१. विभङ्गवारो

हेतुपच्चयो

३००. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स हेतुपच्चयेन पच्चयो – चित्तसंसट्ठसमुट्ठाना हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (मूलं कातब्बं) चित्तसंसट्ठसमुट्ठाना हेतू चित्तस्स चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (मूलं कातब्बं) चित्तसंसट्ठसमुट्ठाना हेतू सम्पयुत्तकानं खन्धानं चित्तस्स च चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

३०१. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स आरम्मणपच्चयेन पच्चयो – चित्तसंसट्ठसमुट्ठाने खन्धे आरब्भ चित्तसंसट्ठसमुट्ठाना खन्धा उप्पज्जन्ति. (मूलं कातब्बं) चित्तसंसट्ठसमुट्ठाने खन्धे आरब्भ चित्तं उप्पज्जति. (मूलं कातब्बं) चित्तसंसट्ठसमुट्ठाने खन्धे आरब्भ चित्तञ्च सम्पयुत्तका च खन्धा उप्पज्जन्ति. (३)

नोचित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति…पे… निब्बानं पच्चवेक्खन्ति. निब्बानं गोत्रभुस्स…पे…. (संखित्तं. यथा चित्तसहभूदुके आरम्मणं एवं कातब्बं, निन्नानाकरणं. नवपि पञ्हा.)

अधिपतिपच्चयो

३०२. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि (द्वेपि अधिपती कातब्बा). (३)

नोचित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… तीणि (द्वेपि अधिपति कातब्बा). (३)

चित्तसंसट्ठसमुट्ठानो च नोचित्तसंसट्ठसमुट्ठानो च धम्मा चित्तसंसट्ठसमुट्ठानस्स धम्मस्स अधिपतिपच्चयेन पच्चयो – आरम्मणाधिपति. (एकायेव अधिपति कातब्बा, नवपि पञ्हा. यथा चित्तसहभूदुकं, एवं कातब्बं, निन्नानाकरणं).

अनन्तरपच्चयादि

३०३. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स अनन्तरपच्चयेन पच्चयो (नवपि पञ्हा चित्तसहभूदुकसदिसा)… समनन्तरपच्चयेन पच्चयो… नव… सहजातपच्चयेन पच्चयो… नव (पटिच्चसदिसा)… अञ्ञमञ्ञपच्चयेन पच्चयो… नव (पटिच्चसदिसा)… निस्सयपच्चयेन पच्चयो… नव (पच्चयसदिसा)… उपनिस्सयपच्चयेन पच्चयो (नवपि पञ्हा चित्तसहभूदुकसदिसा, निन्नानाकरणं).

पुरेजातपच्चयादि

३०४. नोचित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं… तीणि (चित्तसहभूदुकसदिसा, निन्नानाकरणं).

चित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स पच्छाजातपच्चयेन पच्चयो (चित्तसहभूदुकसदिसा, निन्नानाकरणं. तीणिपि पच्छाजाता. द्वे. एकमूलानं एका घटना)… आसेवनपच्चयेन पच्चयो… नव.

कम्मपच्चयादि

३०५. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स कम्मपच्चयेन पच्चयो… तीणि (चित्तसहभूदुकसदिसा निन्नानाकरणा. तीणिपि सहजाता, नानाक्खणिका)… विपाकपच्चयेन पच्चयो… नव… आहारपच्चयेन पच्चयो… नव (चित्तसहभूगमनसदिसा, एकंयेव कबळीकारं आहारं)… इन्द्रियपच्चयेन पच्चयो… नव… झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… पञ्च.

विप्पयुत्तपच्चयो

३०६. चित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नोचित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (१)

नोचित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चित्तसंसट्ठसमुट्ठानानं खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणसहगतानं खन्धानं विप्पयुत्तपच्चयेन पच्चयो…पे… कायायतनं…पे… वत्थु चित्तसंसट्ठसमुट्ठानानं खन्धानं विप्पयुत्तपच्चयेन पच्चयो. (२)

नोचित्तसंसट्ठसमुट्ठानो धम्मो चित्तसंसट्ठसमुट्ठानस्स च नोचित्तसंसट्ठसमुट्ठानस्स च धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चित्तस्स सम्पयुत्तकानञ्च खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं विप्पयुत्तपच्चयेन पच्चयो…पे… कायायतनं…पे… वत्थु चित्तस्स सम्पयुत्तकानञ्च खन्धानं विप्पयुत्तपच्चयेन पच्चयो. (३)

चित्तसंसट्ठसमुट्ठानो च नोचित्तसंसट्ठसमुट्ठानो च धम्मा नोचित्तसंसट्ठसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं).

