१. विभङ्गवारो

नहेतुपच्चयो

३९६. अकुसलं धम्मं सम्पयुत्तो अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे सम्पयुत्तो विचिकिच्छासहगतो उद्धच्चसहगतो मोहो. (१)

३९७. अब्याकतं धम्मं सम्पयुत्तो अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं सम्पयुत्ता तयो खन्धा, तयो खन्धे सम्पयुत्तो एको खन्धो, द्वे खन्धे सम्पयुत्ता द्वे खन्धा; अहेतुकपटिसन्धिक्खणे विपाकाब्याकतं एकं खन्धं सम्पयुत्ता तयो खन्धा, तयो खन्धे सम्पयुत्तो एको खन्धो, द्वे खन्धे सम्पयुत्ता द्वे खन्धा. (संखित्तं.) (१)