१. विभङ्गवारो

हेतुपच्चयो

११९. चेतसिको धम्मो चेतसिकस्स धम्मस्स हेतुपच्चयेन पच्चयो – चेतसिका हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (१)

चेतसिको धम्मो अचेतसिकस्स धम्मस्स हेतुपच्चयेन पच्चयो – चेतसिका हेतू चित्तस्स चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (२)

चेतसिको धम्मो चेतसिकस्स च अचेतसिकस्स च धम्मस्स हेतुपच्चयेन पच्चयो – चेतसिका हेतू सम्पयुत्तकानं खन्धानं चित्तस्स च चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

१२०. चेतसिको धम्मो चेतसिकस्स धम्मस्स आरम्मणपच्चयेन पच्चयो – चेतसिके खन्धे आरब्भ चेतसिका खन्धा उप्पजन्ति. (मूलं पुच्छितब्बं) चेतसिके खन्धे आरब्भ चित्तं उप्पज्जति. (मूलं पुच्छितब्बं) चेतसिके खन्धे आरब्भ चेतसिका खन्धा च चित्तञ्च उप्पज्जन्ति. (३)

१२१. अचेतसिको धम्मो अचेतसिकस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा…पे… फलं पच्चवेक्खन्ति, निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; चक्खुं…पे… वत्थुं अचेतसिके खन्धे अनिच्चतो…पे… विपस्सति अस्सादेति अभिनन्दति, तं आरब्भ चित्तं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन अचेतसिकचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… अचेतसिका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अचेतसिको धम्मो चेतसिकस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा…पे… निब्बानं पच्चवेक्खन्ति (पठमगमनसदिसं); चक्खुं…पे… वत्थुं अचेतसिके खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन अचेतसिकचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणसहगतानं खन्धानं…पे… फोट्ठब्बायतनं कायविञ्ञाणसहगतानं खन्धानं…पे… अचेतसिका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

अचेतसिको धम्मो चेतसिकस्स च अचेतसिकस्स च धम्मस्स आरम्मणपच्चयेन पच्चयो – अरिया मग्गा वुट्ठहित्वा…पे… निब्बानं पच्चवेक्खन्ति (पठमगमनसदिसं); चक्खुं…पे… वत्थुं अचेतसिके खन्धे अनिच्चतो…पे… विपस्सति अस्सादेति अभिनन्दति, तं आरब्भ चित्तञ्च सम्पयुत्तका च खन्धा उप्पज्जन्ति. दिब्बेन चक्खुना रूपं पस्सति…पे… रूपायतनं चक्खुविञ्ञाणस्स सम्पयुत्तकानञ्च खन्धानं आरम्मणपच्चयेन पच्चयो…पे… फोट्ठब्बायतनं कायविञ्ञाणस्स सम्पयुत्तकानञ्च खन्धानं…पे… अचेतसिका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (३)

१२२. चेतसिको च अचेतसिको च धम्मा चेतसिकस्स धम्मस्स आरम्मणपच्चयेन पच्चयो – चेतसिके खन्धे च चित्तञ्च आरब्भ चेतसिका खन्धा उप्पज्जन्ति. (मूलं पुच्छितब्बं) चेतसिके खन्धे च चित्तञ्च आरब्भ चित्तं उप्पज्जति. (मूलं पुच्छितब्बं) चेतसिके खन्धे च चित्तञ्च आरब्भ चेतसिका खन्धा च चित्तञ्च उप्पज्जन्ति. (३)

अधिपतिपच्चयो

१२३. चेतसिको धम्मो चेतसिकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – चेतसिके खन्धे गरुं कत्वा चेतसिका खन्धा उप्पज्जन्ति. सहजाताधिपति – चेतसिकाधिपति सम्पयुत्तकानं खन्धानं अधिपतिपच्चयेन पच्चयो. (मूलं पुच्छितब्बं) आरम्मणाधिपति – चेतसिके खन्धे गरुं कत्वा चित्तं उप्पज्जति. सहजाताधिपति – चेतसिकाधिपति चित्तस्स चित्तसमुट्ठानानञ्च रूपानं अधिपतिपच्चयेन पच्चयो. (मूलं पुच्छितब्बं ) आरम्मणाधिपति – चेतसिके खन्धे गरुं कत्वा चेतसिका खन्धा च चित्तञ्च उप्पज्जन्ति. सहजाताधिपति – चेतसिकाधिपति सम्पयुत्तकानं खन्धानं चित्तस्स च चित्तसमुट्ठानानञ्च रूपानं अधिपतिपच्चयेन पच्चयो. (३)

