१. विभङ्गवारो

हेतुपच्चयो

३२९. कुसलं धम्मं निस्साय कुसलो धम्मो उप्पज्जति हेतुपच्चया – कुसलं एकं खन्धं निस्साय तयो खन्धा, तयो खन्धे निस्साय एको खन्धो, द्वे खन्धे निस्साय द्वे खन्धा. कुसलं धम्मं निस्साय अब्याकतो धम्मो उप्पज्जति हेतुपच्चया – कुसले खन्धे निस्साय चित्तसमुट्ठानं रूपं. कुसलं धम्मं निस्साय कुसलो च अब्याकतो च धम्मा उप्पज्जन्ति हेतुपच्चया. कुसलं एकं खन्धं निस्साय तयो खन्धा चित्तसमुट्ठानञ्च रूपं, तयो खन्धे निस्साय एको खन्धो चित्तसमुट्ठानञ्च रूपं, द्वे खन्धे निस्साय द्वे खन्धा चित्तसमुट्ठानञ्च रूपं. (३)

३३०. अकुसलं धम्मं निस्साय अकुसलो धम्मो उप्पज्जति हेतुपच्चया – अकुसलं एकं खन्धं निस्साय तयो खन्धा…पे… द्वे खन्धे निस्साय द्वे खन्धा. अकुसलं धम्मं निस्साय अब्याकतो धम्मो उप्पज्जति हेतुपच्चया – अकुसले खन्धे निस्साय चित्तसमुट्ठानं रूपं. अकुसलं धम्मं निस्साय अकुसलो च अब्याकतो च धम्मा उप्पज्जन्ति हेतुपच्चया – अकुसलं एकं खन्धं निस्साय तयो खन्धा चित्तसमुट्ठानञ्च रूपं…पे… द्वे खन्धे निस्साय द्वे खन्धा चित्तसमुट्ठानञ्च रूपं. (३)

३३१. अब्याकतं धम्मं निस्साय अब्याकतो धम्मो उप्पज्जति हेतुपच्चया – विपाकाब्याकतं किरियाब्याकतं एकं खन्धं निस्साय तयो खन्धा चित्तसमुट्ठानञ्च रूपं, तयो खन्धे निस्साय एको खन्धो चित्तसमुट्ठानञ्च रूपं, द्वे खन्धे निस्साय द्वे खन्धा चित्तसमुट्ठानञ्च रूपं; पटिसन्धिक्खणे विपाकाब्याकतं एकं खन्धं निस्साय तयो खन्धा कटत्ता च रूपं, तयो खन्धे निस्साय एको खन्धो कटत्ता च रूपं, द्वे खन्धे निस्साय द्वे खन्धा कटत्ता च रूपं; खन्धे निस्साय वत्थु, वत्थुं निस्साय खन्धा; एकं महाभूतं निस्साय तयो महाभूता, तयो महाभूते निस्साय एकं महाभूतं, द्वे महाभूते निस्साय द्वे महाभूता, महाभूते निस्साय चित्तसमुट्ठानं रूपं कटत्तारूपं उपादारूपं; वत्थुं निस्साय विपाकाब्याकता किरियाब्याकता खन्धा. (१)

अब्याकतं धम्मं निस्साय कुसलो धम्मो उप्पज्जति हेतुपच्चया – वत्थुं निस्साय कुसला खन्धा. (२)

अब्याकतं धम्मं निस्साय अकुसलो धम्मो उप्पज्जति हेतुपच्चया – वत्थुं निस्साय अकुसला खन्धा. (३)

अब्याकतं धम्मं निस्साय कुसलो च अब्याकतो च धम्मा उप्पज्जन्ति हेतुपच्चया – वत्थुं निस्साय कुसला खन्धा, महाभूते निस्साय चित्तसमुट्ठानं रूपं. (४)

अब्याकतं धम्मं निस्साय अकुसलो च अब्याकतो च धम्मा उप्पज्जन्ति हेतुपच्चया – वत्थुं निस्साय अकुसला खन्धा, महाभूते निस्साय चित्तसमुट्ठानं रूपं. (५)

३३२. कुसलञ्च अब्याकतञ्च धम्मं निस्साय कुसलो धम्मो उप्पज्जति हेतुपच्चया – कुसलं एकं खन्धञ्च वत्थुञ्च निस्साय तयो खन्धा…पे… द्वे खन्धे च वत्थुञ्च निस्साय द्वे खन्धा. कुसलञ्च अब्याकतञ्च धम्मं निस्साय अब्याकतो धम्मो उप्पज्जति हेतुपच्चया – कुसले खन्धे च महाभूते च निस्साय चित्तसमुट्ठानं रूपं. कुसलञ्च अब्याकतञ्च धम्मं निस्साय कुसलो च अब्याकतो च धम्मा उप्पज्जन्ति हेतुपच्चया – कुसलं एकं खन्धञ्च वत्थुञ्च निस्साय तयो खन्धा…पे… द्वे खन्धे च वत्थुञ्च निस्साय द्वे खन्धा, कुसले खन्धे च महाभूते च निस्साय चित्तसमुट्ठानं रूपं. (३)

अकुसलञ्च अब्याकतञ्च धम्मं निस्साय अकुसलो धम्मो उप्पज्जति हेतुपच्चया – अकुसलं एकं खन्धञ्च वत्थुञ्च निस्साय तयो खन्धा …पे… द्वे खन्धे च वत्थुञ्च निस्साय द्वे खन्धा. अकुसलञ्च अब्याकतञ्च धम्मं निस्साय अब्याकतो धम्मो उप्पज्जति हेतुपच्चया – अकुसले खन्धे च महाभूते च निस्साय चित्तसमुट्ठानं रूपं. अकुसलञ्च अब्याकतञ्च धम्मं निस्साय अकुसलो च अब्याकतो च धम्मा उप्पज्जन्ति हेतुपच्चया – अकुसलं एकं खन्धञ्च वत्थुञ्च निस्साय तयो खन्धा…पे… द्वे खन्धे च वत्थुञ्च निस्साय द्वे खन्धा, अकुसले खन्धे च महाभूते च निस्साय चित्तसमुट्ठानं रूपं. (३)

(यथा पच्चयवारे, एवं वित्थारेतब्बं.)