१. विभङ्गवारो

नहेतुपच्चयो

३२३. अज्झत्तिकं धम्मं पटिच्च अज्झत्तिको धम्मो उप्पज्जति नहेतुपच्चया – अहेतुकपटिसन्धिक्खणे चित्तं पटिच्च अज्झत्तिकं कटत्तारूपं. (१)

अज्झत्तिकं धम्मं पटिच्च बाहिरो धम्मो उप्पज्जति नहेतुपच्चया – अहेतुकं चित्तं पटिच्च सम्पयुत्तका खन्धा चित्तसमुट्ठानञ्च रूपं; अहेतुकपटिसन्धिक्खणे चित्तं पटिच्च सम्पयुत्तका खन्धा बाहिरं कटत्ता च रूपं, विचिकिच्छासहगतं उद्धच्चसहगतं चित्तं पटिच्च विचिकिच्छासहगतो उद्धच्चसहगतो मोहो. (२)

अज्झत्तिकं धम्मं पटिच्च अज्झत्तिको च बाहिरो च धम्मा उप्पज्जन्ति नहेतुपच्चया – अहेतुकपटिसन्धिक्खणे चित्तं पटिच्च सम्पयुत्तका खन्धा अज्झत्तिकञ्च बाहिरञ्च कटत्तारूपं. (३)

३२४. बाहिरं धम्मं पटिच्च बाहिरो धम्मो उप्पज्जति नहेतुपच्चया – अहेतुकं बाहिरं एकं खन्धं पटिच्च द्वे खन्धा चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे …पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

बाहिरं धम्मं पटिच्च अज्झत्तिको धम्मो उप्पज्जति नहेतुपच्चया – अहेतुके बाहिरे खन्धे पटिच्च चित्तं; अहेतुकपटिसन्धिक्खणे बाहिरे खन्धे पटिच्च चित्तं अज्झत्तिकं कटत्ता च रूपं, अहेतुकपटिसन्धिक्खणे वत्थुं पटिच्च चित्तं. (२)

बाहिरं धम्मं पटिच्च अज्झत्तिको च बाहिरो च धम्मा उप्पज्जन्ति नहेतुपच्चया – अहेतुकं बाहिरं एकं खन्धं पटिच्च द्वे खन्धा चित्तञ्च चित्तसमुट्ठानञ्च रूपं, द्वे खन्धे …पे… अहेतुकपटिसन्धिक्खणे बाहिरं एकं खन्धं पटिच्च द्वे खन्धा चित्तञ्च अज्झत्तिकञ्च बाहिरञ्च कटत्तारूपं, अहेतुकपटिसन्धिक्खणे वत्थुं पटिच्च चित्तं सम्पयुत्तका च खन्धा. (३)

३२५. अज्झत्तिकञ्च बाहिरञ्च धम्मं पटिच्च अज्झत्तिको धम्मो उप्पज्जति नहेतुपच्चया – अहेतुकपटिसन्धिक्खणे चित्तञ्च सम्पयुत्तके च खन्धे पटिच्च अज्झत्तिकं कटत्तारूपं. (१)

अज्झत्तिकञ्च बाहिरञ्च धम्मं पटिच्च बाहिरो धम्मो उप्पज्जति नहेतुपच्चया – अहेतुकं बाहिरं एकं खन्धञ्च चित्तञ्च पटिच्च द्वे खन्धा चित्तसमुट्ठानञ्च रूपं, द्वे खन्धे…पे… अहेतुकं चित्तञ्च महाभूते च पटिच्च चित्तसमुट्ठानं रूपं; अहेतुकपटिसन्धिक्खणे बाहिरं एकं खन्धञ्च चित्तञ्च पटिच्च द्वे खन्धा बाहिरं कटत्ता च रूपं; अहेतुकपटिसन्धिक्खणे चित्तञ्च महाभूते च पटिच्च बाहिरं कटत्तारूपं, अहेतुकपटिसन्धिक्खणे चित्तञ्च वत्थुञ्च पटिच्च बाहिरा खन्धा, विचिकिच्छासहगते उद्धच्चसहगते खन्धे च चित्तञ्च पटिच्च विचिकिच्छासहगतो उद्धच्चसहगतो मोहो. (२)

अज्झत्तिकञ्च बाहिरञ्च धम्मं पटिच्च अज्झत्तिको च बाहिरो च धम्मा उप्पज्जन्ति नहेतुपच्चया – अहेतुकपटिसन्धिक्खणे बाहिरं एकं खन्धञ्च चित्तञ्च पटिच्च द्वे खन्धा अज्झत्तिकञ्च बाहिरञ्च कटत्तारूपं, द्वे खन्धे च…पे…. (३)

