१. विभङ्गवारो

हेतुपच्चयो

१४४. चित्तसम्पयुत्तं धम्मं पटिच्च चित्तसम्पयुत्तो धम्मो उप्पज्जति हेतुपच्चया – चित्तसम्पयुत्तं एकं खन्धं पटिच्च द्वे खन्धा, द्वे खन्धे पटिच्च एको खन्धो; पटिसन्धिक्खणे…पे…. (१)

चित्तसम्पयुत्तं धम्मं पटिच्च चित्तविप्पयुत्तो धम्मो उप्पज्जति हेतुपच्चया – चित्तसम्पयुत्ते खन्धे पटिच्च चित्तसमुट्ठानं रूपं; पटिसन्धिक्खणे…पे…. (२)

चित्तसम्पयुत्तं धम्मं पटिच्च चित्तसम्पयुत्तो च चित्तविप्पयुत्तो च धम्मा उप्पज्जन्ति हेतुपच्चया – चित्तसम्पयुत्तं एकं खन्धं पटिच्च द्वे खन्धा चित्तसमुट्ठानञ्च रूपं, द्वे खन्धे…पे… पटिसन्धिक्खणे…पे…. (३)

१४५. चित्तविप्पयुत्तं धम्मं पटिच्च चित्तविप्पयुत्तो धम्मो उप्पज्जति हेतुपच्चया – एकं महाभूतं…पे… महाभूते पटिच्च चित्तसमुट्ठानं रूपं…पे… पटिसन्धिक्खणे…पे… एकं महाभूतं…पे… महाभूते पटिच्च कटत्तारूपं उपादारूपं. (१)

चित्तविप्पयुत्तं धम्मं पटिच्च चित्तसम्पयुत्तो धम्मो उप्पज्जति हेतुपच्चया – पटिसन्धिक्खणे वत्थुं पटिच्च चित्तसम्पयुत्तका खन्धा. (२)

चित्तविप्पयुत्तं धम्मं पटिच्च चित्तसम्पयुत्तो च चित्तविप्पयुत्तो च धम्मा उप्पज्जन्ति हेतुपच्चया – पटिसन्धिक्खणे वत्थुं पटिच्च चित्तसम्पयुत्तका खन्धा, महाभूते पटिच्च कटत्तारूपं. (३)

१४६. चित्तसम्पयुत्तञ्च चित्तविप्पयुत्तञ्च धम्मं पटिच्च चित्तसम्पयुत्तो धम्मो उप्पज्जति हेतुपच्चया – पटिसन्धिक्खणे चित्तसम्पयुत्तं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे…. (१)

चित्तसम्पयुत्तञ्च चित्तविप्पयुत्तञ्च धम्मं पटिच्च चित्तविप्पयुत्तो धम्मो उप्पज्जति हेतुपच्चया – चित्तसम्पयुत्ते खन्धे च महाभूते च पटिच्च चित्तसमुट्ठानं रूपं; पटिसन्धिक्खणे चित्तसम्पयुत्ते खन्धे च महाभूते च पटिच्च कटत्तारूपं. (२)

चित्तसम्पयुत्तञ्च चित्तविप्पयुत्तञ्च धम्मं पटिच्च चित्तसम्पयुत्तो च चित्तविप्पयुत्तो च धम्मा उप्पज्जन्ति हेतुपच्चया – पटिसन्धिक्खणे चित्तसम्पयुत्तं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे… चित्तसम्पयुत्ते खन्धे च महाभूते च पटिच्च कटत्तारूपं. (३)

आरम्मणपच्चयो

१४७. चित्तसम्पयुत्तं धम्मं पटिच्च चित्तसम्पयुत्तो धम्मो उप्पज्जति आरम्मणपच्चया – चित्तसम्पयुत्तं एकं खन्धं पटिच्च द्वे खन्धा, द्वे खन्धे…पे… पटिसन्धिक्खणे…पे…. (१)

चित्तविप्पयुत्तं धम्मं पटिच्च चित्तसम्पयुत्तो धम्मो उप्पज्जति आरम्मणपच्चया – पटिसन्धिक्खणे वत्थुं पटिच्च चित्तसम्पयुत्तका खन्धा. (१)

चित्तसम्पयुत्तञ्च चित्तविप्पयुत्तञ्च धम्मं पटिच्च चित्तसम्पयुत्तो धम्मो उप्पज्जति आरम्मणपच्चया – पटिसन्धिक्खणे चित्तसम्पयुत्तं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे… (संखित्तं). (१)