१. विभङ्गवारो

नहेतुपच्चयो

२४३. चित्तसहभुं धम्मं पटिच्च चित्तसहभू धम्मो उप्पज्जति नहेतुपच्चया – अहेतुकं चित्तसहभुं एकं खन्धं पटिच्च द्वे खन्धा चित्तसहभु चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (एवं नवपि पञ्हा कातब्बा. ‘‘अहेतुक’’न्ति नियामेतब्बं. यथा अनुलोमे लब्भति एवं कातब्बं. तीणि मोहो यथा चित्तसमुट्ठानदुके एवमेव कातब्बा.)

नकम्मपच्चयो

२४४. चित्तसहभुं धम्मं पटिच्च चित्तसहभू धम्मो उप्पज्जति नकम्मपच्चया – चित्तसहभू खन्धे पटिच्च चित्तसहभू चेतना.

नोचित्तसहभुं धम्मं पटिच्च नोचित्तसहभू धम्मो उप्पज्जति नकम्मपच्चया – बाहिरं… आहारसमुट्ठानं… उतुसमुट्ठानं…पे….

नोचित्तसहभुं धम्मं पटिच्च चित्तसहभू धम्मो उप्पज्जति नकम्मपच्चया – चित्तं पटिच्च सम्पयुत्तका चेतना.

चित्तसहभुञ्च नोचित्तसहभुञ्च धम्मं पटिच्च चित्तसहभू धम्मो उप्पज्जति नकम्मपच्चया – चित्तसहभू खन्धे च चित्तञ्च पटिच्च सम्पयुत्तका चेतना.

नझानपच्चयो

२४५. चित्तसहभुं धम्मं पटिच्च चित्तसहभू धम्मो उप्पज्जति नझानपच्चया – पञ्चविञ्ञाणसहगतं…पे….