपं; अहेतुकपटिसन्धिक्खणे…पे… महाभूते पटिच्च उपादा चित्तसमुट्ठानं रूपं कटत्तारूपं उपादारूपं…पे… (याव असञ्ञसत्ता). (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नहेतुपच्चया – अहेतुकं नोउपादा एकं खन्धं पटिच्च तयो खन्धा उपादा च नोउपादा च चित्तसमुट्ठानं रूपं…पे… द्वे खन्धे…पे… अहेतुकपटिसन्धिक्खणे…पे…. (३)

उपादा च नोउपादा च धम्मं पटिच्च नोउपादा धम्मो उप्पज्जति नहेतुपच्चया – अहेतुकपटिसन्धिक्खणे नोउपादा एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे…. (१)

नआरम्मणपच्चयादि

३७६. नोउपादा धम्मं पटिच्च नोउपादा धम्मो उप्पज्जति नआरम्मणपच्चया – नोउपादा खन्धे पटिच्च नोउपादा चित्तसमुट्ठानं रूपं; पटिसन्धिक्खणे…पे… एकं महाभूतं…पे… (याव असञ्ञसत्ता) द्वे महाभूते पटिच्च द्वे महाभूता. (१)

नोउपादा धम्मं पटिच्च उपादा धम्मो उप्पज्जति नआरम्मणपच्चया – नोउपादा खन्धे पटिच्च उपादा चित्तसमुट्ठानं रूपं; पटिसन्धिक्खणे…पे… महाभूते पटिच्च उपादा चित्तसमुट्ठानं रूपं कटत्तारूपं उपादारूपं (याव असञ्ञसत्ता). (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नआरम्मणपच्चया – नोउपादा खन्धे पटिच्च उपादा च नोउपादा च चित्तसमुट्ठानं रूपं; पटिसन्धिक्खणे…पे…. (३)

नअधिपतिपच्चया पञ्च, नअनन्तरपच्चया तीणि…पे… नउपनिस्सयपच्चया पञ्च, नपुरेजातपच्चया पञ्च, नपच्छाजातपच्चया पञ्च, नआसेवनपच्चया पञ्च.

नकम्मपच्चयो

३७७. नोउपादा धम्मं पटिच्च नोउपादा धम्मो उप्पज्जति नकम्मपच्चया – नोउपादा खन्धे पटिच्च सम्पयुत्तका चेतना; बाहिरं आहारसमुट्ठानं उतुसमुट्ठानं…पे… द्वे महाभूते पटिच्च द्वे महाभूता. (१)

नोउपादा धम्मं पटिच्च उपादा धम्मो उप्पज्जति नकम्मपच्चया – बाहिरे आहारसमुट्ठाने उतुसमुट्ठाने महाभूते पटिच्च उपादारूपं. (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नकम्मपच्चया – बाहिरं आहारसमुट्ठानं उतुसमुट्ठानं एकं महाभूतं पटिच्च तयो महाभूता उपादा च रूपं…पे… द्वे महाभूते…पे…. (३)

नविपाकपच्चयो

३७८. नोउपादा धम्मं पटिच्च नोउपादा धम्मो उप्पज्जति नविपाकपच्चया – नोउपादा एकं खन्धं पटिच्च तयो खन्धा नोउपादा च चित्तसमुट्ठानं रूपं…पे… द्वे खन्धे…पे… एकं महाभूतं…पे… (याव असञ्ञसत्ता, एवं तीणि नोउपादामूलके).