नआरम्मणपच्चयो

३२६. अज्झत्तिकं धम्मं पटिच्च अज्झत्तिको धम्मो उप्पज्जति नआरम्मणपच्चया – पटिसन्धिक्खणे चित्तं पटिच्च अज्झत्तिकं कटत्तारूपं. (१)

अज्झत्तिकं धम्मं पटिच्च बाहिरो धम्मो उप्पज्जति नआरम्मणपच्चया – चित्तं पटिच्च चित्तसमुट्ठानं रूपं; पटिसन्धिक्खणे चित्तं पटिच्च बाहिरं कटत्तारूपं. (२)

अज्झत्तिकं धम्मं पटिच्च अज्झत्तिको च बाहिरो च धम्मा उप्पज्जन्ति नआरम्मणपच्चया; पटिसन्धिक्खणे चित्तं पटिच्च अज्झत्तिकञ्च बाहिरञ्च कटत्तारूपं. (३)

बाहिरं धम्मं पटिच्च बाहिरो धम्मो उप्पज्जति नआरम्मणपच्चया – बाहिरे खन्धे पटिच्च चित्तसमुट्ठानं रूपं; पटिसन्धिक्खणे बाहिरे खन्धे पटिच्च बाहिरं कटत्तारूपं, बाहिरे खन्धे पटिच्च वत्थु, एकं महाभूतं…पे… (याव असञ्ञसत्ता). (१)

बाहिरं धम्मं पटिच्च अज्झत्तिको धम्मो उप्पज्जति नआरम्मणपच्चया – पटिसन्धिक्खणे बाहिरे खन्धे पटिच्च अज्झत्तिकं कटत्तारूपं. (२)

बाहिरं धम्मं पटिच्च अज्झत्तिको च बाहिरो च धम्मा उप्पज्जन्ति नआरम्मणपच्चया – पटिसन्धिक्खणे बाहिरे खन्धे पटिच्च अज्झत्तिकञ्च बाहिरञ्च कटत्तारूपं. (३)

३२७. अज्झत्तिकञ्च बाहिरञ्च धम्मं पटिच्च अज्झत्तिको धम्मो उप्पज्जति नआरम्मणपच्चया – पटिसन्धिक्खणे चित्तञ्च सम्पयुत्तके च खन्धे पटिच्च अज्झत्तिकं कटत्तारूपं. (१)

अज्झत्तिकञ्च बाहिरञ्च धम्मं पटिच्च बाहिरो धम्मो उप्पज्जति नआरम्मणपच्चया – बाहिरे खन्धे च चित्तञ्च पटिच्च चित्तसमुट्ठानं रूपं, चित्तञ्च महाभूते च पटिच्च चित्तसमुट्ठानं रूपं (पटिसन्धिक्खणे द्वे कातब्बा).

अज्झत्तिकञ्च बाहिरञ्च धम्मं पटिच्च अज्झत्तिको च बाहिरो च धम्मा उप्पज्जन्ति नआरम्मणपच्चया – पटिसन्धिक्खणे चित्तञ्च सम्पयुत्तके च खन्धे पटिच्च अज्झत्तिकञ्च बाहिरञ्च कटत्तारूपं (संखित्तं). (३)

नझानपच्चयो

३२८. अज्झत्तिकं धम्मं पटिच्च बाहिरो धम्मो उप्पज्जति नझानपच्चया – चक्खुविञ्ञाणं पटिच्च सम्पयुत्तका खन्धा…पे… कायविञ्ञाणं…पे….

बाहिरं धम्मं पटिच्च बाहिरो धम्मो उप्पज्जति नझानपच्चया – चक्खुविञ्ञाणसहगतं एकं खन्धं पटिच्च द्वे खन्धा, द्वे खन्धे…पे… कायविञ्ञाणसहगतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं…पे…. बाहिरं धम्मं पटिच्च अज्झत्तिको धम्मो उप्पज्जति नझानपच्चया – चक्खुविञ्ञाणसहगते खन्धे पटिच्च चक्खुविञ्ञाणं…पे… कायविञ्ञाणसहगते खन्धे पटिच्च कायविञ्ञाणं. बाहिरं धम्मं पटिच्च अज्झत्तिको च बाहिरो च धम्मा उप्पज्जन्ति नझानपच्चया – चक्खुविञ्ञाणसहगतं एकं खन्धं पटिच्च द्वे खन्धा चक्खुविञ्ञाणञ्च, द्वे खन्धे…पे… कायविञ्ञाणसहगतं एकं खन्धं…पे…. (३)

अज्झत्तिकञ्च बाहिरञ्च धम्मं पटिच्च बाहिरो धम्मो उप्पज्जति नझानपच्चया – चक्खुविञ्ञाणसहगतं एकं खन्धञ्च चक्खुविञ्ञाणञ्च पटिच्च द्वे खन्धा, द्वे खन्धे…पे… कायविञ्ञाणं (चक्कं).