(२०६) ७. धम्मकथा

८८७. सब्बे धम्मा नियताति? आमन्ता. मिच्छत्तनियताति? न हेवं वत्तब्बे…पे… सम्मत्तनियताति? न हेवं वत्तब्बे…पे… नत्थि अनियतो रासीति? न हेवं वत्तब्बे…पे… ननु अत्थि अनियतो रासीति? आमन्ता. हञ्चि अत्थि अनियतो रासि, नो च वत रे वत्तब्बे – ‘‘सब्बे धम्मा नियता’’ति.

सब्बे धम्मा नियताति? आमन्ता. ननु तयो रासी वुत्ता भगवता – मिच्छत्तनियतो रासि, सम्मत्तनियतो रासि, अनियतो रासीति [ध. स. तिकमातिका १५]? आमन्ता. हञ्चि तयो रासी वुत्ता भगवता – मिच्छत्तनियतो रासि, सम्मत्तनियतो रासि, अनियतो रासि, नो च वत रे वत्तब्बे – ‘‘सब्बे धम्मा नियता’’ति.

रूपं रूपट्ठेन नियतन्ति? आमन्ता. मिच्छत्तनियतन्ति? न हेवं वत्तब्बे…पे… सम्मत्तनियतन्ति? न हेवं वत्तब्बे…पे… वेदना…पे… सञ्ञा…पे… सङ्खारा…पे… विञ्ञाणं विञ्ञाणट्ठेन नियतन्ति? आमन्ता. मिच्छत्तनियतन्ति? न हेवं वत्तब्बे…पे… सम्मत्तनियतन्ति? न हेवं वत्तब्बे…पे….

८८८. न वत्तब्बं – रूपं रूपट्ठेन नियतं…पे… वेदना…पे… सञ्ञा…पे… सङ्खारा…पे… विञ्ञाणं विञ्ञाणट्ठेन नियतन्ति? आमन्ता. रूपं वेदना होति…पे… सञ्ञा होति… सङ्खारा होन्ति… विञ्ञाणं होति… वेदना…पे… सञ्ञा…पे… सङ्खारा…पे… विञ्ञाणं रूपं होति…पे… वेदना होति… सञ्ञा होति… सङ्खारा होन्तीति? न हेवं वत्तब्बे. तेन हि रूपं रूपट्ठेन नियतं, वेदना…पे… सञ्ञा…पे… सङ्खारा…पे… विञ्ञाणं विञ्ञाणट्ठेन नियतन्ति.

धम्मकथा निट्ठिता.