१. विभङ्गवारो

हेतुपच्चयो

२०१. चित्तसमुट्ठानं धम्मं पच्चया चित्तसमुट्ठानो धम्मो उप्पज्जति हेतुपच्चया… तीणि (पटिच्चवारसदिसं).

नोचित्तसमुट्ठानं धम्मं पच्चया नोचित्तसमुट्ठानो धम्मो उप्पज्जति हेतुपच्चया – वत्थुं पच्चया चित्तं; पटिसन्धिक्खणे…पे… (पटिच्चवारसदिसा). (१)

नोचित्तसमुट्ठानं धम्मं पच्चया चित्तसमुट्ठानो धम्मो उप्पज्जति हेतुपच्चया – चित्तं पच्चया सम्पयुत्तका खन्धा चित्तसमुट्ठानञ्च रूपं, वत्थुं पच्चया चित्तसमुट्ठाना खन्धा (पटिसन्धिक्खणे द्वेपि कातब्बा). (१)

नोचित्तसमुट्ठानं धम्मं पच्चया चित्तसमुट्ठानो च नोचित्तसमुट्ठानो च धम्मा उप्पज्जन्ति हेतुपच्चया – वत्थुं पच्चया चित्तं सम्पयुत्तका च खन्धा; पटिसन्धिक्खणे द्वे (पटिच्चवारसदिसं). (३)

२०२. चित्तसमुट्ठानञ्च नोचित्तसमुट्ठानञ्च धम्मं पच्चया चित्तसमुट्ठानो धम्मो उप्पज्जति हेतुपच्चया – चित्तसमुट्ठानं एकं खन्धञ्च चित्तञ्च पच्चया द्वे खन्धा, द्वे खन्धे…पे… चित्तसमुट्ठानं एकं खन्धञ्च वत्थुञ्च पच्चया द्वे खन्धा, द्वे खन्धे…पे… (पटिसन्धिक्खणे द्वेपि पटिच्चवारसदिसा). (१)

चित्तसमुट्ठानञ्च नोचित्तसमुट्ठानञ्च धम्मं पच्चया नोचित्तसमुट्ठानो धम्मो उप्पज्जति हेतुपच्चया – चित्तसमुट्ठाने खन्धे च वत्थुञ्च पच्चया चित्तं (पटिसन्धिक्खणे तीणिपि कातब्बा पटिच्चवारसदिसा). (२)

चित्तसमुट्ठानञ्च नोचित्तसमुट्ठानञ्च धम्मं पच्चया चित्तसमुट्ठानो च नोचित्तसमुट्ठानो च धम्मा उप्पज्जन्ति हेतुपच्चया – चित्तसमुट्ठानं एकं खन्धञ्च वत्थुञ्च पच्चया द्वे खन्धा चित्तञ्च, द्वे खन्धे…पे… (पटिसन्धिक्खणे द्वेपि कातब्बा पटिच्चवारसदिसा). (३)

आरम्मणपच्चयो

२०३. चित्तसमुट्ठानं धम्मं पच्चया चित्तसमुट्ठानो धम्मो उप्पज्जति आरम्मणपच्चया… तीणि (पटिच्चवारसदिसा).

नोचित्तसमुट्ठानं धम्मं पच्चया नोचित्तसमुट्ठानो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं…पे… वत्थुं पच्चया चित्तं. (१)

नोचित्तसमुट्ठानं धम्मं पच्चया चित्तसमुट्ठानो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणसहगता खन्धा…पे… कायायतनं पच्चया कायविञ्ञाणसहगता खन्धा, चित्तं पच्चया सम्पयुत्तका खन्धा, वत्थुं पच्चया चित्तसमुट्ठाना खन्धा (पटिसन्धिक्खणे द्वेपि). (२)

नोचित्तसमुट्ठानं धम्मं पच्चया चित्तसमुट्ठानो च नोचित्तसमुट्ठानो च धम्मा उप्पज्जन्ति आरम्मणपच्चया – चक्खायतनं पच्चया चक्खुविञ्ञाणं सम्पयुत्तका च खन्धा…पे… कायायतनं…पे… वत्थुं पच्चया चित्तं सम्पयुत्तका च खन्धा; पटिसन्धिक्खणे…पे…. (३)

२०४. चित्तसमुट्ठानञ्च नोचित्तसमुट्ठानञ्च धम्मं पच्चया चित्तसमुट्ठानो धम्मो उप्पज्जति आरम्मणपच्चया – चित्तसमुट्ठानं एकं खन्धञ्च चित्तञ्च पच्चया द्वे खन्धा, द्वे खन्धे …पे… चित्तसमुट्ठानं एकं खन्धञ्च वत्थुञ्च पच्चया द्वे खन्धा, द्वे खन्धे…पे… (पटिसन्धिक्खणे द्वेपि कातब्बा). (१)

चित्तसमुट्ठानञ्च नोचित्तसमुट्ठानञ्च धम्मं पच्चया नोचित्तसमुट्ठानो धम्मो उप्पज्जति आरम्मणपच्चया – चक्खुविञ्ञाणसहगते खन्धे च चक्खायतनञ्च पच्चया चक्खुविञ्ञाणं…पे… कायविञ्ञाणसहगते…पे… चित्तसमुट्ठाने खन्धे च वत्थुञ्च पच्चया चित्तं; पटिसन्धिक्खणे…पे…. (२)

चित्तसमुट्ठानञ्च नोचित्तसमुट्ठानञ्च धम्मं पच्चया चित्तसमुट्ठानो च नोचित्तसमुट्ठानो च धम्मा उप्पज्जन्ति आरम्मणपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया द्वे खन्धा चक्खुविञ्ञाणञ्च, द्वे खन्धे…पे… कायविञ्ञाणसहगतं…पे… चित्तसमुट्ठानं एकं खन्धञ्च वत्थुञ्च पच्चया द्वे खन्धा चित्तञ्च, द्वे खन्धे…पे… पटिसन्धिक्खणे…पे…. (३) (संखित्तं).