५. संसट्ठवारो

१-४. पच्चयानुलोमादि

३३९. अज्झत्तिकं धम्मं संसट्ठो बाहिरो धम्मो उप्पज्जति हेतुपच्चया – चित्तं संसट्ठा सम्पयुत्तका खन्धा; पटिसन्धिक्खणे चित्तं संसट्ठा सम्पयुत्तका खन्धा. (१)

बाहिरं धम्मं संसट्ठो बाहिरो धम्मो उप्पज्जति हेतुपच्चया – बाहिरं एकं खन्धं संसट्ठा द्वे खन्धा, द्वे खन्धे…पे… पटिसन्धिक्खणे…पे…. बाहिरं धम्मं संसट्ठो अज्झत्तिको धम्मो उप्पज्जति हेतुपच्चया – बाहिरे खन्धे संसट्ठं चित्तं; पटिसन्धिक्खणे…पे…. बाहिरं धम्मं संसट्ठो अज्झत्तिको च बाहिरो च धम्मा उप्पज्जन्ति हेतुपच्चया – बाहिरं एकं खन्धं संसट्ठा द्वे खन्धा चित्तञ्च, द्वे खन्धे…पे… पटिसन्धिक्खणे…पे…. (३)

अज्झत्तिकञ्च बाहिरञ्च धम्मं संसट्ठो बाहिरो धम्मो उप्पज्जति हेतुपच्चया – बाहिरं एकं खन्धञ्च चित्तञ्च संसट्ठा द्वे खन्धा, द्वे खन्धे…पे… पटिसन्धिक्खणे…पे… (संखित्तं). हेतुया पञ्च, आरम्मणे पञ्च, अधिपतिया पञ्च (सब्बत्थ पञ्च), अविगते पञ्च (अनुलोमं).

अज्झत्तिकं धम्मं संसट्ठो बाहिरो धम्मो उप्पज्जति नहेतुपच्चया (एवं पञ्च कातब्बा, तीणियेव मोहो).

नहेतुया पञ्च, नअधिपतिया पञ्च, नपुरेजाते पञ्च, नपच्छाजाते पञ्च, नआसेवने पञ्च, नकम्मे तीणि, नविपाके पञ्च, नझाने पञ्च, नमग्गे पञ्च, नविप्पयुत्ते पञ्च (पच्चनीयं).