१. विभङ्गवारो

नहेतुपच्चयो

३५१. अकुसलं धम्मं संसट्ठो अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे संसट्ठो विचिकिच्छासहगतो उद्धच्चसहगतो मोहो. (१)

अब्याकतं धम्मं संसट्ठो अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा; अहेतुकपटिसन्धिक्खणे विपाकाब्याकतं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा. (१)

नअधिपतिआदिपच्चया

३५२. कुसलं धम्मं संसट्ठो कुसलो धम्मो उप्पज्जति नअधिपतिपच्चया… नपुरेजातपच्चया – अरूपे [आरुप्पे (सब्बत्थ)] कुसलं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. अकुसलं धम्मं…पे… अब्याकतं धम्मं…पे….

नपच्छाजात-नआसेवनपच्चया

३५३. कुसलं धम्मं संसट्ठो कुसलो धम्मो उप्पज्जति नपच्छाजातपच्चया… तीणि. नआसेवनपच्चया… तीणि.

नकम्मपच्चयो

३५४. कुसलं धम्मं संसट्ठो कुसलो धम्मो उप्पज्जति नकम्मपच्चया. कुसले खन्धे संसट्ठा कुसला चेतना. (१)

अकुसलं धम्मं संसट्ठो अकुसलो धम्मो उप्पज्जति नकम्मपच्चया. अकुसले खन्धे संसट्ठा अकुसला चेतना. (१)

अब्याकतं धम्मं संसट्ठो अब्याकतो धम्मो उप्पज्जति नकम्मपच्चया. किरियाब्याकते खन्धे संसट्ठा किरियाब्याकता चेतना. (१)

नविपाकपच्चयो

३५५. कुसलं धम्मं संसट्ठो…पे… अकुसलं धम्मं…पे… अब्याकतं धम्मं संसट्ठो अब्याकतो धम्मो उप्पज्जति नविपाकपच्चया – किरियाब्याकतं एकं खन्धं.

(संसट्ठवारे पच्चनीयविभङ्गे नकम्मे च नविपाके च पटिसन्धि नत्थि; अवसेसेसु सब्बत्थ अत्थि.)

नझानपच्चयो

३५६. अब्याकतं धम्मं संसट्ठो अब्याकतो धम्मो उप्पज्जति नझानपच्चया – पञ्चविञ्ञाणसहगतं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. (१)

नमग्गपच्चयो

३५७. अब्याकतं धम्मं संसट्ठो अब्याकतो धम्मो उप्पज्जति नमग्गपच्चया – अहेतुकं विपाकाब्याकतं किरियाब्याकतं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा; अहेतुकपटिसन्धिक्खणे…पे…. (१)

नविप्पयुत्तपच्चयो

३५८. कुसलं धम्मं संसट्ठो कुसलो धम्मो उप्पज्जति नविप्पयुत्तपच्चया – अरूपे कुसलं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. (१)

अकुसलं धम्मं संसट्ठो अकुसलो धम्मो उप्पज्जति नविप्पयुत्तपच्चया – अरूपे अकुसलं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. (१)

अब्याकतं धम्मं संसट्ठो अब्याकतो धम्मो उप्पज्जति नविप्पयुत्तपच्चया – अरूपे विपाकाब्याकतं किरियाब्याकतं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. (नविप्पयुत्ते पटिसन्धि नत्थि.) (१)