१२४. अचेतसिको धम्मो अचेतसिकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा…पे… निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स. मग्गस्स, फलस्स अधिपतिपच्चयेन पच्चयो; चक्खुं …पे… वत्थुं अचेतसिके खन्धे गरुं कत्वा अस्सादेति अभिनन्दति, तं गरुं कत्वा चित्तं उप्पज्जति. सहजाताधिपति – अचेतसिकाधिपति चित्तसमुट्ठानानं रूपानं अधिपतिपच्चयेन पच्चयो. (१)

अचेतसिको धम्मो चेतसिकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा…पे… निब्बानं गरुं कत्वा…पे… (पठमगमनसदिसं); चक्खुं…पे… वत्थुं अचेतसिके खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अचेतसिकाधिपति सम्पयुत्तकानं खन्धानं अधिपतिपच्चयेन पच्चयो. (२)

अचेतसिको धम्मो चेतसिकस्स च अचेतसिकस्स च धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा…पे… निब्बानं…पे… (पठमगमनं) अचेतसिके खन्धे गरुं कत्वा अस्सादेति अभिनन्दति, तं गरुं कत्वा चेतसिका खन्धा च चित्तञ्च उप्पज्जन्ति. सहजाताधिपति – अचेतसिकाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

चेतसिको च अचेतसिको च धम्मा चेतसिकस्स धम्मस्स अधिपतिपच्चयेन पच्चयो – आरम्मणाधिपति… तीणि (आरम्मणाधिपतियेव).

अनन्तरपच्चयादि

१२५. चेतसिको धम्मो चेतसिकस्स धम्मस्स अनन्तरपच्चयेन पच्चयो – पुरिमा पुरिमा चेतसिका खन्धा पच्छिमानं पच्छिमानं चेतसिकानं खन्धानं अनन्तरपच्चयेन पच्चयो. (मूलं पुच्छितब्बं) पुरिमा पुरिमा चेतसिका खन्धा पच्छिमस्स पच्छिमस्स चित्तस्स अनन्तरपच्चयेन पच्चयो. (मूलं पुच्छितब्बं) पुरिमा पुरिमा चेतसिका खन्धा पच्छिमानं पच्छिमानं चेतसिकानं खन्धानं चित्तस्स च अनन्तरपच्चयेन पच्चयो. (३)

१२६. अचेतसिको धम्मो अचेतसिकस्स धम्मस्स अनन्तरपच्चयेन पच्चयो – पुरिमं पुरिमं चित्तं पच्छिमस्स पच्छिमस्स चित्तस्स अनन्तरपच्चयेन पच्चयो; अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

अचेतसिको धम्मो चेतसिकस्स धम्मस्स अनन्तरपच्चयेन पच्चयो (एवं तीणि कातब्बानि, पठमगमनसदिसं. पूरित्वा कातब्बं, निन्नानाकरणं).

चेतसिको च अचेतसिको च धम्मा चेतसिकस्स धम्मस्स अनन्तरपच्चयेन पच्चयो… तीणि (आवज्जनापि वुट्ठानम्पि नत्थि).

समनन्तरपच्चयेन पच्चयो… नव, सहजातपच्चयेन पच्चयो… नव (पटिच्चवारसदिसं), अञ्ञमञ्ञपच्चयेन पच्चयो… नव (पटिच्चवारसदिसं), निस्सयपच्चयेन पच्चयो… नव (पच्चयवारसदिसं).

उपनिस्सयपच्चयो

१२७. चेतसिको धम्मो चेतसिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – चेतसिका खन्धा चेतसिकानं खन्धानं उपनिस्सयपच्चयेन पच्चयो. (मूलं पुच्छितब्बं, तीणि उपनिस्सया) चेतसिका खन्धा चित्तस्स उपनिस्सयपच्चयेन पच्चयो. (मूलं पुच्छितब्बं, तीणि उपनिस्सया) चेतसिका खन्धा चेतसिकानं खन्धानं चित्तस्स च उपनिस्सयपच्चयेन पच्चयो. (३)

१२८. अचेतसिको धम्मो अचेतसिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – उतुं… भोजनं… सेनासनं चित्तं उपनिस्साय दानं देति…पे… सङ्घं भिन्दति; उतुं… भोजनं… सेनासनं चित्तं सद्धाय…पे… पञ्ञाय… रागस्स…पे… पत्थनाय कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

अचेतसिको धम्मो चेतसिकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो पकतूपनिस्सयो…पे…. पकतूपनिस्सयो – उतुं… भोजनं… सेनासनं चित्तं उपनिस्साय दानं देति…पे… (तीणि, पठमगमनसदिसं निन्नानाकरणं).

