(२) पच्चनीयुद्धारो

५२७. कुसलो धम्मो कुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो.

कुसलो धम्मो अकुसलस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो.

कुसलो धम्मो अब्याकतस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो.

कुसलो धम्मो कुसलस्स च अब्याकतस्स च धम्मस्स सहजातपच्चयेन पच्चयो. (४)

५२८. अकुसलो धम्मो अकुसलस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो.

अकुसलो धम्मो कुसलस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो.

अकुसलो धम्मो अब्याकतस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो.

अकुसलो धम्मो अकुसलस्स च अब्याकतस्स च धम्मस्स सहजातपच्चयेन पच्चयो. (४)

५२९. अब्याकतो धम्मो अब्याकतस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो… पच्छाजातपच्चयेन पच्चयो… आहारपच्चयेन पच्चयो… इन्द्रियपच्चयेन पच्चयो.

अब्याकतो धम्मो कुसलस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो.

अब्याकतो धम्मो अकुसलस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो. (३)

५३०. कुसलो च अब्याकतो च धम्मा कुसलस्स धम्मस्स सहजातं, पुरेजातं.

कुसलो च अब्याकतो च धम्मा अब्याकतस्स धम्मस्स सहजातं, पच्छाजातं, आहारं, इन्द्रियं. (२)

५३१. अकुसलो च अब्याकतो च धम्मा अकुसलस्स धम्मस्स सहजातं, पुरेजातं.

अकुसलो च अब्याकतो च धम्मा अब्याकतस्स धम्मस्स सहजातं, पच्छाजातं, आहारं, इन्द्रियं. (२)

पञ्हावारस्स पच्चनीयुद्धारो.