१. विभङ्गवारो

नहेतुपच्चयो

१४९. चित्तसम्पयुत्तं धम्मं पटिच्च चित्तसम्पयुत्तो धम्मो उप्पज्जति नहेतुपच्चया – अहेतुकं चित्तसम्पयुत्तं एकं खन्धं पटिच्च द्वे खन्धा, द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

(एवं नवपि पञ्हा कातब्बा. अहेतुकन्ति सब्बत्थ नियामेतब्बं, एकंयेव मोहं मूलपदे.)

नआरम्मणपच्चयो

१५०. चित्तसम्पयुत्तं धम्मं पटिच्च चित्तविप्पयुत्तो धम्मो उप्पज्जति नआरम्मणपच्चया – चित्तसम्पयुत्ते खन्धे पटिच्च चित्तसमुट्ठानं रूपं; पटिसन्धिक्खणे…पे…. (१)

चित्तविप्पयुत्तं धम्मं पटिच्च चित्तविप्पयुत्तो धम्मो उप्पज्जति नआरम्मणपच्चया – एकं महाभूतं…पे… (याव असञ्ञसत्ता). (१)

चित्तसम्पयुत्तञ्च चित्तविप्पयुत्तञ्च धम्मं पटिच्च चित्तविप्पयुत्तो धम्मो उप्पज्जति नआरम्मणपच्चया – चित्तसम्पयुत्ते खन्धे च महाभूते च पटिच्च चित्तसमुट्ठानं रूपं; पटिसन्धिक्खणे एकं (संखित्तं). (१)