चेतसिको च अचेतसिको च धम्मा चेतसिकस्स धम्मस्स उपनिस्सयपच्चयेन पच्चयो… तीणि.

पुरेजातपच्चयो

१२९. अचेतसिको धम्मो अचेतसिकस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… विपस्सति अस्सादेति अभिनन्दति, तं आरब्भ चित्तं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु चित्तस्स पुरेजातपच्चयेन पच्चयो. (१)

अचेतसिको धम्मो चेतसिकस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणसहगतानं खन्धानं…पे… फोट्ठब्बायतनं कायविञ्ञाणसहगतानं खन्धानं…पे…. वत्थुपुरेजातं – चक्खायतनं चक्खुविञ्ञाणसहगतानं खन्धानं…पे… कायायतनं…पे… वत्थु चेतसिकानं खन्धानं पुरेजातपच्चयेन पच्चयो. (२)

अचेतसिको धम्मो चेतसिकस्स च अचेतसिकस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… विपस्सति अस्सादेति अभिनन्दति, तं आरब्भ चित्तञ्च सम्पयुत्तका च खन्धा उप्पज्जन्ति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स सम्पयुत्तकानञ्च खन्धानं…पे… फोट्ठब्बायतनं…पे…. वत्थुपुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं…पे… कायायतनं…पे… वत्थु चित्तस्स सम्पयुत्तकानञ्च खन्धानं पुरेजातपच्चयेन पच्चयो. (३)

पच्छाजातासेवनपच्चया

१३०. चेतसिको धम्मो अचेतसिकस्स धम्मस्स पच्छाजातपच्चयेन पच्चयो (संखित्तं).

अचेतसिको धम्मो अचेतसिकस्स धम्मस्स पच्छाजातपच्चयेन पच्चयो (संखित्तं).

चेतसिको च अचेतसिको च धम्मा अचेतसिकस्स धम्मस्स पच्छाजातपच्चयेन पच्चयो (संखित्तं).

चेतसिको धम्मो चेतसिकस्स धम्मस्स आसेवनपच्चयेन पच्चयो (संखित्तं).

कम्मपच्चयो

१३१. चेतसिको धम्मो चेतसिकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चेतसिका चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे…पे…. नानाक्खणिका – चेतसिका चेतना विपाकानं खन्धानं कम्मपच्चयेन पच्चयो. (१)

चेतसिको धम्मो अचेतसिकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – चेतसिका चेतना चित्तस्स चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चेतसिका चेतना विपाकस्स चित्तस्स कटत्ता च रूपानं कम्मपच्चयेन पच्चयो. (२)

चेतसिको धम्मो चेतसिकस्स च अचेतसिकस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – चेतसिका चेतना सम्पयुत्तकानं खन्धानं चित्तस्स च चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – चेतसिका चेतना विपाकानं खन्धानं चित्तस्स कटत्ता च रूपानं कम्मपच्चयेन पच्चयो. (३)

विपाकपच्चयादि

१३२. चेतसिको धम्मो चेतसिकस्स धम्मस्स विपाकपच्चयेन पच्चयो… नव… आहारपच्चयेन पच्चयो… नव… इन्द्रियपच्चयेन पच्चयो… नव… झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… पञ्च.

विप्पयुत्तपच्चयो

१३३. चेतसिको धम्मो अचेतसिकस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

अचेतसिको धम्मो अचेतसिकस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजातं – चित्तं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे चित्तं कटत्तारूपानं विप्पयुत्तपच्चयेन पच्चयो; चित्तं वत्थुस्स विप्पयुत्तपच्चयेन पच्चयो; वत्थु चित्तस्स विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स विप्पयुत्तपच्चयेन पच्चयो…पे… कायायतनं कायविञ्ञाणस्स…पे… वत्थु चित्तस्स विप्पयुत्तपच्चयेन पच्चयो. पच्छाजातं – चित्तं पुरेजातस्स इमस्स कायस्स विप्पयुत्तपच्चयेन पच्चयो. (१)

अचेतसिको धम्मो चेतसिकस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चेतसिकानं खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणसहगतानं खन्धानं…पे… कायायतनं कायविञ्ञाणसहगतानं खन्धानं…पे… वत्थु चेतसिकानं खन्धानं विप्पयुत्तपच्चयेन पच्चयो. (२)

अचेतसिको धम्मो चेतसिकस्स च अचेतसिकस्स च धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चेतसिकानं खन्धानं चित्तस्स च विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं…पे… कायायतनं कायविञ्ञाणस्स सम्पयुत्तकानञ्च खन्धानं…पे… वत्थु चित्तस्स सम्पयुत्तकानञ्च खन्धानं विप्पयुत्तपच्चयेन पच्चयो. (३)

चेतसिको च अचेतसिको च धम्मा अचेतसिकस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं).

