१. विभङ्गवारो

हेतुपच्चयो

२५७. चित्तसहभू धम्मो चित्तसहभुस्स धम्मस्स हेतुपच्चयेन पच्चयो – चित्तसहभू हेतू सम्पयुत्तकानं खन्धानं चित्तसहभूनं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

चित्तसहभू धम्मो नोचित्तसहभुस्स धम्मस्स हेतुपच्चयेन पच्चयो – चित्तसहभू हेतू चित्तस्स नोचित्तसहभूनं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे चित्तसहभू हेतू चित्तस्स कटत्ता च रूपानं हेतुपच्चयेन पच्चयो. (२)

चित्तसहभू धम्मो चित्तसहभुस्स च नोचित्तसहभुस्स च धम्मस्स हेतुपच्चयेन पच्चयो; चित्तसहभू हेतू सम्पयुत्तकानं खन्धानं चित्तस्स च चित्तसहभूनञ्च नोचित्तसहभूनञ्च चित्तसमुट्ठानानं रूपानं हेतुपच्चयेन पच्चयो. (३)

आरम्मणपच्चयो

२५८. चित्तसहभू धम्मो चित्तसहभुस्स धम्मस्स आरम्मणपच्चयेन पच्चयो… नव (चित्तसमुट्ठानदुकसदिसं, निन्नानाकरणं).

अधिपतिपच्चयो

२५९. चित्तसहभू धम्मो चित्तसहभुस्स धम्मस्स अधिपतिपच्चयेन पच्चयो… तीणि (आरम्मणाधिपतिपि सहजाताधिपतिपि कातब्बा).

नोचित्तसहभू धम्मो नोचित्तसहभुस्स धम्मस्स अधिपतिपच्चयेन पच्चयो… तीणि (आरम्मणाधिपतिपि सहजाताधिपतिपि इमेसम्पि तिण्णं कातब्बा. नवपि पञ्हा चित्तसमुट्ठानदुकसदिसा. अन्ते तीणि आरम्मणाधिपतियेव).

अनन्तरपच्चयादि

२६०. चित्तसहभू धम्मो चित्तसहभुस्स धम्मस्स अनन्तरपच्चयेन पच्चयो… नव (चित्तसमुट्ठानदुकसदिसं, निन्नानाकरणं)… समनन्तरपच्चयेन पच्चयो… नव (पटिच्चसदिसा) … सहजातपच्चयेन पच्चयो… नव (पटिच्चसदिसा)… अञ्ञमञ्ञपच्चयेन पच्चयो… नव (पटिच्चसदिसा)… निस्सयपच्चयेन पच्चयो… नव (पच्चयवारसदिसा)… उपनिस्सयपच्चयेन पच्चयो… नव (चित्तसमुट्ठानदुकसदिसा).

पुरेजातपच्चयो

२६१. नोचित्तसहभू धम्मो नोचित्तसहभुस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं… तीणि (नोचित्तसहभू मूलंयेव लब्भति, चित्तसमुट्ठानदुकसदिसा. तीणिपि निन्नानाकरणं).

पच्छाजातासेवनपच्चया

२६२. चित्तसहभू धम्मो नोचित्तसहभुस्स धम्मस्स पच्छाजातपच्चयेन पच्चयो – पच्छाजाता चित्तसहभू खन्धा पुरेजातस्स इमस्स नोचित्तसहभुस्स कायस्स पच्छाजातपच्चयेन पच्चयो. (१)

नोचित्तसहभू धम्मो नोचित्तसहभुस्स धम्मस्स पच्छाजातपच्चयेन पच्चयो…पे…. (१)

चित्तसहभू च नोचित्तसहभू च धम्मा नोचित्तसहभुस्स धम्मस्स पच्छाजातपच्चयेन पच्चयो (संखित्तं)… आसेवनपच्चयेन पच्चयो… नव.

