१. विभङ्गवारो

हेतुपच्चयो

२१०. चित्तसमुट्ठानो धम्मो चित्तसमुट्ठानस्स धम्मस्स हेतुपच्चयेन पच्चयो – चित्तसमुट्ठाना हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

चित्तसमुट्ठानो धम्मो नोचित्तसमुट्ठानस्स धम्मस्स हेतुपच्चयेन पच्चयो – चित्तसमुट्ठाना हेतू चित्तस्स हेतुपच्चयेन पच्चयो; पटिसन्धिक्खणे चित्तसमुट्ठाना हेतू चित्तस्स कटत्ता च रूपानं हेतुपच्चयेन पच्चयो. (२)

चित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स हेतुपच्चयेन पच्चयो – चित्तसमुट्ठाना हेतू सम्पयुत्तकानं खन्धानं चित्तस्स च चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

२११. चित्तसमुट्ठानो धम्मो चित्तसमुट्ठानस्स धम्मस्स आरम्मणपच्चयेन पच्चयो – चित्तसमुट्ठाने खन्धे आरब्भ चित्तसमुट्ठाना खन्धा उप्पज्जन्ति. (मूलं कातब्बं) चित्तसमुट्ठाने खन्धे आरब्भ चित्तं उप्पज्जति. (मूलं कातब्बं) चित्तसमुट्ठाने खन्धे आरब्भ चित्तसमुट्ठाना खन्धा च चित्तञ्च उप्पज्जन्ति. (३)

२१२. नोचित्तसमुट्ठानो धम्मो नोचित्तसमुट्ठानस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, फलं…पे… निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; चक्खुं…पे… वत्थुं नोचित्तसमुट्ठाने खन्धे अनिच्चतो…पे… विपस्सति, अस्सादेति अभिनन्दति, तं आरब्भ चित्तं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नोचित्तसमुट्ठानचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं…पे… रूपायतनं चक्खुविञ्ञाणस्स…पे… फोट्ठब्बायतनं…पे… नोचित्तसमुट्ठाना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोचित्तसमुट्ठानो धम्मो चित्तसमुट्ठानस्स धम्मस्स आरम्मणपच्चयेन पच्चयो – अरिया मग्गा…पे… निब्बानं पच्चवेक्खन्ति (पठमगमनसदिसं); चक्खुं…पे… वत्थुं नोचित्तसमुट्ठाने खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति…पे… रूपायतनं चक्खुविञ्ञाणसहगतानं खन्धानं…पे… फोट्ठब्बायतनं…पे… नोचित्तसमुट्ठाना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स आरम्मणपच्चयेन पच्चयो – अरिया मग्गा…पे… निब्बानं पच्चवेक्खन्ति (पठमगमनसदिसं), नोचित्तसमुट्ठाने खन्धे अनिच्चतो…पे… विपस्सति अस्सादेति अभिनन्दति, तं आरब्भ चित्तञ्च सम्पयुत्तका च खन्धा उप्पज्जन्ति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स सम्पयुत्तकानञ्च खन्धानं…पे… फोट्ठब्बायतनं…पे… नोचित्तसमुट्ठाना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स अनागतंसञाणस्स, आवज्जनाय आरम्मणपच्चयेन पच्चयो. (३)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स आरम्मणपच्चयेन पच्चयो… तीणि (आरब्भ कातब्बा).

अधिपतिपच्चयो

२१३. चित्तसमुट्ठानो धम्मो चित्तसमुट्ठानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – चित्तसमुट्ठाने खन्धे गरुं कत्वा चित्तसमुट्ठाना खन्धा उप्पज्जन्ति. सहजाताधिपति – चित्तसमुट्ठानाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो (तीणिपि आरम्मणाधिपति, सहजाताधिपतिपि कातब्बा). (३)

नोचित्तसमुट्ठानो धम्मो नोचित्तसमुट्ठानस्स धम्मस्स अधिपतिपच्चयेन पच्चयो – आरम्मणाधिपति – अरिया मग्गा…पे… निब्बानं गरुं कत्वा…पे… नोचित्तसमुट्ठाने खन्धे गरुं कत्वा अस्सादेति अभिनन्दति, तं गरुं कत्वा चित्तं उप्पज्जति. (१)

नोचित्तसमुट्ठानो धम्मो चित्तसमुट्ठानस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा…पे… निब्बानं गरुं कत्वा पच्चवेक्खन्ति…पे… नोचित्तसमुट्ठाने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोचित्तसमुट्ठानाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स अधिपतिपच्चयेन पच्चयो. आरम्मणाधिपति – अरिया मग्गा…पे… निब्बानं गरुं कत्वा पच्चवेक्खन्ति…पे… नोचित्तसमुट्ठाने खन्धे गरुं कत्वा…पे… चित्तञ्च सम्पयुत्तका च खन्धा उप्पज्जन्ति. (३)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स अधिपतिपच्चयेन पच्चयो – आरम्मणाधिपति… तीणि (आरम्मणाधिपतियेव).