नआहारपच्चयो

३७९. नोउपादा धम्मं पटिच्च नोउपादा धम्मो उप्पज्जति नआहारपच्चया – बाहिरं उतुसमुट्ठानं असञ्ञसत्तानं एकं महाभूतं…पे… द्वे महाभूते पटिच्च द्वे महाभूता. (१)

नोउपादा धम्मं पटिच्च उपादा धम्मो उप्पज्जति नआहारपच्चया – बाहिरं उतुसमुट्ठानं असञ्ञसत्तानं महाभूते पटिच्च उपादारूपं. (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नआहारपच्चया – बाहिरं उतुसमुट्ठानं असञ्ञसत्तानं एकं महाभूतं पटिच्च तयो महाभूता उपादा च रूपं…पे… द्वे महाभूते…पे…. (३)

नइन्द्रियपच्चयो

३८०. नोउपादा धम्मं पटिच्च नोउपादा धम्मो उप्पज्जति नइन्द्रियपच्चया – बाहिरं आहारसमुट्ठानं उतुसमुट्ठानं एकं महाभूतं…पे…. (१)

नोउपादा धम्मं पटिच्च उपादा धम्मो उप्पज्जति नइन्द्रियपच्चया – बाहिरे आहारसमुट्ठाने उतुसमुट्ठाने असञ्ञसत्तानं महाभूते पटिच्च रूपजीवितिन्द्रियं.

नोउपादा धम्मं पटिच्च उपादा च नोउपादा च धम्मा उप्पज्जन्ति नइन्द्रियपच्चया – बाहिरं आहारसमुट्ठानं उतुसमुट्ठानं एकं महाभूतं…पे…. (३)

नझानपच्चयादि

३८१. नोउपादा धम्मं पटिच्च नोउपादा धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… द्वे खन्धे…पे… बाहिरं आहारसमुट्ठानं उतुसमुट्ठानं असञ्ञसत्तानं…पे… द्वे महाभूते पटिच्च द्वे महाभूता. (१)

नोउपादा धम्मं पटिच्च उपादा धम्मो उप्पज्जति नझानपच्चया – बाहिरे आहारसमुट्ठाने उतुसमुट्ठाने असञ्ञसत्तानं महाभूते पटिच्च उपादा कटत्तारूपं. (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नझानपच्चया – बाहिरं आहारसमुट्ठानं उतुसमुट्ठानं असञ्ञसत्तानं एकं महाभूतं पटिच्च तयो महाभूता…पे… द्वे महाभूते…पे… महाभूते पटिच्च उपादा कटत्तारूपं उपादारूपं. (३)

उपादा धम्मं पटिच्च नोउपादा धम्मो उप्पज्जति नमग्गपच्चया पञ्च… नसम्पयुत्तपच्चया… तीणि.

नविप्पयुत्तपच्चयादि

३८२. नोउपादा धम्मं पटिच्च नोउपादा धम्मो उप्पज्जति नविप्पयुत्तपच्चया – अरूपे नोउपादा एकं खन्धं पटिच्च तयो खन्धा…पे… द्वे खन्धे…पे… बाहिरं आहारसमुट्ठानं उतुसमुट्ठानं असञ्ञसत्तानं एकं महाभूतं…पे…. (१)

नोउपादा धम्मं पटिच्च उपादा धम्मो उप्पज्जति नविप्पयुत्तपच्चया – बाहिरे आहारसमुट्ठाने उतुसमुट्ठाने असञ्ञसत्तानं महाभूते पटिच्च उपादा कटत्तारूपं, उपादारूपं. (२)

नोउपादा धम्मं पटिच्च उपादा च नोउपादा च धम्मा उप्पज्जन्ति नविप्पयुत्तपच्चया – बाहिरं आहारसमुट्ठानं उतुसमुट्ठानं एकं महाभूतं पटिच्च तयो महाभूता उपादा च रूपं…पे… द्वे महाभूते पटिच्च द्वे महाभूता उपादा च रूपं, असञ्ञसत्तानं एकं महाभूतं पटिच्च तयो महाभूता कटत्ता च रूपं उपादारूपं…पे… द्वे महाभूते पटिच्च द्वे महाभूता कटत्ता च रूपं उपादारूपं… नोनत्थिपच्चया… नोविगतपच्चया. (३)