१. पच्चयानुलोमं

१. विभङ्गवारो

हेतुपच्चयो

२३४. कुसलं धम्मं सहजातो कुसलो धम्मो उप्पज्जति हेतुपच्चया – कुसलं एकं खन्धं सहजाता तयो खन्धा, तयो खन्धे सहजातो एको खन्धो, द्वे खन्धे सहजाता द्वे खन्धा. कुसलं धम्मं सहजातो अब्याकतो धम्मो उप्पज्जति हेतुपच्चया – कुसले खन्धे सहजातं चित्तसमुट्ठानं रूपं. कुसलं धम्मं सहजातो कुसलो च अब्याकतो च धम्मा उप्पज्जन्ति हेतुपच्चया – कुसलं एकं खन्धं सहजाता तयो खन्धा चित्तसमुट्ठानञ्च रूपं, तयो खन्धे सहजातो एको खन्धो चित्तसमुट्ठानञ्च रूपं, द्वे खन्धे सहजाता द्वे खन्धा चित्तसमुट्ठानञ्च रूपं. (३)

२३५. अकुसलं धम्मं सहजातो अकुसलो धम्मो उप्पज्जति हेतुपच्चया – अकुसलं एकं खन्धं सहजाता तयो खन्धा, तयो खन्धे सहजातो एको खन्धो, द्वे खन्धे सहजाता द्वे खन्धा. अकुसलं धम्मं सहजातो अब्याकतो धम्मो उप्पज्जति हेतुपच्चया – अकुसले खन्धे सहजातं चित्तसमुट्ठानं रूपं. अकुसलं धम्मं सहजातो अकुसलो च अब्याकतो च धम्मा उप्पज्जन्ति हेतुपच्चया – अकुसलं एकं खन्धं सहजाता तयो खन्धा चित्तसमुट्ठानञ्च रूपं, तयो खन्धे सहजातो एको खन्धो चित्तसमुट्ठानञ्च रूपं, द्वे खन्धे सहजाता द्वे खन्धा चित्तसमुट्ठानञ्च रूपं. (३)

२३६. अब्याकतं धम्मं सहजातो अब्याकतो धम्मो उप्पज्जति हेतुपच्चया – विपाकाब्याकतं किरियाब्याकतं एकं खन्धं सहजाता तयो खन्धा चित्तसमुट्ठानञ्च रूपं, तयो खन्धे सहजातो एको खन्धो चित्तसमुट्ठानञ्च रूपं, द्वे खन्धे सहजाता द्वे खन्धा चित्तसमुट्ठानञ्च रूपं; पटिसन्धिक्खणे विपाकाब्याकतं एकं खन्धं सहजाता तयो खन्धा कटत्ता च रूपं, तयो खन्धे सहजातो एको खन्धो कटत्ता च रूपं, द्वे खन्धे सहजाता द्वे खन्धा कटत्ता च रूपं; खन्धे सहजातं वत्थु, वत्थुं सहजाता खन्धा; एकं महाभूतं सहजाता तयो महाभूता, तयो महाभूते सहजातं एकं महाभूतं, द्वे महाभूते सहजाता द्वे महाभूता, महाभूते सहजातं चित्तसमुट्ठानं रूपं कटत्तारूपं उपादारूपं. (१)

२३७. कुसलञ्च अब्याकतञ्च धम्मं सहजातो अब्याकतो धम्मो उप्पज्जति हेतुपच्चया – कुसले खन्धे च महाभूते च सहजातं चित्तसमुट्ठानं रूपं. (१)

अकुसलञ्च अब्याकतञ्च धम्मं सहजातो अब्याकतो धम्मो उप्पज्जति हेतुपच्चया – अकुसले खन्धे च महाभूते च सहजातं चित्तसमुट्ठानं रूपं. (१)

(यथा पटिच्चवारे एवं वित्थारेतब्बं.)