अनन्तर-समनन्तरपच्चया

२१४. चित्तसमुट्ठानो धम्मो चित्तसमुट्ठानस्स धम्मस्स अनन्तरपच्चयेन पच्चयो… तीणि (वुट्ठानं नत्थि).

नोचित्तसमुट्ठानो धम्मो नोचित्तसमुट्ठानस्स धम्मस्स अनन्तरपच्चयेन पच्चयो – पुरिमं पुरिमं चित्तं पच्छिमस्स पच्छिमस्स…पे… निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो (इतरे द्वे गणना, इमस्स सदिसायेव कातब्बा).

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स अनन्तरपच्चयेन पच्चयो (तीणि कातब्बा, वुट्ठानं नत्थि)… समनन्तरपच्चयेन पच्चयो.

सहजातपच्चयादि

२१५. चित्तसमुट्ठानो धम्मो चित्तसमुट्ठानस्स धम्मस्स सहजातपच्चयेन पच्चयो (पटिच्चवारसदिसं)… अञ्ञमञ्ञपच्चयेन पच्चयो (पटिच्चवारसदिसं)… निस्सयपच्चयेन पच्चयो (पच्चयवारसदिसं).

उपनिस्सयपच्चयो

२१६. चित्तसमुट्ठानो धम्मो चित्तसमुट्ठानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – (तीणि पञ्हा कातब्बा). (३)

नोचित्तसमुट्ठानो धम्मो नोचित्तसमुट्ठानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – उतुं… भोजनं… सेनासनं चित्तं उपनिस्साय दानं देति…पे… सङ्घं भिन्दति; उतु… भोजनं… सेनासनं चित्तं चित्तस्स उपनिस्सयपच्चयेन पच्चयो. (१)

नोचित्तसमुट्ठानो धम्मो चित्तसमुट्ठानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – उतुं… भोजनं… सेनासनं चित्तं उपनिस्साय दानं देति…पे… सङ्घं भिन्दति; उतु… भोजनं… सेनासनं चित्तं सद्धाय…पे… मग्गस्स फलसमापत्तिया उपनिस्सयपच्चयेन पच्चयो. (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – उतुं… भोजनं… सेनासनं चित्तं उपनिस्साय दानं देति…पे… सङ्घं भिन्दति; उतु… भोजनं… सेनासनं चित्तं चित्तसमुट्ठानानं खन्धानं चित्तस्स च उपनिस्सयपच्चयेन पच्चयो. (३)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो… तीणि.

पुरेजातपच्चयो

२१७. चित्तसमुट्ठानो धम्मो चित्तसमुट्ठानस्स धम्मस्स पुरेजातपच्चयेन पच्चयो. आरम्मणपुरेजातं – चित्तसमुट्ठाने रूपे…पे… फोट्ठब्बे अनिच्चतो…पे… विपस्सति…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणसहगतानं खन्धानं पुरेजातपच्चयेन पच्चयो…पे… फोट्ठब्बायतनं कायविञ्ञाणसहगतानं खन्धानं पुरेजातपच्चयेन पच्चयो. (१)

चित्तसमुट्ठानो धम्मो नोचित्तसमुट्ठानस्स धम्मस्स पुरेजातपच्चयेन पच्चयो. आरम्मणपुरेजातं – चित्तसमुट्ठाने रूपे…पे… फोट्ठब्बे अनिच्चतो…पे… विपस्सति अस्सादेति अभिनन्दति, तं आरब्भ चित्तं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. (२)

चित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स पुरेजातपच्चयेन पच्चयो. आरम्मणपुरेजातं – चित्तसमुट्ठाने रूपे…पे… फोट्ठब्बे अनिच्चतो…पे… विपस्सति अस्सादेति अभिनन्दति, तं आरब्भ चित्तञ्च सम्पयुत्तका च खन्धा उप्पज्जन्ति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स सम्पयुत्तकानञ्च खन्धानं पुरेजातपच्चयेन पच्चयो…पे… फोट्ठब्बायतनं…पे…. (३)

२१८. नोचित्तसमुट्ठानो धम्मो नोचित्तसमुट्ठानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… कायं, रूपे…पे… फोट्ठब्बे वत्थुं अनिच्चतो…पे… तं आरब्भ चित्तं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं …पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं…पे… वत्थु चित्तस्स पुरेजातपच्चयेन पच्चयो. (१)