अत्थिपच्चयो

३०७. चित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स अत्थिपच्चयेन पच्चयो (पटिच्चसदिसा). चित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). चित्तसंसट्ठसमुट्ठानो धम्मो चित्तसंसट्ठसमुट्ठानस्स च नोचित्तसंसट्ठसमुट्ठानस्स च धम्मस्स अत्थिपच्चयेन पच्चयो (पटिच्चसदिसा). (३)

नोचित्तसंसट्ठसमुट्ठानो धम्मो नोचित्तसंसट्ठसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (पुरेजातसदिसं पुरेजातं कातब्बं. सब्बं संखित्तं. वित्थारेतब्बं). (१)

नोचित्तसंसट्ठसमुट्ठानो धम्मो चित्तसंसट्ठसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं. सहजातं – चित्तं सम्पयुत्तकानं खन्धानं अत्थिपच्चयेन पच्चयो; पटिसन्धिक्खणे चित्तं सम्पयुत्तकानं खन्धानं अत्थिपच्चयेन पच्चयो, पटिसन्धिक्खणे वत्थु चित्तसंसट्ठसमुट्ठानानं खन्धानं अत्थिपच्चयेन पच्चयो. पुरेजातं (पुरेजातसदिसं, निन्नानाकरणं). (२)

नोचित्तसंसट्ठसमुट्ठानो धम्मो चित्तसंसट्ठसमुट्ठानस्स च नोचित्तसंसट्ठसमुट्ठानस्स च धम्मस्स अत्थिपच्चयेन पच्चयो – सहजातं, पुरेजातं. सहजातं – चित्तं सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो; पटिसन्धिक्खणे चित्तं सम्पयुत्तकानं खन्धानं कटत्ता च रूपानं अत्थिपच्चयेन पच्चयो, पटिसन्धिक्खणे वत्थु चित्तस्स सम्पयुत्तकानञ्च खन्धानं अत्थिपच्चयेन पच्चयो. पुरेजातं (पुरेजातसदिसं). (३)

३०८. चित्तसंसट्ठसमुट्ठानो च नोचित्तसंसट्ठसमुट्ठानो च धम्मा चित्तसंसट्ठसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खुविञ्ञाणञ्च द्विन्नं खन्धानं…पे… द्वे खन्धा च…पे… चक्खुविञ्ञाणसहगतो एको खन्धो च चक्खायतनञ्च द्विन्नं खन्धानं…पे… द्वे खन्धा च…पे… कायविञ्ञाणसहगतो…पे… चित्तसंसट्ठसमुट्ठानो एको खन्धो च चित्तञ्च द्विन्नं खन्धानं अत्थिपच्चयेन पच्चयो, द्वे खन्धा च…पे… चित्तसंसट्ठसमुट्ठानो एको खन्धो च वत्थु च द्विन्नं खन्धानं अत्थिपच्चयेन पच्चयो…पे… द्वे खन्धा च…पे… (पटिसन्धिक्खणे द्वेपि कातब्बा). (१)

चित्तसंसट्ठसमुट्ठानो च नोचित्तसंसट्ठसमुट्ठानो च धम्मा नोचित्तसंसट्ठसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजाता – चक्खुविञ्ञाणसहगता खन्धा च चक्खायतनञ्च चक्खुविञ्ञाणस्स अत्थिपच्चयेन पच्चयो…पे… कायविञ्ञाणसहगता…पे… चित्तसंसट्ठसमुट्ठाना खन्धा च चित्तञ्च चित्तसंसट्ठसमुट्ठानानं रूपानं अत्थिपच्चयेन पच्चयो, चित्तसंसट्ठसमुट्ठाना खन्धा च महाभूता च चित्तसंसट्ठसमुट्ठानानं रूपानं अत्थिपच्चयेन पच्चयो, चित्तसंसट्ठसमुट्ठाना खन्धा च वत्थु च चित्तस्स अत्थिपच्चयेन पच्चयो (पटिसन्धिक्खणे तीणि कातब्बा). पच्छाजाता – चित्तसंसट्ठसमुट्ठाना खन्धा च चित्तञ्च पुरेजातस्स इमस्स नोचित्तसंसट्ठसमुट्ठानस्स कायस्स अत्थिपच्चयेन पच्चयो. पच्छाजाता – चित्तसंसट्ठसमुट्ठाना खन्धा च चित्तञ्च कबळीकारो आहारो च इमस्स नोचित्तसंसट्ठसमुट्ठानस्स कायस्स अत्थिपच्चयेन पच्चयो. पच्छाजाता – चित्तसंसट्ठसमुट्ठाना खन्धा च चित्तञ्च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

चित्तसंसट्ठसमुट्ठानो च नोचित्तसंसट्ठसमुट्ठानो च धम्मा चित्तसंसट्ठसमुट्ठानस्स च नोचित्तसंसट्ठसमुट्ठानस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च द्विन्नं खन्धानं चक्खुविञ्ञाणस्स च अत्थिपच्चयेन पच्चयो, द्वे खन्धा च…पे… कायविञ्ञाणसहगतो…पे…. सहजातो – चित्तसंसट्ठसमुट्ठानो एको खन्धो च चित्तञ्च द्विन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो, द्वे खन्धा च…पे… चित्तसंसट्ठसमुट्ठानो एको खन्धो च वत्थु च द्विन्नं खन्धानं चित्तस्स च अत्थिपच्चयेन पच्चयो, द्वे खन्धा च…पे… (पटिसन्धिक्खणे द्वेपि कातब्बा). (३)