१. विभङ्गवारो

हेतुपच्चयो

२८९. चित्तसंसट्ठसमुट्ठानं धम्मं पच्चया चित्तसंसट्ठसमुट्ठानो धम्मो उप्पज्जति हेतुपच्चया (संखित्तं) तीणि (पटिच्चवारसदिसा).

नोचित्तसंसट्ठसमुट्ठानं धम्मं पच्चया नोचित्तसंसट्ठसमुट्ठानो धम्मो उप्पज्जति हेतुपच्चया – चित्तं पच्चया चित्तसमुट्ठानं रूपं, वत्थुं पच्चया चित्तं; पटिसन्धिक्खणे…पे… (याव महाभूता). (१)

नोचित्तसंसट्ठसमुट्ठानं धम्मं पच्चया चित्तसंसट्ठसमुट्ठानो धम्मो उप्पज्जति हेतुपच्चया – चित्तं पच्चया सम्पयुत्तका खन्धा, वत्थुं पच्चया चित्तसंसट्ठसमुट्ठाना खन्धा (पटिसन्धिक्खणे द्वेपि कातब्बा) तीणि. (३)

२९०. चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया चित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठानं एकं खन्धञ्च चित्तञ्च पच्चया द्वे खन्धा, द्वे खन्धे च…पे… चित्तसंसट्ठसमुट्ठानं एकं खन्धञ्च वत्थुञ्च पच्चया द्वे खन्धा, द्वे खन्धे च…पे… (पटिसन्धिक्खणे द्वेपि कातब्बा). (१)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया नोचित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठाने खन्धे च चित्तञ्च पच्चया नोचित्तसंसट्ठसमुट्ठानं रूपं, चित्तसंसट्ठसमुट्ठाने खन्धे च महाभूते च पच्चया नोचित्तसंसट्ठसमुट्ठानं रूपं, चित्तसंसट्ठसमुट्ठाने खन्धे च वत्थुञ्च पच्चया चित्तं (पटिसन्धिक्खणे तीणिपि कातब्बा). (२)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति हेतुपच्चया – चित्तसंसट्ठसमुट्ठानं एकं खन्धञ्च चित्तञ्च पच्चया द्वे खन्धा चित्तसंसट्ठसमुट्ठानञ्च रूपं, द्वे खन्धे…पे… चित्तसंसट्ठसमुट्ठानं एकं खन्धञ्च वत्थुञ्च पच्चया द्वे खन्धा चित्तञ्च, द्वे खन्धे…पे… (पटिसन्धिक्खणे द्वेपि कातब्बा). (३)

आरम्मणपच्चयो

२९१. चित्तसंसट्ठसमुट्ठानं धम्मं पच्चया चित्तसंसट्ठसमुट्ठानो धम्मो उप्पज्जति आरम्मणपच्चया… तीणि (पटिच्चसदिसा).

नोचित्तसंसट्ठसमुट्ठानं धम्मं पच्चया नोचित्तसंसट्ठसमुट्ठानो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणं…पे… कायायतनं…पे… वत्थुं पच्चया चित्तं; पटिसन्धिक्खणे…पे…. (१)

नोचित्तसंसट्ठसमुट्ठानं धम्मं पच्चया चित्तसंसट्ठसमुट्ठानो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणसहगता खन्धा…पे… कायायतनं…पे… चित्तं पच्चया सम्पयुत्तका खन्धा, वत्थुं पच्चया चित्तसंसट्ठसमुट्ठाना खन्धा (पटिसन्धिक्खणे द्वेपि कातब्बा). (२)

नोचित्तसंसट्ठसमुट्ठानं धम्मं पच्चया चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति आरम्मणपच्चया – चक्खायतनं पच्चया चक्खुविञ्ञाणं सम्पयुत्तका च खन्धा…पे… कायायतनं…पे… वत्थुं पच्चया चित्तं सम्पयुत्तका च खन्धा (पटिसन्धिक्खणे एकं कातब्बं). (३)

२९२. चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया चित्तसंसट्ठसमुट्ठानो धम्मो उप्पज्जति आरम्मणपच्चया – चक्खुविञ्ञाणसहगतं एकं खन्धञ्च चक्खायतनञ्च चक्खुविञ्ञाणञ्च पच्चया द्वे खन्धा, द्वे खन्धे…पे… कायविञ्ञाणसहगतं…पे… चित्तसंसट्ठसमुट्ठानं एकं खन्धञ्च चित्तञ्च पच्चया द्वे खन्धा, द्वे खन्धे…पे… चित्तसंसट्ठसमुट्ठानं एकं खन्धञ्च वत्थुञ्च पच्चया द्वे खन्धा, द्वे खन्धे…पे… (पटिसन्धिक्खणे द्वे कातब्बा). (१)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया नोचित्तसंसट्ठसमुट्ठानो धम्मो उप्पज्जति आरम्मणपच्चया – चक्खुविञ्ञाणसहगते खन्धे च चक्खायतनञ्च पच्चया चक्खुविञ्ञाणं …पे… कायविञ्ञाणसहगते…पे… चित्तसंसट्ठसमुट्ठाने खन्धे च वत्थुञ्च पच्चया चित्तं (पटिसन्धिक्खणे एकं कातब्बं). (२)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पच्चया चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति आरम्मणपच्चया – चित्तसंसट्ठसमुट्ठानं एकं खन्धञ्च वत्थुञ्च पच्चया द्वे खन्धा चित्तञ्च, द्वे खन्धे…पे… (पटिसन्धिक्खणे एकं कातब्बं, संखित्तं). (३)