नोचित्तसमुट्ठानो धम्मो चित्तसमुट्ठानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणसहगतानं खन्धानं…पे… फोट्ठब्बायतनं…पे…. वत्थुपुरेजातं – चक्खायतनं चक्खुविञ्ञाणसहगतानं खन्धानं…पे… कायायतनं…पे… वत्थु चित्तसमुट्ठानानं खन्धानं पुरेजातपच्चयेन पच्चयो. (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… तं आरब्भ चित्तञ्च सम्पयुत्तका च खन्धा उप्पज्जन्ति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स सम्पयुत्तकानञ्च खन्धानं…पे… फोट्ठब्बायतनं…पे…. वत्थुपुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं…पे… कायायतनं…पे… वत्थु चित्तस्स सम्पयुत्तकानञ्च खन्धानं पुरेजातपच्चयेन पच्चयो. (३)

२१९. चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. चित्तसमुट्ठानं रूपायतनञ्च चक्खायतनञ्च चक्खुविञ्ञाणसहगतानं खन्धानं …पे… चित्तसमुट्ठानं फोट्ठब्बायतनञ्च कायायतनञ्च कायविञ्ञाणसहगतानं खन्धानं पुरेजातपच्चयेन पच्चयो; चित्तसमुट्ठानं रूपायतनञ्च वत्थु च चित्तसमुट्ठानानं खन्धानं पुरेजातपच्चयेन पच्चयो…पे… चित्तसमुट्ठानं फोट्ठब्बायतनञ्च वत्थु च…पे…. (१)

चित्तसमुट्ठानो च नोचित्तसमुट्ठानो च धम्मा नोचित्तसमुट्ठानस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. चित्तसमुट्ठानं रूपायतनञ्च चक्खायतनञ्च चक्खुविञ्ञाणस्स…पे… चित्तसमुट्ठानं फोट्ठब्बायतनञ्च कायायतनञ्च कायविञ्ञाणस्स पुरेजातपच्चयेन पच्चयो; चित्तसमुट्ठानं रूपायतनञ्च वत्थु च चित्तस्स पुरेजातपच्चयेन पच्चयो…पे… चित्तसमुट्ठानं फोट्ठब्बायतनञ्च वत्थु च…पे…. (२)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स च नोचित्तसमुट्ठानस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. चित्तसमुट्ठानं रूपायतनञ्च चक्खायतनञ्च चक्खुविञ्ञाणस्स सम्पयुत्तकानञ्च खन्धानं पुरेजातपच्चयेन पच्चयो…पे… चित्तसमुट्ठानं फोट्ठब्बायतनं च…पे… चित्तसमुट्ठानं रूपायतनञ्च वत्थु च चित्तस्स सम्पयुत्तकानञ्च खन्धानं पुरेजातपच्चयेन पच्चयो…पे… चित्तसमुट्ठानं फोट्ठब्बायतनञ्च वत्थु च…पे…. (३)

पच्छाजातासेवनपच्चया

२२०. चित्तसमुट्ठानो धम्मो चित्तसमुट्ठानस्स धम्मस्स पच्छाजातपच्चयेन पच्चयो – पच्छाजाता चित्तसमुट्ठाना खन्धा पुरेजातस्स इमस्स चित्तसमुट्ठानस्स कायस्स पच्छाजातपच्चयेन पच्चयो (इमिनाकारेनेव पच्छाजातो वित्थारेतब्बो)… आसेवनपच्चयेन पच्चयो… नव.

कम्म-विपाकपच्चया

२२१. चित्तसमुट्ठानो धम्मो चित्तसमुट्ठानस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसमुट्ठाना चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसमुट्ठाना चेतना विपाकानं खन्धानं कम्मपच्चयेन पच्चयो. (१)

चित्तसमुट्ठानो धम्मो नोचित्तसमुट्ठानस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसमुट्ठाना चेतना चित्तस्स कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसमुट्ठाना चेतना विपाकस्स चित्तस्स कटत्ता च रूपानं कम्मपच्चयेन पच्चयो. (२)

चित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – चित्तसमुट्ठाना चेतना सम्पयुत्तकानं खन्धानं चित्तस्स च चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चित्तसमुट्ठाना चेतना विपाकानं खन्धानं चित्तस्स च कटत्ता च रूपानं कम्मपच्चयेन पच्चयो. (३)

चित्तसमुट्ठानो धम्मो चित्तसमुट्ठानस्स धम्मस्स विपाकपच्चयेन पच्चयो… नव.

