१. विभङ्गवारो

नहेतुपच्चयो

२७७. अकुसलं धम्मं पच्चया अकुसलो धम्मो उप्पज्जति न हेतुपच्चया – विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

अब्याकतं धम्मं पच्चया अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे पच्चया द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकाब्याकतं एकं खन्धं पच्चया तयो खन्धा कटत्ता च रूपं…पे… द्वे खन्धे पच्चया द्वे खन्धा कटत्ता च रूपं; खन्धे पच्चया वत्थु, वत्थुं पच्चया खन्धा; एकं महाभूतं पच्चया तयो महाभूता…पे… महाभूते पच्चया चित्तसमुट्ठानं रूपं कटत्तारूपं उपादारूपं; बाहिरं … आहारसमुट्ठानं… उतुसमुट्ठानं … असञ्ञसत्तानं एकं महाभूतं पच्चया तयो महाभूता…पे… महाभूते पच्चया कटत्तारूपं उपादारूपं. चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं; वत्थुं पच्चया अहेतुका विपाकाब्याकता किरियाब्याकता खन्धा. (१)

अब्याकतं धम्मं पच्चया अकुसलो धम्मो उप्पज्जति नहेतुपच्चया – वत्थुं पच्चया विचिकिच्छासहगतो उद्धच्चसहगतो मोहो. (२)

अकुसलञ्च अब्याकतञ्च धम्मं पच्चया अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चयो

२७८. कुसलं धम्मं पच्चया अब्याकतो धम्मो उप्पज्जति नआरम्मणपच्चया – कुसले खन्धे पच्चया चित्तसमुट्ठानं रूपं.

(यथा पटिच्चवारे नआरम्मणपच्चया, एवं वित्थारेतब्बं.)

नअधिपतिपच्चयो

२७९. कुसलं धम्मं पच्चया कुसलो धम्मो उप्पज्जति नअधिपतिपच्चया – कुसलं एकं खन्धं पच्चया… तीणि.

अकुसलं धम्मं पच्चया… तीणि.

अब्याकतं धम्मं पच्चया…पे… पटिसन्धिक्खणे…पे… (अब्याकतं परिपुण्णं कातब्बं). बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पच्चया…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया विपाकाब्याकता किरियाब्याकता खन्धा.

अब्याकतं धम्मं पच्चया कुसलो धम्मो उप्पज्जति नअधिपतिपच्चया, वत्थुं पच्चया कुसला खन्धा…पे….

(यथा अनुलोमे सहजातपच्चयं, एवं गणेतब्बं.)

नअनन्तरादिपच्चया

२८०. कुसलं धम्मं पच्चया अब्याकतो धम्मो उप्पज्जति नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया.

(यथा पटिच्चवारे, एवं वित्थारेतब्बं.)

नपच्छाजातादिपच्चया

२८१. कुसलं धम्मं पच्चया कुसलो धम्मो उप्पज्जति नपच्छाजातपच्चया… नआसेवनपच्चया…पे… चक्खायतनं पच्चया…पे… (नपच्छाजातपच्चयम्पि नआसेवनपच्चयम्पि परिपुण्णं, सत्तरस.)

(यथा अनुलोमे सहजातपच्चयं, एवं वित्थारेतब्बं.)

नकम्मपच्चयो

२८२. कुसलं धम्मं पच्चया कुसलो धम्मो उप्पज्जति नकम्मपच्चया – कुसले खन्धे पच्चया कुसला चेतना. (१)

अकुसलं धम्मं पच्चया अकुसलो धम्मो उप्पज्जति नकम्मपच्चया – अकुसले खन्धे पच्चया अकुसला चेतना. (१)

अब्याकतं धम्मं पच्चया अब्याकतो धम्मो उप्पज्जति नकम्मपच्चया, किरियाब्याकते खन्धे पच्चया किरियाब्याकता चेतना; बाहिरं… आहारसमुट्ठानं… उतुसमुट्ठानं एकं महाभूतं पच्चया…पे… उपादारूपं, वत्थुं पच्चया किरियाब्याकता चेतना. (१)

अब्याकतं धम्मं पच्चया कुसलो धम्मो उप्पज्जति नकम्मपच्चया – वत्थुं पच्चया कुसला चेतना. (२)

अब्याकतं धम्मं पच्चया अकुसलो धम्मो उप्पज्जति नकम्मपच्चया – वत्थुं पच्चया अकुसला चेतना. (३)

कुसलञ्च अब्याकतञ्च धम्मं पच्चया कुसलो धम्मो उप्पज्जति नकम्मपच्चया – कुसले खन्धे च वत्थुञ्च पच्चया कुसला चेतना. (१)

अकुसलञ्च अब्याकतञ्च धम्मं पच्चया अकुसलो धम्मो उप्पज्जति नकम्मपच्चया – अकुसले खन्धे च वत्थुञ्च पच्चया अकुसला चेतना. (१)

नविपाकपच्चयो

२८३. कुसलं धम्मं पच्चया कुसलो धम्मो उप्पज्जति नविपाकपच्चया – कुसलं एकं खन्धं पच्चया… तीणि.

अकुसलं धम्मं पच्चया… तीणि.

अब्याकतं धम्मं पच्चया अब्याकतो धम्मो उप्पज्जति नविपाकपच्चया – किरियाब्याकतं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे पच्चया द्वे खन्धा चित्तसमुट्ठानञ्च रूपं, एकं महाभूतं पच्चया तयो महाभूता…पे… महाभूते पच्चया चित्तसमुट्ठानं रूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पच्चया तयो महाभूता…पे… महाभूते पच्चया कटत्तारूपं उपादारूपं, वत्थुं पच्चया किरियाब्याकता खन्धा.

अब्याकतं धम्मं पच्चया कुसलो धम्मो उप्पज्जति नविपाकपच्चया – वत्थुं पच्चया कुसला खन्धा.

(विपाकं ठपेत्वा सब्बत्थ वित्थारेतब्बं.)

नआहारादिपच्चया

२८४. अब्याकतं धम्मं पच्चया अब्याकतो धम्मो उप्पज्जति नआहारपच्चया… नइन्द्रियपच्चया… नझानपच्चया…पे… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. (न झाने इदं नानाकरणं.) नमग्गपच्चया… चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. वत्थुं पच्चया अहेतुकविपाकाब्याकता किरियाब्याकता खन्धा. (नमग्गे इदं नानाकरणं.)

(अवसेसं यथा पटिच्चवारे पच्चनीयं, एवं वित्थारेतब्बं.)

नसम्पयुत्तादिपच्चया

२८५. नसम्पयुत्तपच्चया … नविप्पयुत्तपच्चया… नोनत्थिपच्चया… कुसलं धम्मं पच्चया अब्याकतो धम्मो उप्पज्जति नोविगतपच्चया – कुसले खन्धे पच्चया चित्तसमुट्ठानं रूपं.

(यथा पटिच्चवारे, एवं वित्थारेतब्बं.)