१. विभङ्गवारो

पच्चनीयं – नहेतुपच्चयो

८६. अकुसलं धम्मं पटिच्च अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

अब्याकतं धम्मं पटिच्च अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकाब्याकतं एकं खन्धं पटिच्च तयो खन्धा कटत्ता च रूपं, तयो खन्धे पटिच्च एको खन्धो कटत्ता च रूपं, द्वे खन्धे पटिच्च द्वे खन्धा कटत्ता च रूपं; खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च कटत्तारूपं उपादारूपं. (१)

नआरम्मणपच्चयो

८७. कुसलं धम्मं पटिच्च अब्याकतो धम्मो उप्पज्जति नआरम्मणपच्चया – कुसले खन्धे पटिच्च चित्तसमुट्ठानं रूपं. (१)

अकुसलं धम्मं पटिच्च अब्याकतो धम्मो उप्पज्जति नआरम्मणपच्चया – अकुसले खन्धे पटिच्च चित्तसमुट्ठानं रूपं. (१)

अब्याकतं धम्मं पटिच्च अब्याकतो धम्मो उप्पज्जति नआरम्मणपच्चया – विपाकाब्याकते किरियाब्याकते खन्धे पटिच्च चित्तसमुट्ठानं रूपं; पटिसन्धिक्खणे विपाकाब्याकते खन्धे पटिच्च कटत्तारूपं; खन्धे पटिच्च वत्थु; एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च कटत्तारूपं उपादारूपं. (१)

कुसलञ्च अब्याकतञ्च धम्मं पटिच्च अब्याकतो धम्मो उप्पज्जति नआरम्मणपच्चया – कुसले खन्धे च महाभूते च पटिच्च चित्तसमुट्ठानं रूपं. (१)

अकुसलञ्च अब्याकतञ्च धम्मं पटिच्च अब्याकतो धम्मो उप्पज्जति नआरम्मणपच्चया – अकुसले खन्धे च महाभूते च पटिच्च चित्तसमुट्ठानं रूपं. (१)

नअधिपतिपच्चयो

८८. कुसलं धम्मं पटिच्च कुसलो धम्मो उप्पज्जति नअधिपतिपच्चया – कुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. कुसलं धम्मं पटिच्च अब्याकतो धम्मो उप्पज्जति नअधिपतिपच्चया – कुसले खन्धे पटिच्च चित्तसमुट्ठानं रूपं. कुसलं धम्मं पटिच्च कुसलो च अब्याकतो च धम्मा उप्पज्जन्ति नअधिपतिपच्चया – कुसलं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं. (३)

अकुसलं धम्मं पटिच्च अकुसलो धम्मो उप्पज्जति नअधिपतिपच्चया – अकुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. अकुसलं धम्मं पटिच्च अब्याकतो धम्मो उप्पज्जति नअधिपतिपच्चया – अकुसले खन्धे पटिच्च चित्तसमुट्ठानं रूपं. अकुसलं धम्मं पटिच्च अकुसलो च अब्याकतो च धम्मा उप्पज्जन्ति नअधिपतिपच्चया – अकुसलं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं. (३)

अब्याकतं धम्मं पटिच्च अब्याकतो धम्मो उप्पज्जति नअधिपतिपच्चया – विपाकाब्याकतं किरियाब्याकतं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं; पटिसन्धिक्खणे विपाकाब्याकतं एकं खन्धं पटिच्च तयो खन्धा कटत्ता च रूपं, तयो खन्धे पटिच्च एको खन्धो कटत्ता च रूपं, द्वे खन्धे पटिच्च द्वे खन्धा कटत्ता च रूपं. खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं … उतुसमुट्ठानं… असञ्ञसत्तानं एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च कटत्तारूपं उपादारूपं. (१)

कुसलञ्च अब्याकतञ्च धम्मं पटिच्च अब्याकतो धम्मो उप्पज्जति नअधिपतिपच्चया – कुसले खन्धे च महाभूते च पटिच्च चित्तसमुट्ठानं रूपं. (१)

अकुसलञ्च अब्याकतञ्च धम्मं पटिच्च अब्याकतो धम्मो उप्पज्जति नअधिपतिपच्चया – अकुसले खन्धे च महाभूते च पटिच्च चित्तसमुट्ठानं रूपं. (१)

नअनन्तर-नसमनन्तरपच्चया

८९. कुसलं धम्मं पटिच्च अब्याकतो धम्मो उप्पज्जति नअनन्तरपच्चया… नसमनन्तरपच्चया – कुसले खन्धे पटिच्च चित्तसमुट्ठानं रूपं. (नअनन्तरपच्चयम्पि नसमनन्तरपच्चयम्पि नआरम्मणपच्चयसदिसं.)