आहारपच्चयो

२२२. चित्तसमुट्ठानो धम्मो चित्तसमुट्ठानस्स धम्मस्स आहारपच्चयेन पच्चयो – चित्तसमुट्ठाना आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे…. (मूलं कातब्बं) चित्तसमुट्ठाना आहारा चित्तस्स आहारपच्चयेन पच्चयो; पटिसन्धिक्खणे…पे… चित्तसमुट्ठानो कबळीकारो आहारो इमस्स नोचित्तसमुट्ठानस्स कायस्स आहारपच्चयेन पच्चयो. (मूलं कातब्बं) चित्तसमुट्ठाना आहारा सम्पयुत्तकानं खन्धानं चित्तस्स च चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे…. (३)

२२३. नोचित्तसमुट्ठानो धम्मो नोचित्तसमुट्ठानस्स धम्मस्स आहारपच्चयेन पच्चयो – पटिसन्धिक्खणे नोचित्तसमुट्ठाना आहारा कटत्तारूपानं आहारपच्चयेन पच्चयो; नोचित्तसमुट्ठानो कबळीकारो आहारो इमस्स नोचित्तसमुट्ठानस्स कायस्स आहारपच्चयेन पच्चयो. (मूलं कातब्बं) नोचित्तसमुट्ठाना आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे…. (मूलं कातब्बं) पटिसन्धिक्खणे नोचित्तसमुट्ठाना आहारा सम्पयुत्तकानं खन्धानं कटत्ता च रूपानं आहारपच्चयेन पच्चयो. (३)

२२४. चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स आहारपच्चयेन पच्चयो – चित्तसमुट्ठाना च नोचित्तसमुट्ठाना च आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे…. (मूलं कातब्बं) पटिसन्धिक्खणे चित्तसमुट्ठाना च नोचित्तसमुट्ठाना च आहारा कटत्तारूपानं आहारपच्चयेन पच्चयो; चित्तसमुट्ठानो च नोचित्तसमुट्ठानो च कबळीकारो आहारो इमस्स नोचित्तसमुट्ठानस्स कायस्स आहारपच्चयेन पच्चयो. (मूलं कातब्बं) पटिसन्धिक्खणे चित्तसमुट्ठाना च नोचित्तसमुट्ठाना च आहारा सम्पयुत्तकानं खन्धानं कटत्ता च रूपानं आहारपच्चयेन पच्चयो. (३)

इन्द्रियपच्चयादि

२२५. चित्तसमुट्ठानो धम्मो चित्तसमुट्ठानस्स धम्मस्स इन्द्रियपच्चयेन पच्चयो… तीणि.

नोचित्तसमुट्ठानो धम्मो नोचित्तसमुट्ठानस्स धम्मस्स इन्द्रियपच्चयेन पच्चयो – पटिसन्धिक्खणे नोचित्तसमुट्ठाना इन्द्रिया कटत्तारूपानं इन्द्रियपच्चयेन पच्चयो; पटिसन्धिक्खणे…पे… चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स…पे… रूपजीवितिन्द्रियं कटत्तारूपानं इन्द्रियपच्चयेन पच्चयो. (मूलं कातब्बं) नोचित्तसमुट्ठाना इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो; पटिसन्धिक्खणे…पे… चक्खुन्द्रियं चक्खुविञ्ञाणसहगतानं खन्धानं…पे… कायिन्द्रियं…पे…. (मूलं कातब्बं) पटिसन्धिक्खणे नोचित्तसमुट्ठाना इन्द्रिया सम्पयुत्तकानं खन्धानं कटत्ता च रूपानं इन्द्रियपच्चयेन पच्चयो; चक्खुन्द्रियं चक्खुविञ्ञाणस्स चक्खुविञ्ञाणसहगतानञ्च खन्धानं…पे… कायिन्द्रियं…पे…. (३)

