१. विभङ्गवारो

हेतुपच्चयो

३३८. कुसलं धम्मं संसट्ठो कुसलो धम्मो उप्पज्जति हेतुपच्चया – कुसलं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा. (१)

अकुसलं धम्मं संसट्ठो अकुसलो धम्मो उप्पज्जति हेतुपच्चया – अकुसलं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा. (१)

अब्याकतं धम्मं संसट्ठो अब्याकतो धम्मो उप्पज्जति हेतुपच्चया – विपाकाब्याकतं किरियाब्याकतं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा; पटिसन्धिक्खणे विपाकाब्याकतं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा. (१)

आरम्मणादिपच्चया

३३९. कुसलं धम्मं संसट्ठो कुसलो धम्मो उप्पज्जति आरम्मणपच्चया… अधिपतिपच्चया… (अधिपति पटिसन्धिक्खणे नत्थि.) अनन्तरपच्चया… समनन्तरपच्चया… सहजातपच्चया… अञ्ञमञ्ञपच्चया… निस्सयपच्चया… उपनिस्सयपच्चया. (सब्बानि पदानि हेतुमूलकसदिसानि).

पुरेजातपच्चयो

३४०. कुसलं धम्मं संसट्ठो कुसलो धम्मो उप्पज्जति पुरेजातपच्चया – कुसलं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा, वत्थुं पुरेजातपच्चया. (१)

अकुसलं धम्मं संसट्ठो अकुसलो धम्मो उप्पज्जति पुरेजातपच्चया – अकुसलं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा; वत्थुं पुरेजातपच्चया. (१)

अब्याकतं धम्मं संसट्ठो अब्याकतो धम्मो उप्पज्जति पुरेजातपच्चया – विपाकाब्याकतं किरियाब्याकतं एकं खन्धं संसट्ठा तयो खन्धा, तयो खन्धे संसट्ठो एको खन्धो, द्वे खन्धे संसट्ठा द्वे खन्धा; वत्थुं पुरेजातपच्चया. (१)

आसेवनपच्चयो

३४१. कुसलं धम्मं संसट्ठो…पे… अकुसलं धम्मं…पे… अब्याकतं धम्मं संसट्ठो अब्याकतो धम्मो उप्पज्जति आसेवनपच्चया – किरियाब्याकतं एकं खन्धं संसट्ठा…पे….

कम्मपच्चयो

३४२. कुसलं धम्मं संसट्ठो कुसलो धम्मो उप्पज्जति कम्मपच्चया…पे… अकुसलं धम्मं संसट्ठो…पे… अब्याकतं धम्मं संसट्ठो…पे….

विपाकपच्चयो

३४३. अब्याकतं धम्मं संसट्ठो अब्याकतो धम्मो उप्पज्जति विपाकपच्चया – विपाकाब्याकतं…पे….

आहारादिपच्चया

३४४. कुसलं धम्मं संसट्ठो कुसलो धम्मो उप्पज्जति आहारपच्चया… इन्द्रियपच्चया … झानपच्चया… मग्गपच्चया… सम्पयुत्तपच्चया. (इमानि पदानि हेतुपच्चयसदिसानि.)

विप्पयुत्तपच्चयो

३४५. कुसलं धम्मं संसट्ठो कुसलो धम्मो उप्पज्जति विप्पयुत्तपच्चया – कुसलं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा; वत्थुं विप्पयुत्तपच्चया.

अकुसलं धम्मं…पे… वत्थुं विप्पयुत्तपच्चया.

अब्याकतं धम्मं…पे… वत्थुं विप्पयुत्तपच्चया.

अत्थिआदिपच्चया

३४६. कुसलं धम्मं संसट्ठो कुसलो धम्मो उप्पज्जति अत्थिपच्चया… नत्थिपच्चया… विगतपच्चया… अविगतपच्चया (हेतुपच्चयसदिसं).