नअञ्ञमञ्ञपच्चयो

९०. कुसलं धम्मं पटिच्च अब्याकतो धम्मो उप्पज्जति नअञ्ञमञ्ञपच्चया – कुसले खन्धे पटिच्च चित्तसमुट्ठानं रूपं. (१)

अकुसलं धम्मं पटिच्च अब्याकतो धम्मो उप्पज्जति नअञ्ञमञ्ञपच्चया – अकुसले खन्धे पटिच्च चित्तसमुट्ठानं रूपं. (१)

अब्याकतं धम्मं पटिच्च अब्याकतो धम्मो उप्पज्जति नअञ्ञमञ्ञपच्चया – विपाकाब्याकते किरियाब्याकते खन्धे पटिच्च चित्तसमुट्ठानं रूपं; पटिसन्धिक्खणे विपाकाब्याकते खन्धे पटिच्च कटत्तारूपं; महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरे महाभूते पटिच्च उपादारूपं; आहारसमुट्ठाने महाभूते पटिच्च उपादारूपं; उतुसमुट्ठाने महाभूते पटिच्च उपादारूपं; असञ्ञसत्तानं महाभूते पटिच्च कटत्तारूपं उपादारूपं. (१)

कुसलञ्च अब्याकतञ्च धम्मं पटिच्च अब्याकतो धम्मो उप्पज्जति न अञ्ञमञ्ञपच्चया – कुसले खन्धे च महाभूते च पटिच्च चित्तसमुट्ठानं रूपं. (१)

अकुसलञ्च अब्याकतञ्च धम्मं पटिच्च अब्याकतो धम्मो उप्पज्जति नअञ्ञमञ्ञपच्चया – अकुसले खन्धे च महाभूते च पटिच्च चित्तसमुट्ठानं रूपं. (१)

नउपनिस्सयपच्चयो

९१. कुसलं धम्मं पटिच्च अब्याकतो धम्मो उप्पज्जति नउपनिस्सयपच्चया – कुसले खन्धे पटिच्च चित्तसमुट्ठानं रूपं. (नउपनिस्सयपच्चयं नआरम्मणपच्चयसदिसं.)

नपुरेजातपच्चयो

९२. कुसलं धम्मं पटिच्च कुसलो धम्मो उप्पज्जति नपुरेजातपच्चया – अरूपे कुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. कुसलं धम्मं पटिच्च अब्याकतो धम्मो उप्पज्जति नपुरेजातपच्चया – कुसले खन्धे पटिच्च चित्तसमुट्ठानं रूपं. (२)

अकुसलं धम्मं पटिच्च अकुसलो धम्मो उप्पज्जति नपुरेजातपच्चया – अरूपे अकुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. अकुसलं धम्मं पटिच्च अब्याकतो धम्मो उप्पज्जति नपुरेजातपच्चया – अकुसले खन्धे पटिच्च चित्तसमुट्ठानं रूपं. (२)

अब्याकतं धम्मं पटिच्च अब्याकतो धम्मो उप्पज्जति नपुरेजातपच्चया – अरूपे विपाकाब्याकतं किरियाब्याकतं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा, विपाकाब्याकते किरियाब्याकते खन्धे पटिच्च चित्तसमुट्ठानं रूपं; पटिसन्धिक्खणे विपाकाब्याकतं एकं खन्धं पटिच्च तयो खन्धा कटत्ता च रूपं, तयो खन्धे पटिच्च एको खन्धो कटत्ता च रूपं, द्वे खन्धे पटिच्च द्वे खन्धा कटत्ता च रूपं. खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च कटत्तारूपं उपादारूपं. (१)

कुसलञ्च अब्याकतञ्च धम्मं पटिच्च अब्याकतो धम्मो उप्पज्जति नपुरेजातपच्चया – कुसले खन्धे च महाभूते च पटिच्च चित्तसमुट्ठानं रूपं. (१)

अकुसलञ्च अब्याकतञ्च धम्मं पटिच्च अब्याकतो धम्मो उप्पज्जति नपुरेजातपच्चया – अकुसले खन्धे च महाभूते च पटिच्च चित्तसमुट्ठानं रूपं. (१)

नपच्छाजात-नआसेवनपच्चया

९३. कुसलं धम्मं पटिच्च कुसलो धम्मो उप्पज्जति नपच्छाजातपच्चया – कुसलं एकं खन्धं पटिच्च…पे….

कुसलं धम्मं पटिच्च कुसलो धम्मो उप्पज्जति नआसेवनपच्चया – कुसलं एकं खन्धं पटिच्च…पे…. (नपच्छाजातपच्चयम्पि नआसेवनपच्चयम्पि नअधिपतिपच्चयसदिसं.)