कम्मपच्चयो

२६३. चित्तसहभू धम्मो चित्तसहभुस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसहभू चेतना सम्पयुत्तकानं खन्धानं चित्तसहभूनं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसहभू चेतना विपाकानं चित्तसहभूनं खन्धानं कम्मपच्चयेन पच्चयो. (१)

चित्तसहभू धम्मो नोचित्तसहभुस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसहभू चेतना चित्तस्स नोचित्तसहभूनं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसहभू चेतना विपाकस्स चित्तस्स कटत्ता च रूपानं कम्मपच्चयेन पच्चयो. (२)

चित्तसहभू धम्मो चित्तसहभुस्स च नोचित्तसहभुस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसहभू चेतना सम्पयुत्तकानं खन्धानं चित्तस्स च चित्तसहभूनञ्च नोचित्तसहभूनञ्च चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसहभू चेतना विपाकानं खन्धानं चित्तस्स कटत्ता च रूपानं कम्मपच्चयेन पच्चयो. (३)

विपाकपच्चयादि

२६४. चित्तसहभू धम्मो चित्तसहभुस्स धम्मस्स विपाकपच्चयेन पच्चयो (चित्तसमुट्ठानदुकसदिसं)… आहारपच्चयेन पच्चयो… नव (चित्तसमुट्ठानदुकसदिसा. इमम्पि एकं कबळीकारआहारसदिसं). चित्तसहभू धम्मो चित्तसहभुस्स धम्मस्स इन्द्रियपच्चयेन पच्चयो… नव (चित्तसमुट्ठानदुकसदिसं, निन्नानाकरणं)… झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… पञ्च.

विप्पयुत्तपच्चयो

२६५. चित्तसहभू धम्मो चित्तसहभुस्स धम्मस्स विप्पयुत्तपच्चयेन पच्चयो. सहजाता – चित्तसहभू खन्धा चित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो. (१)

चित्तसहभू धम्मो नोचित्तसहभुस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – चित्तसहभू खन्धा नोचित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – चित्तसहभू खन्धा पुरेजातस्स इमस्स नोचित्तसहभुस्स कायस्स विप्पयुत्तपच्चयेन पच्चयो. (२)

चित्तसहभू धम्मो चित्तसहभुस्स च नोचित्तसहभुस्स च धम्मस्स विप्पयुत्तपच्चयेन पच्चयो. सहजाता – चित्तसहभू खन्धा चित्तसहभूनञ्च नोचित्तसहभूनञ्च चित्तसमुट्ठानानं रूपानं विप्पयुत्तपच्चयेन पच्चयो. (३)

२६६. नोचित्तसहभू धम्मो नोचित्तसहभुस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजातं – चित्तं नोचित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे चित्तं कटत्तारूपानं विप्पयुत्तपच्चयेन पच्चयो; चित्तं वत्थुस्स विप्पयुत्तपच्चयेन पच्चयो; वत्थु चित्तस्स विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स विप्पयुत्तपच्चयेन पच्चयो…पे… कायायतनं…पे… वत्थु चित्तस्स विप्पयुत्तपच्चयेन पच्चयो. पच्छाजातं – चित्तं पुरेजातस्स इमस्स नोचित्तसहभुस्स कायस्स विप्पयुत्तपच्चयेन पच्चयो. (१)

नोचित्तसहभू धम्मो चित्तसहभुस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – चित्तं चित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणसहगतानं खन्धानं विप्पयुत्तपच्चयेन पच्चयो…पे… कायायतनं…पे… वत्थु चित्तसहभूनं खन्धानं विप्पयुत्तपच्चयेन पच्चयो. (२)

नोचित्तसहभू धम्मो चित्तसहभुस्स च नोचित्तसहभुस्स च धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – चित्तं चित्तसहभूनञ्च नोचित्तसहभूनञ्च चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. वत्थुपुरेजातं – चक्खायतनं चक्खुविञ्ञाणस्स सम्पयुत्तकानञ्च रूपानं विप्पयुत्तपच्चयेन पच्चयो…पे… कायायतनं…पे… वत्थु चित्तस्स सम्पयुत्तकानञ्च खन्धानं विप्पयुत्तपच्चयेन पच्चयो. (३)

