१६. सोळसमवग्गो

(१६३) ८. रूपं विपाकोतिकथा

७६५. रूपं विपाकोति? आमन्ता. रूपं सुखवेदनियं दुक्खवेदनियं अदुक्खमसुखवेदनियं, सुखाय वेदनाय सम्पयुत्तं, दुक्खाय वेदनाय सम्पयुत्तं, अदुक्खमसुखाय वेदनाय सम्पयुत्तं, फस्सेन सम्पयुत्तं…पे… चित्तेन सम्पयुत्तं, सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… ननु न सुखवेदनियं न दुक्खवेदनियं…पे… अनारम्मणं, नत्थि तस्स आवट्टना…पे… पणिधीति? आमन्ता. हञ्चि न सुखवेदनियं न दुक्खवेदनियं…पे… अनारम्मणं, नत्थि तस्स आवट्टना…पे… पणिधि, नो च वत रे वत्तब्बे – ‘‘रूपं विपाको’’ति.

७६६. फस्सो विपाको, फस्सो सुखवेदनियो दुक्खवेदनियो…पे… सारम्मणो, अत्थि तस्स आवट्टना…पे… पणिधीति? आमन्ता. रूपं विपाको, रूपं सुखवेदनियं दुक्खवेदनियं…पे… सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे….

रूपं विपाको, रूपं न सुखवेदनियं न दुक्खवेदनियं…पे… अनारम्मणं, नत्थि तस्स आवट्टना…पे… पणिधीति? आमन्ता. फस्सो विपाको, फस्सो न सुखवेदनियो न दुक्खवेदनियो…पे… अनारम्मणो, नत्थि तस्स आवट्टना…पे… पणिधीति? न हेवं वत्तब्बे…पे….

७६७. न वत्तब्बं – ‘‘रूपं विपाको’’ति? आमन्ता. ननु कम्मस्स कतत्ता उप्पन्ना चित्तचेतसिका धम्मा विपाकोति? आमन्ता. हञ्चि कम्मस्स कतत्ता उप्पन्ना चित्तचेतसिका धम्मा विपाको, तेन वत रे वत्तब्बे – ‘‘कम्मस्स कतत्ता उप्पन्नं रूपं विपाको’’ति.

रूपं विपाकोतिकथा निट्ठिता.