(२१८) १. एकाधिप्पायकथा

९०८. एकाधिप्पायेन मेथुनो धम्मो पटिसेवितब्बोति? आमन्ता. एकाधिप्पायेन अस्समणेन होतब्बं, अभिक्खुना होतब्बं, छिन्नमूलेन होतब्बं पाराजिकेन होतब्बन्ति? न हेवं वत्तब्बे…पे… एकाधिप्पायेन मेथुनो धम्मो पटिसेवितब्बोति? आमन्ता. एकाधिप्पायेन पाणो हन्तब्बो, अदिन्नं आदियितब्बं, मुसा भणितब्बा, पिसुणं भणितब्बं, फरुसं भणितब्बं, सम्फं पलपितब्बं, सन्धि छेदितब्बो, निल्लोपं हातब्बं, एकागारिकं कातब्बं, परिपन्थे ठातब्बं, परदारो गन्तब्बो, गामघातको कातब्बो, निगमघातको कातब्बोति? न हेवं वत्तब्बे…पे….

एकाधिप्पायकथा निट्ठिता.