२२६. चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स इन्द्रियपच्चयेन पच्चयो – चित्तसमुट्ठाना च नोचित्तसमुट्ठाना च इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो; पटिसन्धिक्खणे…पे… चक्खुन्द्रियञ्च उपेक्खिन्द्रियञ्च चक्खुविञ्ञाणसहगतानं खन्धानं…पे… कायिन्द्रियञ्च सुखिन्द्रियञ्च…पे… कायिन्द्रियञ्च दुक्खिन्द्रियञ्च कायविञ्ञाणसहगतानं खन्धानं इन्द्रियपच्चयेन पच्चयो. (मूलं कातब्बं) पटिसन्धिक्खणे चित्तसमुट्ठाना च नोचित्तसमुट्ठाना च इन्द्रिया कटत्तारूपानं इन्द्रियपच्चयेन पच्चयो; चक्खुन्द्रियञ्च उपेक्खिन्द्रियञ्च चक्खुविञ्ञाणस्स …पे… कायिन्द्रियञ्च…पे…. (मूलं कातब्बं) पटिसन्धिक्खणे चित्तसमुट्ठाना च नोचित्तसमुट्ठाना च इन्द्रिया सम्पयुत्तकानं खन्धानं कटत्ता च रूपानं इन्द्रियपच्चयेन पच्चयो; चक्खुन्द्रियञ्च उपेक्खिन्द्रियञ्च चक्खुविञ्ञाणस्स सम्पयुत्तकानञ्च खन्धानं इन्द्रियपच्चयेन पच्चयो; कायिन्द्रियं च…पे…. (३)

झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… पञ्च…पे….

विप्पयुत्तपच्चयो

२२७. चित्तसमुट्ठानो धम्मो चित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

चित्तसमुट्ठानो धम्मो नोचित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजातं – पटिसन्धिक्खणे (संखित्तं). (२)

चित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स विप्पयुत्तपच्चयेन पच्चयो… पच्छाजातं (संखित्तं). (३)

२२८. नोचित्तसमुट्ठानो धम्मो नोचित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजातं – पटिसन्धिक्खणे चित्तं कटत्ता रूपानं विप्पयुत्तपच्चयेन पच्चयो, चित्तं वत्थुस्स विप्पयुत्तपच्चयेन पच्चयो, वत्थु चित्तस्स विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु चित्तस्स विप्पयुत्तपच्चयेन पच्चयो. पच्छाजाता – नोचित्तसमुट्ठाना खन्धा पुरेजातस्स इमस्स नोचित्तसमुट्ठानस्स कायस्स विप्पयुत्तपच्चयेन पच्चयो. (१)

नोचित्तसमुट्ठानो धम्मो चित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). (३)

२२९. चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

चित्तसमुट्ठानो च नोचित्तसमुट्ठानो च धम्मा नोचित्तसमुट्ठानस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (२)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स च नोचित्तसमुट्ठानस्स च धम्मस्स विप्पयुत्तपच्चयेन पच्चयो… पच्छाजातं (संखित्तं). (३)

अत्थिपच्चयादि

२३०. चित्तसमुट्ठानो धम्मो चित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं (संखित्तं). (१)

चित्तसमुट्ठानो धम्मो नोचित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं (संखित्तं). (२)

चित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स अत्थिपच्चयेन पच्चयो – सहजातं, पुरेजातं, पच्छाजातं (संखित्तं). (३)

नोचित्तसमुट्ठानो धम्मो नोचित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नोचित्तसमुट्ठानो धम्मो चित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं (संखित्तं). (२)

नोचित्तसमुट्ठानो धम्मो चित्तसमुट्ठानस्स च नोचित्तसमुट्ठानस्स च धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं (संखित्तं). (३)

२३१. चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं. सहजातो – चक्खुविञ्ञाणसहगतो एको खन्धो…पे… (संखित्तं). (१)

चित्तसमुट्ठानो च नोचित्तसमुट्ठानो च धम्मा नोचित्तसमुट्ठानस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजाता – चक्खुविञ्ञाणसहगता खन्धा च चक्खायतनञ्च चक्खुविञ्ञाणस्स अत्थिपच्चयेन पच्चयो…पे… कायविञ्ञाणसहगता…पे…. सहजाता – चित्तसमुट्ठाना…पे… (पच्चयवारसदिसं पटिसन्धिपि पवत्तिपि कातब्बा सब्बेसम्पि पञ्हानं.) पच्छाजाता – चित्तसमुट्ठाना खन्धा च चित्तञ्च पुरेजातस्स इमस्स नोचित्तसमुट्ठानस्स कायस्स अत्थिपच्चयेन पच्चयो. पच्छाजाता – चित्तसमुट्ठाना खन्धा च चित्तञ्च कबळीकारो आहारो च इमस्स नोचित्तसमुट्ठानस्स कायस्स अत्थिपच्चयेन पच्चयो. पच्छाजाता – चित्तसमुट्ठाना खन्धा च चित्तञ्च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

चित्तसमुट्ठानो च नोचित्तसमुट्ठानो च धम्मा चित्तसमुट्ठानस्स च नोचित्तसमुट्ठानस्स च धम्मस्स अत्थिपच्चयेन पच्चयो – सहजातं, पुरेजातं, पच्छाजातं. सहजातो – चक्खुविञ्ञाणसहगतो…पे… (संखित्तं). (३)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.