१५. पन्नरसमवग्गो

(१४७) ३. अद्धाकथा

७२०. अद्धा परिनिप्फन्नोति? आमन्ता. रूपन्ति? न हेवं वत्तब्बे…पे… वेदना…पे… सञ्ञा…पे… सङ्खारा…पे… विञ्ञाणन्ति? न हेवं वत्तब्बे…पे… अतीतो अद्धा परिनिप्फन्नोति? आमन्ता. रूपन्ति? न हेवं वत्तब्बे…पे… वेदना…पे… सञ्ञा…पे… सङ्खारा…पे… विञ्ञाणन्ति? न हेवं वत्तब्बे…पे… अनागतो अद्धा परिनिप्फन्नोति? आमन्ता. रूपन्ति? न हेवं वत्तब्बे…पे… वेदना…पे… सञ्ञा…पे… सङ्खारा…पे… विञ्ञाणन्ति? न हेवं वत्तब्बे…पे… पच्चुप्पन्नो अद्धा परिनिप्फन्नोति? आमन्ता. रूपन्ति? न हेवं वत्तब्बे…पे… वेदना…पे… सञ्ञा…पे… सङ्खारा…पे… विञ्ञाणन्ति? न हेवं वत्तब्बे…पे….

अतीतं रूपं वेदना सञ्ञा सङ्खारा विञ्ञाणं अतीतो अद्धाति? आमन्ता. अतीता पञ्चद्धाति? न हेवं वत्तब्बे…पे… अनागतं रूपं वेदना सञ्ञा सङ्खारा विञ्ञाणं अनागतो अद्धाति? आमन्ता. अनागता पञ्चद्धाति? न हेवं वत्तब्बे…पे… पच्चुप्पन्नं रूपं वेदना सञ्ञा सङ्खारा विञ्ञाणं पच्चुप्पन्नो अद्धाति? आमन्ता. पच्चुप्पन्ना पञ्चद्धाति? न हेवं वत्तब्बे…पे….

अतीता पञ्चक्खन्धा अतीतो अद्धा, अनागता पञ्चक्खन्धा अनागतो अद्धा, पच्चुप्पन्ना पञ्चक्खन्धा पच्चुप्पन्नो अद्धाति? आमन्ता. पन्नरसद्धाति? न हेवं वत्तब्बे…पे….

अतीतानि द्वादसायतनानि अतीतो अद्धा, अनागतानि द्वादसायतनानि अनागतो अद्धा, पच्चुप्पन्नानि द्वादसायतनानि पच्चुप्पन्नो अद्धाति? आमन्ता. छत्तिंस अद्धाति? न हेवं वत्तब्बे…पे….

अतीता अट्ठारस धातुयो अतीतो अद्धा, अनागता अट्ठारस धातुयो अनागतो अद्धा, पच्चुप्पन्ना अट्ठारस धातुयो पच्चुप्पन्नो अद्धाति? आमन्ता. चतुपञ्ञास अद्धाति? न हेवं वत्तब्बे…पे….

अतीतानि बावीसतिन्द्रियानि अतीतो अद्धा, अनागतानि बावीसतिन्द्रियानि अनागतो अद्धा, पच्चुप्पन्नानि बावीसतिन्द्रियानि पच्चुप्पन्नो अद्धाति? आमन्ता. छसट्ठि अद्धाति? न हेवं वत्तब्बे…पे….

७२१. न वत्तब्बं – ‘‘अद्धा परिनिप्फन्नोति? आमन्ता. ननु वुत्तं भगवता – ‘‘तीणिमानि, भिक्खवे, कथावत्थूनि! कतमानि तीणि? अतीतं वा, भिक्खवे, अद्धानं आरब्भ कथं कथेय्य – ‘एवं अहोसि अतीतमद्धान’न्ति; अनागतं वा, भिक्खवे, अद्धानं आरब्भ कथं कथेय्य – ‘एवं भविस्सति अनागतमद्धान’न्ति; एतरहि वा, भिक्खवे, पच्चुप्पन्नं अद्धानं आरब्भ कथं कथेय्य – ‘एवं होति एतरहि पच्चुप्पन्न’न्ति. इमानि खो, भिक्खवे, तीणि कथावत्थूनी’’ति [अ. नि. ३.६८; दी. नि. ३.३०५]. अत्थेव सुत्तन्तोति? आमन्ता. तेन हि अद्धा परिनिप्फन्नोति.

अद्धाकथा निट्ठिता.