१. विभङ्गवारो

नहेतुपच्चयो

३६. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नहेतुपच्चया – अहेतुकं उपादिन्नुपादानियं एकं खन्धं पच्चया…पे… अहेतुकपटिसन्धिक्खणे…पे… असञ्ञसत्तानं एकं महाभूतं…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं; वत्थुं पच्चया अहेतुका उपादिन्नुपादानिया खन्धा. (१)

उपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नहेतुपच्चया – अहेतुके उपादिन्नुपादानिये खन्धे पच्चया चित्तसमुट्ठानं रूपं; वत्थुं पच्चया अहेतुका अनुपादिन्नुपादानिया खन्धा; वत्थुं पच्चया विचिकिच्छासहगतो उद्धच्चसहगतो मोहो. (२)

उपादिन्नुपादानियं धम्मं पच्चया उपादिन्नुपादानियो च अनुपादिन्नुपादानियो च धम्मा उप्पज्जन्ति नहेतुपच्चया – अहेतुकं उपादिन्नुपादानियं एकं खन्धं पच्चया तयो खन्धा चित्तसमुट्ठानञ्च रूपं…पे…. (३)

अनुपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नहेतुपच्चया – अहेतुकं अनुपादिन्नुपादानियं एकं खन्धं पच्चया तयो खन्धा चित्तसमुट्ठानञ्च रूपं…पे… बाहिरं… आहारसमुट्ठानं… उतुसमुट्ठानं एकं महाभूतं…पे… रूपं; विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

उपादिन्नुपादानियञ्च अनुपादिन्नुपादानियञ्च धम्मं पच्चया अनुपादिन्नुपादानियो धम्मो उप्पज्जति नहेतुपच्चया – अहेतुके उपादिन्नुपादानिये खन्धे च महाभूते च पच्चया चित्तसमुट्ठानं रूपं; अहेतुकं अनुपादिन्नुपादानियं एकं खन्धञ्च वत्थुञ्च पच्चया तयो खन्धा…पे… द्वे खन्धे च वत्थुञ्च पच्चया द्वे खन्धा; विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चयो

३७. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नआरम्मणपच्चया (संखित्तं).

नअधिपतिपच्चयो

३८. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नअधिपतिपच्चया – उपादिन्नुपादानियं एकं खन्धं पच्चया…पे…. (१)

उपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नअधिपतिपच्चया – उपादिन्नुपादानिये खन्धे पच्चया चित्तसमुट्ठानं रूपं; वत्थुं पच्चया अनुपादिन्नुपादानिया खन्धा. (२)

उपादिन्नुपादानियं धम्मं पच्चया अनुपादिन्नअनुपादानियो धम्मो उप्पज्जति नअधिपतिपच्चया – वत्थुं पच्चया अनुपादिन्नअनुपादानिया अधिपति. (३)

उपादिन्नुपादानियं धम्मं पच्चया उपादिन्नुपादानियो च अनुपादिन्नुपादानियो च धम्मा उप्पज्जन्ति नअधिपतिपच्चया – उपादिन्नुपादानियं एकं खन्धं पच्चया तयो खन्धा चित्तसमुट्ठानञ्च रूपं…पे…. (४)

अनुपादिन्नुपादानियं धम्मं पच्चया. (एका पञ्हा.)

अनुपादिन्नअनुपादानियं धम्मं पच्चया अनुपादिन्नअनुपादानियो धम्मो उप्पज्जति नअधिपतिपच्चया – अनुपादिन्नअनुपादानिये खन्धे पच्चया अनुपादिन्नअनुपादानिया अधिपति. (१)

उपादिन्नुपादानियञ्च अनुपादिन्नअनुपादानियञ्च धम्मं पच्चया अनुपादिन्नअनुपादानियो धम्मो उप्पज्जति न अधिपतिपच्चया – अनुपादिन्नअनुपादानिये खन्धे च वत्थुञ्च पच्चया अनुपादिन्नअनुपादानिया अधिपति. (१)

उपादिन्नुपादानियञ्च अनुपादिन्नुपादानियञ्च धम्मं पच्चया अनुपादिन्नुपादानियो धम्मो उप्पज्जति नअधिपतिपच्चया – उपादिन्नुपादानिये खन्धे च महाभूते च पच्चया चित्तसमुट्ठानं रूपं; अनुपादिन्नुपादानियं एकं खन्धञ्च वत्थुञ्च पच्चया तयो खन्धा…पे… द्वे खन्धे च वत्थुञ्च पच्चया द्वे खन्धा. (१)

नअनन्तरपच्चयादि

३९. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया… नपच्छाजातपच्चया… नआसेवनपच्चया…पे….

