१. विभङ्गवारो

हेतुपच्चयो

२७८. चित्तसंसट्ठसमुट्ठानं धम्मं पटिच्च चित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठानं एकं खन्धं पटिच्च द्वे खन्धा, द्वे खन्धे पटिच्च एको खन्धो; पटिसन्धिक्खणे…पे…. (१)

चित्तसंसट्ठसमुट्ठानं धम्मं पटिच्च नोचित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठाने खन्धे पटिच्च चित्तं चित्तसमुट्ठानञ्च रूपं; पटिसन्धिक्खणे चित्तसंसट्ठसमुट्ठाने खन्धे पटिच्च चित्तं कटत्ता च रूपं. (२)

चित्तसंसट्ठसमुट्ठानं धम्मं पटिच्च चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति हेतुपच्चया – चित्तसंसट्ठसमुट्ठानं एकं खन्धं पटिच्च द्वे खन्धा चित्तञ्च चित्तसमुट्ठानञ्च रूपं, द्वे खन्धे…पे… पटिसन्धिक्खणे…पे…. (३)

२७९. नोचित्तसंसट्ठसमुट्ठानं धम्मं पटिच्च नोचित्तसंसट्ठसमुट्ठानो धम्मो उप्पज्जति हेतुपच्चया – चित्तं पटिच्च चित्तसमुट्ठानं रूपं; पटिसन्धिक्खणे चित्तं पटिच्च कटत्तारूपं, चित्तं पटिच्च वत्थु, वत्थुं पटिच्च चित्तं, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

नोचित्तसंसट्ठसमुट्ठानं धम्मं पटिच्च चित्तसंसट्ठसमुट्ठानो धम्मो उप्पज्जति हेतुपच्चया – चित्तं पटिच्च सम्पयुत्तका खन्धा; पटिसन्धिक्खणे चित्तं पटिच्च सम्पयुत्तका खन्धा, पटिसन्धिक्खणे वत्थुं पटिच्च चित्तसंसट्ठसमुट्ठाना खन्धा. (२)

नोचित्तसंसट्ठसमुट्ठानं धम्मं पटिच्च चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति हेतुपच्चया – चित्तं पटिच्च सम्पयुत्तका खन्धा चित्तसमुट्ठानञ्च रूपं; पटिसन्धिक्खणे चित्तं पटिच्च सम्पयुत्तका खन्धा कटत्ता च रूपं, पटिसन्धिक्खणे वत्थुं पटिच्च चित्तं सम्पयुत्तका च खन्धा. (३)

२८०. चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पटिच्च चित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठानं एकं खन्धञ्च चित्तञ्च पटिच्च द्वे खन्धा, द्वे खन्धे…पे… पटिसन्धिक्खणे चित्तसंसट्ठसमुट्ठानं एकं खन्धञ्च चित्तञ्च पटिच्च द्वे खन्धा, द्वे खन्धे…पे… पटिसन्धिक्खणे चित्तसंसट्ठसमुट्ठानं एकं खन्धञ्च वत्थुञ्च पटिच्च द्वे खन्धा, द्वे खन्धे…पे…. (१)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पटिच्च नोचित्तसंसट्ठसमुट्ठानो धम्मो उप्पज्जति हेतुपच्चया – चित्तसंसट्ठसमुट्ठाने खन्धे च चित्तञ्च पटिच्च चित्तसमुट्ठानं रूपं, चित्तसंसट्ठसमुट्ठाने खन्धे च महाभूते च पटिच्च चित्तसमुट्ठानं रूपं; पटिसन्धिक्खणे चित्तसंसट्ठसमुट्ठाने खन्धे च चित्तञ्च पटिच्च कटत्तारूपं, पटिसन्धिक्खणे चित्तसंसट्ठसमुट्ठाने खन्धे च महाभूते च पटिच्च कटत्तारूपं, पटिसन्धिक्खणे चित्तसंसट्ठसमुट्ठाने खन्धे च वत्थुञ्च पटिच्च चित्तं. (२)

चित्तसंसट्ठसमुट्ठानञ्च नोचित्तसंसट्ठसमुट्ठानञ्च धम्मं पटिच्च चित्तसंसट्ठसमुट्ठानो च नोचित्तसंसट्ठसमुट्ठानो च धम्मा उप्पज्जन्ति हेतुपच्चया – चित्तसंसट्ठसमुट्ठानं एकं खन्धञ्च चित्तञ्च पटिच्च द्वे खन्धा चित्तसमुट्ठानञ्च रूपं, द्वे खन्धे…पे… पटिसन्धिक्खणे चित्तसंसट्ठसमुट्ठानं एकं खन्धञ्च चित्तञ्च पटिच्च द्वे खन्धा कटत्ता च रूपं, द्वे खन्धे…पे… पटिसन्धिक्खणे चित्तसंसट्ठसमुट्ठानं एकं खन्धञ्च वत्थुञ्च पटिच्च द्वे खन्धा चित्तञ्च, द्वे खन्धे…पे… (संखित्तं). (३)