१६. सोळसमवग्गो

(१६२) ७. रूपं कुसलाकुसलन्तिकथा

७६०. रूपं कुसलन्ति? आमन्ता. सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… ननु अनारम्मणं, नत्थि तस्स आवट्टना…पे… पणिधीति? आमन्ता. हञ्चि अनारम्मणं, नत्थि तस्स आवट्टना…पे… पणिधि, नो च वत रे वत्तब्बे – ‘‘रूपं कुसल’’न्ति.

७६१. अलोभो कुसलो सारम्मणो, अत्थि तस्स आवट्टना…पे… पणिधीति? आमन्ता. रूपं कुसलं सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे….

अदोसो कुसलो…पे… अमोहो कुसलो…पे… सद्धा… वीरियं… सति… समाधि…पे… पञ्ञा कुसला सारम्मणा, अत्थि ताय आवट्टना…पे… पणिधीति? आमन्ता. रूपं कुसलं सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे….

रूपं कुसलं अनारम्मणं, नत्थि तस्स आवट्टना…पे… पणिधीति? आमन्ता. अलोभो कुसलो अनारम्मणो, नत्थि तस्स आवट्टना …पे… पणिधीति? न हेवं वत्तब्बे…पे….

रूपं कुसलं अनारम्मणं, नत्थि तस्स आवट्टना…पे… पणिधीति? आमन्ता. अदोसो कुसलो…पे… पञ्ञा कुसला अनारम्मणा, नत्थि ताय आवट्टना…पे… पणिधीति? न हेवं वत्तब्बे…पे….

७६२. रूपं अकुसलन्ति? आमन्ता. सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… ननु अनारम्मणं, नत्थि तस्स आवट्टना…पे… पणिधीति? आमन्ता. हञ्चि अनारम्मणं, नत्थि तस्स आवट्टना…पे… पणिधि, नो च वत रे वत्तब्बे – ‘‘रूपं अकुसल’’न्ति…पे….

७६३. लोभो अकुसलो सारम्मणो, अत्थि तस्स आवट्टना…पे… पणिधीति? आमन्ता. रूपं अकुसलं सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… दोसो… मोहो… मानो…पे… अनोत्तप्पं अकुसलं सारम्मणं, अत्थि तस्स आवट्टना…पे… पणिधीति? आमन्ता. रूपं अकुसलं सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे….

रूपं अकुसलं अनारम्मणं, नत्थि तस्स आवट्टना…पे… पणिधीति? आमन्ता. लोभो अकुसलो अनारम्मणो, नत्थि तस्स आवट्टना…पे… पणिधीति? न हेवं वत्तब्बे…पे… रूपं अकुसलं अनारम्मणं, नत्थि तस्स आवट्टना…पे… पणिधीति? आमन्ता. दोसो… मोहो…पे… अनोत्तप्पं अकुसलं अनारम्मणं, नत्थि तस्स आवट्टना…पे… पणिधीति? न हेवं वत्तब्बे…पे….

७६४. न वत्तब्बं – ‘‘रूपं कुसलम्पि अकुसलम्पी’’ति? आमन्ता. ननु कायकम्मं वचीकम्मं कुसलम्पि अकुसलम्पीति? आमन्ता. हञ्चि कायकम्मं वचीकम्मं कुसलम्पि अकुसलम्पि, तेन वत रे वत्तब्बे – ‘‘रूपं कुसलम्पि अकुसलम्पी’’ति.

रूपं कुसलाकुसलन्तिकथा निट्ठिता.