१. विभङ्गवारो

हेतुपच्चयो

३१८. अज्झत्तिकं धम्मं पटिच्च अज्झत्तिको धम्मो उप्पज्जति हेतुपच्चया – पटिसन्धिक्खणे चित्तं पटिच्च अज्झत्तिकं कटत्तारूपं. (१)

अज्झत्तिकं धम्मं पटिच्च बाहिरो धम्मो उप्पज्जति हेतुपच्चया – चित्तं पटिच्च सम्पयुत्तका खन्धा चित्तसमुट्ठानञ्च रूपं; पटिसन्धिक्खणे चित्तं पटिच्च सम्पयुत्तका खन्धा बाहिरं कटत्ता च रूपं. (२)

अज्झत्तिकं धम्मं पटिच्च अज्झत्तिको च बाहिरो च धम्मा उप्पज्जन्ति हेतुपच्चया – पटिसन्धिक्खणे चित्तं पटिच्च सम्पयुत्तका खन्धा अज्झत्तिकञ्च बाहिरञ्च कटत्तारूपं. (३)

३१९. बाहिरं धम्मं पटिच्च बाहिरो धम्मो उप्पज्जति हेतुपच्चया – बाहिरं एकं खन्धं पटिच्च द्वे खन्धा चित्तसमुट्ठानञ्च रूपं, द्वे खन्धे…पे… पटिसन्धिक्खणे बाहिरं एकं खन्धं पटिच्च द्वे खन्धा बाहिरं कटत्ता च रूपं, द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

बाहिरं धम्मं पटिच्च अज्झत्तिको धम्मो उप्पज्जति हेतुपच्चया – बाहिरे खन्धे पटिच्च चित्तं; पटिसन्धिक्खणे बाहिरे खन्धे पटिच्च चित्तं अज्झत्तिकं कटत्ता च रूपं, पटिसन्धिक्खणे बाहिरं वत्थुं पटिच्च चित्तं. (२)

बाहिरं धम्मं पटिच्च अज्झत्तिको च बाहिरो च धम्मा उप्पज्जन्ति हेतुपच्चया – बाहिरं एकं खन्धं पटिच्च द्वे खन्धा चित्तञ्च चित्तसमुट्ठानञ्च रूपं, द्वे खन्धे…पे… पटिसन्धिक्खणे बाहिरं एकं खन्धं पटिच्च द्वे खन्धा चित्तञ्च अज्झत्तिकञ्च बाहिरञ्च कटत्तारूपं, द्वे खन्धे…पे… पटिसन्धिक्खणे वत्थुं पटिच्च चित्तं सम्पयुत्तका च खन्धा. (३)

३२०. अज्झत्तिकञ्च बाहिरञ्च धम्मं पटिच्च अज्झत्तिको धम्मो उप्पज्जति हेतुपच्चया – पटिसन्धिक्खणे चित्तञ्च सम्पयुत्तके च खन्धे पटिच्च अज्झत्तिकं कटत्तारूपं. (१)

अज्झत्तिकञ्च बाहिरञ्च धम्मं पटिच्च बाहिरो धम्मो उप्पज्जति हेतुपच्चया – बाहिरं एकं खन्धञ्च चित्तञ्च पटिच्च द्वे खन्धा चित्तसमुट्ठानञ्च रूपं, द्वे खन्धे च…पे… चित्तञ्च महाभूते च पटिच्च चित्तसमुट्ठानं रूपं; पटिसन्धिक्खणे बाहिरं एकं खन्धञ्च चित्तञ्च पटिच्च द्वे खन्धा बाहिरं कटत्ता च रूपं, द्वे खन्धे च…पे… चित्तञ्च महाभूते च पटिच्च बाहिरं कटत्तारूपं, पटिसन्धिक्खणे चित्तञ्च वत्थुञ्च पटिच्च बाहिरा खन्धा. (२)

अज्झत्तिकञ्च बाहिरञ्च धम्मं पटिच्च अज्झत्तिको च बाहिरो च धम्मा उप्पज्जन्ति हेतुपच्चया – पटिसन्धिक्खणे बाहिरं एकं खन्धञ्च चित्तञ्च पटिच्च द्वे खन्धा अज्झत्तिकञ्च बाहिरञ्च कटत्तारूपं, द्वे खन्धे च…पे…. (३)

आरम्मणपच्चयो

३२१. अज्झत्तिकं धम्मं पटिच्च बाहिरो धम्मो उप्पज्जति आरम्मणपच्चया – चित्तं पटिच्च सम्पयुत्तका खन्धा; पटिसन्धिक्खणे चित्तं पटिच्च सम्पयुत्तका खन्धा. (१)

बाहिरं धम्मं पटिच्च बाहिरो धम्मो उप्पज्जति आरम्मणपच्चया – बाहिरं एकं खन्धं पटिच्च द्वे खन्धा, द्वे खन्धे…पे… पटिसन्धिक्खणे…पे… वत्थुं पटिच्च खन्धा. (१)

बाहिरं धम्मं पटिच्च अज्झत्तिको धम्मो उप्पज्जति आरम्मणपच्चया – बाहिरे खन्धे पटिच्च चित्तं; पटिसन्धिक्खणे बाहिरे खन्धे पटिच्च चित्तं, पटिसन्धिक्खणे वत्थुं पटिच्च चित्तं. (२)

बाहिरं धम्मं पटिच्च अज्झत्तिको च बाहिरो च धम्मा उप्पज्जन्ति आरम्मणपच्चया – बाहिरं एकं खन्धं पटिच्च द्वे खन्धा चित्तञ्च, द्वे खन्धे…पे… पटिसन्धिक्खणे बाहिरं एकं खन्धं पटिच्च द्वे खन्धा चित्तञ्च, द्वे खन्धे…पे… पटिसन्धिक्खणे वत्थुं पटिच्च चित्तं सम्पयुत्तका च खन्धा. (३)

अज्झत्तिकञ्च बाहिरञ्च धम्मं पटिच्च बाहिरो धम्मो उप्पज्जति आरम्मणपच्चया – बाहिरं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे बाहिरं एकं खन्धं चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे बाहिरं एकं खन्धञ्च चित्तञ्च वत्थुञ्च पटिच्च द्वे खन्धा, द्वे खन्धे च…पे… (संखित्तं). (१)