२६७. चित्तसहभू च नोचित्तसहभू च धम्मा चित्तसहभुस्स धम्मस्स विप्पयुत्तपच्चयेन पच्चयो. सहजाता – चित्तसहभू खन्धा च चित्तञ्च चित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो. (१)

चित्तसहभू च नोचित्तसहभू च धम्मा नोचित्तसहभुस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – चित्तसहभू खन्धा च चित्तञ्च नोचित्तसहभूनं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे …पे…. पच्छाजाता – चित्तसहभू खन्धा च चित्तञ्च पुरेजातस्स इमस्स नोचित्तसहभुस्स कायस्स विप्पयुत्तपच्चयेन पच्चयो. (२)

चित्तसहभू च नोचित्तसहभू च धम्मा चित्तसहभुस्स च नोचित्तसहभुस्स च धम्मस्स विप्पयुत्तपच्चयेन पच्चयो – चित्तसहभू खन्धा च चित्तञ्च चित्तसहभूनञ्च नोचित्तसहभूनञ्च चित्तसमुट्ठानानं रूपानं विप्पयुत्तपच्चयेन पच्चयो. (३)

अत्थिपच्चयो

२६८. चित्तसहभू धम्मो चित्तसहभुस्स धम्मस्स अत्थिपच्चयेन पच्चयो – चित्तसहभू एको खन्धो…पे… (पटिच्चसदिसं). (१)

चित्तसहभू धम्मो नोचित्तसहभुस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). (२)

चित्तसहभू धम्मो चित्तसहभुस्स च नोचित्तसहभुस्स च धम्मस्स अत्थिपच्चयेन पच्चयो – चित्तसहभू एको खन्धो…पे… (पटिच्चसदिसं). (३)

नोचित्तसहभू धम्मो नोचित्तसहभुस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नोचित्तसहभू धम्मो चित्तसहभुस्स धम्मस्स अत्थिपच्चयेन पच्चयो – सहजातं, पुरेजातं (संखित्तं. (२)

नोचित्तसहभू धम्मो चित्तसहभुस्स च नोचित्तसहभुस्स च धम्मस्स अत्थिपच्चयेन पच्चयो – सहजातं, पुरेजातं (संखित्तं). (३)

२६९. चित्तसहभू च नोचित्तसहभू च धम्मा चित्तसहभुस्स धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च चक्खुविञ्ञाणञ्च द्विन्नं खन्धानं…पे… द्वे खन्धा च…पे… (सब्बं पटिसन्धियं कातब्बं, सहजातं पुरेजातम्पि). (१)

चित्तसहभू च नोचित्तसहभू च धम्मा नोचित्तसहभुस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजाता – चक्खुविञ्ञाणसहगता खन्धा चक्खायतनञ्च चक्खुविञ्ञाणस्स अत्थिपच्चयेन पच्चयो…पे… कायविञ्ञाणसहगता…पे… चित्तसहभू खन्धा च चित्तञ्च नोचित्तसहभूनं चित्तसमुट्ठानानं रूपानं अत्थिपच्चयेन पच्चयो. सहजाता – चित्तसहभू खन्धा च वत्थु च चित्तस्स अत्थिपच्चयेन पच्चयो. सहजाता – चित्तसहभू खन्धा च महाभूता च नोचित्तसहभूनं चित्तसमुट्ठानानं रूपानं अत्थिपच्चयेन पच्चयो (पटिसन्धिक्खणे तीणिपि कातब्बा). पच्छाजाता – चित्तसहभू खन्धा च चित्तञ्च पुरेजातस्स इमस्स नोचित्तसहभुस्स कायस्स अत्थिपच्चयेन पच्चयो. पच्छाजाता – चित्तसहभू खन्धा च कबळीकारो आहारो च इमस्स नोचित्तसहभुस्स कायस्स अत्थिपच्चयेन पच्चयो. पच्छाजाता – चित्तसहभू खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

चित्तसहभू च नोचित्तसहभू च धम्मा चित्तसहभुस्स च नोचित्तसहभुस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनं च…पे… (पच्चयवारसदिसं). (३)