१५. पन्नरसमवग्गो

(१५४) १०. असञ्ञसत्तुपिककथा

७३५. सञ्ञावेदयितनिरोधसमापत्ति असञ्ञसत्तुपिकाति? आमन्ता. अत्थि सञ्ञावेदयितनिरोधं समापन्नस्स अलोभो कुसलमूलं, अदोसो कुसलमूलं, अमोहो कुसलमूलं, सद्धा वीरियं सति समाधि पञ्ञाति? न हेवं वत्तब्बे…पे… नत्थि सञ्ञावेदयितनिरोधं समापन्नस्स अलोभो कुसलमूलं, अदोसो कुसलमूलं…पे… पञ्ञाति? आमन्ता. हञ्चि नत्थि सञ्ञावेदयितनिरोधं समापन्नस्स अलोभो कुसलमूलं, अदोसो कुसलमूलं, अमोहो कुसलमूलं, सद्धा वीरियं सति समाधि पञ्ञा, नो च वत रे वत्तब्बे – ‘‘सञ्ञावेदयितनिरोधसमापत्ति असञ्ञसत्तुपिका’’ति.

सञ्ञावेदयितनिरोधसमापत्ति असञ्ञसत्तुपिकाति? आमन्ता. अत्थि सञ्ञावेदयितनिरोधं समापन्नस्स फस्सो वेदना सञ्ञा चेतना चित्तन्ति? न हेवं वत्तब्बे…पे… नत्थि सञ्ञावेदयितनिरोधं समापन्नस्स फस्सो वेदना सञ्ञा चेतना चित्तन्ति? आमन्ता. अफस्सकस्स मग्गभावना…पे… अचित्तकस्स मग्गभावनाति? न हेवं वत्तब्बे…पे… ननु सफस्सकस्स मग्गभावना…पे… सचित्तकस्स मग्गभावनाति? आमन्ता. हञ्चि सफस्सकस्स मग्गभावना…पे… सचित्तकस्स मग्गभावना, नो च वत रे वत्तब्बे – ‘‘सञ्ञावेदयितनिरोधसमापत्ति असञ्ञसत्तुपिका’’ति.

सञ्ञावेदयितनिरोधसमापत्ति असञ्ञसत्तुपिकाति? आमन्ता. ये केचि सञ्ञावेदयितनिरोधं समापज्जन्ति, सब्बे ते असञ्ञसत्तुपिकाति? न हेवं वत्तब्बे…पे….

७३६. न वत्तब्बं – ‘‘सञ्ञावेदयितनिरोधसमापत्ति असञ्ञसत्तुपिका’’ति? आमन्ता. ननु इधापि असञ्ञी तत्रापि असञ्ञीति? आमन्ता. हञ्चि इधापि असञ्ञी तत्रापि असञ्ञी, तेन वत रे वत्तब्बे – ‘‘सञ्ञावेदयितनिरोधसमापत्ति असञ्ञसत्तुपिका’’ति.

असञ्ञसत्तुपिककथा निट्ठिता.