नकम्मपच्चयो

४०. उपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नकम्मपच्चया – वत्थुं पच्चया अनुपादिन्नुपादानिया चेतना. (१)

उपादिन्नुपादानियं धम्मं पच्चया अनुपादिन्नअनुपादानियो धम्मो उप्पज्जति नकम्मपच्चया – वत्थुं पच्चया कुसला अनुपादिन्नअनुपादानिया चेतना. (२)

अनुपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नकम्मपच्चया – अनुपादिन्नुपादानिये खन्धे पच्चया अनुपादिन्नुपादानिया चेतना. बाहिरं… आहारसमुट्ठानं… उतुसमुट्ठानं एकं महाभूतं पच्चया…पे…. (१)

अनुपादिन्नअनुपादानियं धम्मं पच्चया अनुपादिन्नअनुपादानियो धम्मो उप्पज्जति नकम्मपच्चया – कुसले अनुपादिन्नअनुपादानिये खन्धे पच्चया अनुपादिन्नअनुपादानिया चेतना. (१)

उपादिन्नुपादानियञ्च अनुपादिन्नअनुपादानियञ्च धम्मं पच्चया अनुपादिन्नअनुपादानियो धम्मो उप्पज्जति नकम्मपच्चया – कुसले अनुपादिन्नअनुपादानिये खन्धे च वत्थुञ्च पच्चया अनुपादिन्नअनुपादानिया कुसला चेतना. (१)

उपादिन्नुपादानियञ्च अनुपादिन्नुपादानियञ्च धम्मं पच्चया अनुपादिन्नुपादानियो धम्मो उप्पज्जति नकम्मपच्चया – अनुपादिन्नुपादानिये खन्धे च वत्थुञ्च पच्चया अनुपादिन्नुपादानिया चेतना. (१)

नविपाकपच्चयो

४१. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नविपाकपच्चया – असञ्ञसत्तानं एकं महाभूतं पच्चया…पे… (१).

उपादिन्नुपादानियं धम्मं पच्चया अनुपादिन्नुपादानियो धम्मो उप्पज्जति नविपाकपच्चया; वत्थुं पच्चया अनुपादिन्नुपादानिया खन्धा. (२)

उपादिन्नुपादानियं धम्मं पच्चया अनुपादिन्नअनुपादानियो धम्मो उप्पज्जति नविपाकपच्चया – वत्थुं पच्चया कुसला अनुपादिन्नअनुपादानिया खन्धा. (३)

अनुपादिन्नुपादानियं धम्मं पच्चया… एका.

अनुपादिन्नअनुपादानियं धम्मं पच्चया… तीणि.

उपादिन्नुपादानियञ्च अनुपादिन्नअनुपादानियञ्च धम्मं पच्चया अनुपादिन्नअनुपादानियो धम्मो उप्पज्जति नविपाकपच्चया. (संखित्तं.)

अनुपादिन्नुपादानियञ्च अनुपादिन्नअनुपादानियञ्च धम्मं पच्चया अनुपादिन्नुपादानियो धम्मो उप्पज्जति नविपाकपच्चया. (संखित्तं.)

उपादिन्नुपादानियञ्च अनुपादिन्नुपादानियञ्च धम्मं पच्चया अनुपादिन्नुपादानियो धम्मो उप्पज्जति नविपाकपच्चया – अनुपादिन्नुपादानियं एकं खन्धञ्च वत्थुञ्च पच्चया तयो खन्धा…पे… द्वे खन्धे च वत्थुञ्च पच्चया द्वे खन्धा.

नआहारपच्चयादि

४२. उपादिन्नुपादानियं धम्मं पच्चया उपादिन्नुपादानियो धम्मो उप्पज्जति नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया… नविप्पयुत्तपच्चया… नोनत्थिपच्चया… नोविगतपच्चया (संखित्तं).