१. विभङ्गवारो

नहेतुपच्चयो

३३४. अकुसलं धम्मं निस्साय अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे निस्साय विचिकिच्छासहगतो उद्धच्चसहगतो मोहो. (१)

अब्याकतं धम्मं निस्साय अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं निस्साय तयो खन्धा चित्तसमुट्ठानञ्च रूपं, तयो खन्धे निस्साय एको खन्धो चित्तसमुट्ठानञ्च रूपं, द्वे खन्ध निस्साय द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकाब्याकतं एकं खन्धं निस्साय तयो खन्धा कटत्ता च रूपं…पे… द्वे खन्धे निस्साय द्वे खन्धा कटत्ता च रूपं; खन्धे निस्साय वत्थु, वत्थुं निस्साय खन्धा; एकं महाभूतं निस्साय तयो महाभूता…पे… महाभूते निस्साय चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं निस्साय तयो महाभूता…पे… महाभूते निस्साय कटत्तारूपं उपादारूपं; चक्खायतनं निस्साय चक्खुविञ्ञाणं…पे… कायायतनं निस्साय कायविञ्ञाणं; वत्थुं निस्साय अहेतुका विपाकाब्याकता किरियाब्याकता खन्धा. (१)

अब्याकतं धम्मं निस्साय अकुसलो धम्मो उप्पज्जति नहेतुपच्चया – वत्थुं निस्साय विचिकिच्छासहगतो उद्धच्चसहगतो मोहो. (२)

अकुसलञ्च अब्याकतञ्च धम्मं निस्साय अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च निस्साय विचिकिच्छासहगतो उद्धच्चसहगतो मोहो. (१)

(यथा पच्चयवारे, एवं वित्थारेतब्बं.)