(१४६) २. अञ्ञमञ्ञपच्चयकथा

७१८. अविज्जापच्चयाव सङ्खारा, न वत्तब्बं – ‘‘सङ्खारपच्चयापि अविज्जा’’ति? आमन्ता. ननु अविज्जा सङ्खारेन सहजाताति? आमन्ता. हञ्चि अविज्जा सङ्खारेन सहजाता, तेन वत रे वत्तब्बे – ‘‘अविज्जापच्चयापि सङ्खारा, सङ्खारपच्चयापि अविज्जा’’ति.

तण्हापच्चयाव उपादानं, न वत्तब्बं – ‘‘उपादानपच्चयापि तण्हा’’ति? आमन्ता. ननु तण्हा उपादानेन सहजाताति? आमन्ता. हञ्चि तण्हा उपादानेन सहजाता, तेन वत रे वत्तब्बे – ‘‘तण्हापच्चयापि उपादानं, उपादानपच्चयापि तण्हा’’ति.

७१९. ‘‘जरामरणपच्चया, भिक्खवे, जाति, जातिपच्चया भवो’’ति – अत्थेव सुत्तन्तोति? नत्थि. तेन हि अविज्जापच्चयाव सङ्खारा, न वत्तब्बं – ‘‘सङ्खारपच्चयापि अविज्जा’’ति. तण्हापच्चयाव उपादानं, न वत्तब्बं – ‘‘उपादानपच्चयापि तण्हा’’ति.

‘‘विञ्ञाणपच्चया, भिक्खवे, नामरूपं, नामरूपपच्चयापि विञ्ञाण’’न्ति [दी. नि. २.५८, थोकं पन विसदिसं] – अत्थेव सुत्तन्तोति? आमन्ता. तेन हि अविज्जापच्चयापि सङ्खारा, सङ्खारपच्चयापि अविज्जा; तण्हापच्चयापि उपादानं, उपादानपच्चयापि तण्हाति.

अञ्ञमञ्ञपच्चयकथा निट्ठिता.