२१. एकवीसतिमवग्गो

(२०७) ८. कम्मकथा

८८९. सब्बे कम्मा नियताति? आमन्ता. मिच्छत्तनियताति? न हेवं वत्तब्बे…पे… सम्मत्तनियताति? न हेवं वत्तब्बे…पे… नत्थि अनियतो रासीति? न हेवं वत्तब्बे…पे… ननु अत्थि अनियतो रासीति? आमन्ता. हञ्चि अत्थि अनियतो रासि, नो च वत रे वत्तब्बे – ‘‘सब्बे कम्मा नियता’’ति.

सब्बे कम्मा नियताति? आमन्ता. ननु तयो रासी वुत्ता भगवता – मिच्छत्तनियतो रासि, सम्मत्तनियतो रासि, अनियतो रासीति? आमन्ता. हञ्चि तयो रासी वुत्ता भगवता – मिच्छत्तनियतो रासि, सम्मत्तनियतो रासि, अनियतो रासि, नो च वत रे वत्तब्बे – ‘‘सब्बे कम्मा नियता’’ति.

८९०. दिट्ठधम्मवेदनीयं कम्मं दिट्ठधम्मवेदनीयट्ठेन नियतन्ति? आमन्ता. मिच्छत्तनियतन्ति? न हेवं वत्तब्बे…पे… सम्मत्तनियतन्ति? न हेवं वत्तब्बे…पे…. उपपज्जवेदनीयं कम्मं…पे… अपरापरियवेदनीयं कम्मं अपरापरियवेदनीयट्ठेन नियतन्ति? आमन्ता. मिच्छत्तनियतन्ति? न हेवं वत्तब्बे…पे… सम्मत्तनियतन्ति? न हेवं वत्तब्बे…पे….

८९१. न वत्तब्बं – दिट्ठधम्मवेदनीयं कम्मं दिट्ठधम्मवेदनीयट्ठेन नियतं, उपपज्जवेदनीयं कम्मं…पे… अपरापरियवेदनीयं कम्मं अपरापरियवेदनीयट्ठेन नियतन्ति? आमन्ता. दिट्ठधम्मवेदनीयं कम्मं उपपज्जवेदनीयं होति, अपरापरियवेदनीयं होति…पे… उपपज्जवेदनीयं कम्मं दिट्ठधम्मवेदनीयं होति, अपरापरियवेदनीयं होति…पे… अपरापरियवेदनीयं कम्मं दिट्ठधम्मवेदनीयं होति, उपपज्जवेदनीयं होतीति? न हेवं वत्तब्बे. तेन हि दिट्ठधम्मवेदनीयं कम्मं दिट्ठधम्मवेदनीयट्ठेन नियतं, उपपज्जवेदनीयं कम्मं…पे… अपरापरियवेदनीयं कम्मं अपरापरियवेदनीयट्ठेन नियतन्ति.

कम्मकथा निट्ठिता.

एकवीसतिमवग्गो.

तस्सुद्दानं –

सासनं नवं कतं अत्थि कोचि तथागतस्स सासनं नवं करोति लब्भा तथागतस्स सासनं पुन नवं कातुं, पुथुज्जनो तेधातुकेहि धम्मेहि अविवित्तो, अत्थि किञ्चि संयोजनं अप्पहाय अरहत्तप्पत्ति, अत्थि अधिप्पायिद्धि बुद्धानं वा सावकानं वा, अत्थि बुद्धानं बुद्धेहि हीनातिरेकता, सब्बा दिसा बुद्धा तिट्ठन्ति, सब्बे धम्मा नियता, सब्बे कम्मा नियताति.