नकम्मपच्चयो

९४. कुसलं धम्मं पटिच्च कुसलो धम्मो उप्पज्जति नकम्मपच्चया – कुसले खन्धे पटिच्च कुसला चेतना. (१)

अकुसलं धम्मं पटिच्च अकुसलो धम्मो उप्पज्जति नकम्मपच्चया – अकुसले खन्धे पटिच्च अकुसला चेतना. (१)

अब्याकतं धम्मं पटिच्च अब्याकतो धम्मो उप्पज्जति नकम्मपच्चया – किरियाब्याकते खन्धे पटिच्च किरियाब्याकता चेतना; बाहिरं… आहारसमुट्ठानं… उतुसमुट्ठानं एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता, महाभूते पटिच्च उपादारूपं. (१)

नविपाकपच्चयो

९५. कुसलं धम्मं पटिच्च कुसलो धम्मो उप्पज्जति नविपाकपच्चया – कुसलं एकं खन्धं पटिच्च… तीणि.

अकुसलं धम्मं पटिच्च अकुसलो धम्मो उप्पज्जति नविपाकपच्चया… तीणि.

अब्याकतं धम्मं पटिच्च अब्याकतो धम्मो उप्पज्जति नविपाकपच्चया – किरियाब्याकतं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं; एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं.

कुसलञ्च अब्याकतञ्च धम्मं पटिच्च अब्याकतो धम्मो उप्पज्जति नविपाकपच्चया – कुसले खन्धे च महाभूते च पटिच्च चित्तसमुट्ठानं रूपं.

अकुसलञ्च अब्याकतञ्च धम्मं पटिच्च अब्याकतो धम्मो उप्पज्जति नविपाकपच्चया – अकुसले खन्धे च महाभूते च पटिच्च चित्तसमुट्ठानं रूपं.

नआहारपच्चयो

९६. अब्याकतं धम्मं पटिच्च अब्याकतो धम्मो उप्पज्जति नआहारपच्चया – बाहिरं … उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

नइन्द्रियपच्चयो

९७. अब्याकतं धम्मं पटिच्च अब्याकतो धम्मो उप्पज्जति नइन्द्रियपच्चया – बाहिरं… आहारसमुट्ठानं… उतुसमुट्ठानं एकं महाभूतं पटिच्च तयो महाभूता…पे… महाभूते पटिच्च उपादारूपं; असञ्ञसत्तानं महाभूते पटिच्च रूपजीवितिन्द्रियं. (१)

नझानपच्चयो

९८. अब्याकतं धम्मं पटिच्च अब्याकतो धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा; तयो खन्धे पटिच्च एको खन्धो, द्वे खन्धे पटिच्च द्वे खन्धा; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

नमग्गपच्चयो

९९. अब्याकतं धम्मं पटिच्च अब्याकतो धम्मो उप्पज्जति नमग्गपच्चया – अहेतुकं विपाकाब्याकतं किरियाब्याकतं एकं खन्धं पटिच्च तयो खन्धा चित्तसमुट्ठानञ्च रूपं, तयो खन्धे पटिच्च एको खन्धो चित्तसमुट्ठानञ्च रूपं, द्वे खन्धे पटिच्च द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकाब्याकतं एकं खन्धं पटिच्च तयो खन्धा कटत्ता च रूपं, तयो खन्धे पटिच्च एको खन्धो कटत्ता च रूपं, द्वे खन्धे पटिच्च द्वे खन्धा कटत्ता च रूपं. खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता, तयो महाभूते पटिच्च एकं महाभूतं, द्वे महाभूते पटिच्च द्वे महाभूता; महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

नसम्पयुत्तपच्चयो

१००. कुसलं धम्मं पटिच्च अब्याकतो धम्मो उप्पज्जति नसम्पयुत्तपच्चया – कुसले खन्धे पटिच्च चित्तसमुट्ठानं रूपं. (नआरम्मणपच्चयसदिसं.)

नविप्पयुत्तपच्चयो

१०१. कुसलं धम्मं पटिच्च कुसलो धम्मो उप्पज्जति नविप्पयुत्तपच्चया – अरूपे कुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. (१)

अकुसलं धम्मं पटिच्च अकुसलो धम्मो उप्पज्जति नविप्पयुत्तपच्चया – अरूपे अकुसलं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. (१)

अब्याकतं धम्मं पटिच्च अब्याकतो धम्मो उप्पज्जति नविप्पयुत्तपच्चया – अरूपे विपाकाब्याकतं किरियाब्याकतं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

नोनत्थि-नोविगतपच्चया

१०२. कुसलं धम्मं पटिच्च अब्याकतो धम्मो उप्पज्जति नोनत्थिपच्चया… नोविगतपच्चया – कुसले खन्धे पटिच्च चित्तसमुट्ठानं रूपं. (नआरम्मणपच्चयसदिसं.)