१. विभङ्गवारो

हेतुपच्चयो

२४७. चित्तसहभुं धम्मं पच्चया चित्तसहभू धम्मो उप्पज्जति हेतुपच्चया… तीणि (पटिच्चसदिसा).

नोचित्तसहभुं धम्मं पच्चया नोचित्तसहभू धम्मो उप्पज्जति हेतुपच्चया – वत्थुं पच्चया चित्तं, चित्तं पच्चया नोचित्तसहभु चित्तसमुट्ठानं रूपं; पटिसन्धिक्खणे…पे… (पटिच्चवारसदिसं, सब्बे महाभूता). (१)

नोचित्तसहभुं धम्मं पच्चया चित्तसहभू धम्मो उप्पज्जति हेतुपच्चया – चित्तं पच्चया सम्पयुत्तका खन्धा चित्तसहभु चित्तसमुट्ठानञ्च रूपं, वत्थुं पच्चया चित्तसहभू खन्धा; पटिसन्धिक्खणे…पे… (सब्बे महाभूता पटिच्चसदिसं). (२)

नोचित्तसहभुं धम्मं पच्चया चित्तसहभू च नोचित्तसहभू च धम्मा उप्पज्जन्ति हेतुपच्चया – चित्तं पच्चया सम्पयुत्तका खन्धा चित्तसहभु च नोचित्तसहभु च चित्तसमुट्ठानं रूपं, वत्थुं पच्चया चित्तञ्च सम्पयुत्तका च खन्धा; पटिसन्धिक्खणे…पे… (पटिच्चसदिसं, सब्बे महाभूता). (३)

२४८. चित्तसहभुञ्च नोचित्तसहभुञ्च धम्मं पच्चया चित्तसहभू धम्मो उप्पज्जति हेतुपच्चया – चित्तसहभुं एकं खन्धञ्च चित्तञ्च पच्चया द्वे खन्धा चित्तसहभु चित्तसमुट्ठानञ्च रूपं, द्वे खन्धे च…पे… चित्तसहभुं एकं खन्धञ्च वत्थुञ्च पच्चया द्वे खन्धा, द्वे खन्धे च…पे… पटिसन्धिक्खणे…पे… (पटिच्चसदिसं, सब्बे महाभूता). (१)

चित्तसहभुञ्च नोचित्तसहभुञ्च धम्मं पच्चया नोचित्तसहभू धम्मो उप्पज्जति हेतुपच्चया – चित्तसहभू खन्धे च चित्तञ्च पच्चया नोचित्तसहभु चित्तसमुट्ठानं रूपं, चित्तसहभू खन्धे च वत्थुञ्च पच्चया चित्तं. चित्तसहभू खन्धे च महाभूते च पच्चया नोचित्तसहभु चित्तसमुट्ठानं रूपं; पटिसन्धिक्खणे…पे… (पटिच्चसदिसं, सब्बे महाभूता). (२)

चित्तसहभुञ्च नोचित्तसहभुञ्च धम्मं पच्चया चित्तसहभू च नोचित्तसहभू च धम्मा उप्पज्जन्ति हेतुपच्चया – चित्तसहभुं एकं खन्धञ्च चित्तञ्च पच्चया द्वे खन्धा चित्तसहभु च नोचित्तसहभु च चित्तसमुट्ठानं रूपं, चित्तसहभुं एकं खन्धञ्च वत्थुञ्च पच्चया द्वे खन्धा चित्तञ्च, द्वे खन्धे च…पे… पटिसन्धिक्खणे…पे… (पटिच्चसदिसं, सब्बे महाभूता). (३)

आरम्मणपच्चयो

२४९. चित्तसहभुं धम्मं पच्चया चित्तसहभू धम्मो उप्पज्जति आरम्मणपच्चया… तीणि (पटिच्चसदिसं).

नोचित्तसहभुं धम्मं पच्चया नोचित्तसहभू धम्मो उप्पज्जति आरम्मणपच्चया…पे… चक्खायतनं पच्चया चक्खुविञ्ञाणं…पे… कायायतनं…पे…. (इमं चित्तसमुट्ठानदुकं पच्चयवारे आरम्मणसदिसं. छन्नम्पि इमेसं पञ्चविञ्ञाणमूला कातब्बा. संखित्तं.)