१. विभङ्गवारो

हेतुपच्चयो

२३९. चित्तसहभुं धम्मं पटिच्च चित्तसहभू धम्मो उप्पज्जति हेतुपच्चया – चित्तसहभुं एकं खन्धं पटिच्च द्वे खन्धा चित्तसहभु चित्तसमुट्ठानञ्च रूपं, द्वे खन्धे…पे… पटिसन्धिक्खणे चित्तसहभुं एकं खन्धं पटिच्च द्वे खन्धा, द्वे खन्धे…पे…. (१)

चित्तसहभुं धम्मं पटिच्च नोचित्तसहभू धम्मो उप्पज्जति हेतुपच्चया – चित्तसहभू खन्धे पटिच्च चित्तं नोचित्तसहभु चित्तसमुट्ठानञ्च रूपं; पटिसन्धिक्खणे चित्तसहभू खन्धे पटिच्च चित्तं कटत्ता च रूपं. (२)

चित्तसहभुं धम्मं पटिच्च चित्तसहभू च नोचित्तसहभू च धम्मा उप्पज्जन्ति हेतुपच्चया – चित्तसहभुं एकं खन्धं पटिच्च द्वे खन्धा चित्तञ्च चित्तसहभु च नोचित्तसहभु च चित्तसमुट्ठानं रूपं, द्वे खन्धे…पे… पटिसन्धिक्खणे चित्तसहभुं एकं खन्धं पटिच्च द्वे खन्धा चित्तञ्च कटत्ता च रूपं, द्वे खन्धे…पे…. (३)

२४०. नोचित्तसहभुं धम्मं पटिच्च नोचित्तसहभू धम्मो उप्पज्जति हेतुपच्चया – चित्तं पटिच्च नोचित्तसहभु चित्तसमुट्ठानं रूपं; पटिसन्धिक्खणे चित्तं पटिच्च कटत्तारूपं, चित्तं पटिच्च वत्थु, वत्थुं पटिच्च चित्तं, एकं महाभूतं…पे… महाभूते पटिच्च नोचित्तसहभु चित्तसमुट्ठानं रूपं कटत्तारूपं उपादारूपं. (१)

नोचित्तसहभुं धम्मं पटिच्च चित्तसहभू धम्मो उप्पज्जति हेतुपच्चया – चित्तं पटिच्च सम्पयुत्तका खन्धा चित्तसहभु चित्तसमुट्ठानञ्च रूपं; पटिसन्धिक्खणे चित्तं पटिच्च सम्पयुत्तका खन्धा, पटिसन्धिक्खणे वत्थुं पटिच्च चित्तसहभू खन्धा, महाभूते पटिच्च चित्तसहभु चित्तसमुट्ठानं रूपं उपादारूपं. (२)

नोचित्तसहभुं धम्मं पटिच्च चित्तसहभू च नोचित्तसहभू च धम्मा उप्पज्जन्ति हेतुपच्चया – चित्तं पटिच्च सम्पयुत्तका खन्धा चित्तसहभु च नोचित्तसहभु च चित्तसमुट्ठानं रूपं; पटिसन्धिक्खणे चित्तं पटिच्च सम्पयुत्तका खन्धा कटत्ता च रूपं, पटिसन्धिक्खणे वत्थुं पटिच्च चित्तञ्च सम्पयुत्तका च खन्धा, महाभूते पटिच्च चित्तसहभु च नोचित्तसहभु च चित्तसमुट्ठानं रूपं उपादारूपं. (३)

२४१. चित्तसहभुञ्च नोचित्तसहभुञ्च धम्मं पटिच्च चित्तसहभू धम्मो उप्पज्जति हेतुपच्चया – चित्तसहभुं एकं खन्धञ्च चित्तञ्च पटिच्च द्वे खन्धा चित्तसहभु चित्तसमुट्ठानञ्च रूपं, द्वे खन्धे च…पे… पटिसन्धिक्खणे चित्तसहभुं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे चित्तसहभुं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे… चित्तसहभू खन्धे च महाभूते च पटिच्च चित्तसहभु चित्तसमुट्ठानं रूपं उपादारूपं. (१)

चित्तसहभुञ्च नोचित्तसहभुञ्च धम्मं पटिच्च नोचित्तसहभू धम्मो उप्पज्जति हेतुपच्चया – चित्तसहभू खन्धे च चित्तञ्च पटिच्च नोचित्तसहभु चित्तसमुट्ठानं रूपं; पटिसन्धिक्खणे चित्तसहभू खन्धे च चित्तञ्च पटिच्च कटत्तारूपं, पटिसन्धिक्खणे चित्तसहभू खन्धे च वत्थुञ्च पटिच्च चित्तं, चित्तसहभू खन्धे च महाभूते च पटिच्च नोचित्तसहभु चित्तसमुट्ठानं रूपं कटत्तारूपं उपादारूपं. (२)

चित्तसहभुञ्च नोचित्तसहभुञ्च धम्मं पटिच्च चित्तसहभू च नोचित्तसहभू च धम्मा उप्पज्जन्ति हेतुपच्चया – चित्तसहभुं एकं खन्धञ्च चित्तञ्च पटिच्च द्वे खन्धा चित्तसहभु च नोचित्तसहभु च चित्तसमुट्ठानं रूपं, द्वे खन्धे च…पे… पटिसन्धिक्खणे चित्तसहभुं एकं खन्धञ्च चित्तञ्च पटिच्च द्वे खन्धा कटत्ता च रूपं, द्वे खन्धे च…पे… पटिसन्धिक्खणे चित्तसहभुं एक खन्धञ्च वत्थुञ्च पटिच्च द्वे खन्धा चित्तञ्च, द्वे खन्धे च…पे… चित्तसहभू खन्धे च महाभूते च पटिच्च कटत्तारूपं उपादारूपं (संखित्तं). (३)