अत्थिपच्चयो

१३४. चेतसिको धम्मो चेतसिकस्स धम्मस्स अत्थिपच्चयेन पच्चयो… एकं (पटिच्चवारसदिसं).

चेतसिको धम्मो अचेतसिकस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). (२)

चेतसिको धम्मो चेतसिकस्स च अचेतसिकस्स च धम्मस्स अत्थिपच्चयेन पच्चयो… एकं (पटिच्चवारसदिसं). (३)

१३५. अचेतसिको धम्मो अचेतसिकस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

अचेतसिको धम्मो चेतसिकस्स धम्मस्स अत्थिपच्चयेन पच्चयो – सहजातं, पुरेजातं. सहजातं – चित्तं चेतसिकानं खन्धानं अत्थिपच्चयेन पच्चयो; पटिसन्धिक्खणे चित्तं…पे… पटिसन्धिक्खणे वत्थु चेतसिकानं खन्धानं अत्थिपच्चयेन पच्चयो. पुरेजातं – चक्खुं…पे… वत्थुं अनिच्चतो…पे… (पुरेजातसदिसं निन्नानाकरणं). (२)

अचेतसिको धम्मो चेतसिकस्स च अचेतसिकस्स च धम्मस्स अत्थिपच्चयेन पच्चयो – सहजातं, पुरेजातं. सहजातं – चित्तं सम्पयुत्तकानं खन्धानं चित्तसमुट्ठानानञ्च रूपानं अत्थिपच्चयेन पच्चयो; पटिसन्धिक्खणे चित्तं…पे… पटिसन्धिक्खणे वत्थु चेतसिकानं खन्धानं चित्तस्स च अत्थिपच्चयेन पच्चयो. पुरेजातं – चक्खुं…पे… वत्थुं अनिच्चतो…पे… (पुरेजातसदिसं निन्नानं). (३)

१३६. चेतसिको च अचेतसिको च धम्मा चेतसिकस्स धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च द्विन्नं खन्धानं…पे… कायविञ्ञाणसहगतो…पे… चेतसिको एको खन्धो च वत्थु च द्विन्नं खन्धानं अत्थिपच्चयेन पच्चयो; द्वे खन्धा च…पे…. सहजातो – चेतसिको एको खन्धो च चित्तञ्च द्विन्नं खन्धानं अत्थिपच्चयेन पच्चयो; द्वे खन्धा च…पे… (पटिसन्धिक्खणे) द्वेपि कातब्बा. (१)

चेतसिको च अचेतसिको च धम्मा अचेतसिकस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजाता – चक्खुविञ्ञाणसहगता खन्धा च चक्खायतनञ्च चक्खुविञ्ञाणस्स…पे… कायविञ्ञाणस्स…पे… चेतसिका खन्धा च चित्तञ्च चित्तसमुट्ठानानं रूपानं अत्थिपच्चयेन पच्चयो; चेतसिका खन्धा च चित्तञ्च महाभूता च चित्तसमुट्ठानानं रूपानं अत्थिपच्चयेन पच्चयो. सहजाता – चेतसिका खन्धा च वत्थु च चित्तस्स अत्थिपच्चयेन पच्चयो (पटिसन्धिक्खणे तीणिपि कातब्बा). पच्छाजाता – चेतसिका खन्धा च चित्तञ्च पुरेजातस्स इमस्स कायस्स अत्थिपच्चयेन पच्चयो. पच्छाजाता – चेतसिका खन्धा च चित्तञ्च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – चेतसिका खन्धा च चित्तञ्च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

चेतसिको च अचेतसिको च धम्मा चेतसिकस्स च अचेतसिकस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च द्विन्नं खन्धानं चक्खुविञ्ञाणस्स च अत्थिपच्चयेन पच्चयो…पे… कायविञ्ञाणसहगतो एको खन्धो च कायायतनञ्च द्विन्नं खन्धानं कायविञ्ञाणस्स च अत्थिपच्चयेन पच्चयो; द्वे खन्धा च…पे…. सहजातो – चेतसिको एको खन्धो च वत्थु च द्विन्नं खन्धानं चित्तस्स च अत्थिपच्चयेन पच्चयो; द्वे खन्धा च…पे… (पटिसन्धिया द्वे कातब्बा). (३)