२. पच्चयपच्चनीयं

१. विभङ्गवारो

नहेतुपच्चयो

२३९. अकुसलं धम्मं सहजातो अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे सहजातो विचिकिच्छासहगतो उद्धच्चसहगतो मोहो. (१)

अब्याकतं धम्मं सहजातो अब्याकतो धम्मो उप्पज्जति नहेतुपच्चया – अहेतुकं विपाकाब्याकतं किरियाब्याकतं एकं खन्धं सहजाता तयो खन्धा चित्तसमुट्ठानञ्च रूपं, तयो खन्धे सहजातो एको खन्धो चित्तसमुट्ठानञ्च रूपं, द्वे खन्धे सहजाता द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकाब्याकतं एकं खन्धं सहजाता तयो खन्धा कटत्ता च रूपं, तयो खन्धे सहजातो एको खन्धो कटत्ता च रूपं, द्वे खन्धे सहजाता द्वे खन्धा कटत्ता च रूपं, खन्धे सहजातं वत्थु, वत्थुं सहजाता खन्धा; एकं महाभूतं सहजाता तयो महाभूता, तयो महाभूते सहजातं एकं महाभूतं, द्वे महाभूते सहजाता द्वे महाभूता, महाभूते सहजातं चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं सहजाता तयो महाभूता…पे… महाभूते सहजातं कटत्तारूपं उपादारूपं. (१)

(यथा पटिच्चवारे, एवं वित्थारेतब्बं.)