१३. तेरसमवग्गो

(१३४) ९. धम्मतण्हा अब्याकतातिकथा

६७६. धम्मतण्हा अब्याकताति? आमन्ता. विपाकाब्याकता किरियाब्याकता रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे….

धम्मतण्हा अब्याकताति? आमन्ता. रूपतण्हा अब्याकताति? न हेवं वत्तब्बे …पे… धम्मतण्हा अब्याकताति? आमन्ता. सद्दतण्हा…पे… गन्धतण्हा…पे… रसतण्हा…पे… फोट्ठब्बतण्हा अब्याकताति? न हेवं वत्तब्बे…पे….

रूपतण्हा अकुसलाति? आमन्ता. धम्मतण्हा अकुसलाति? न हेवं वत्तब्बे…पे… सद्दतण्हा…पे… फोट्ठब्बतण्हा अकुसलाति? आमन्ता. धम्मतण्हा अकुसलाति? न हेवं वत्तब्बे…पे….

६७७. धम्मतण्हा अब्याकताति? आमन्ता. ननु तण्हा अकुसला वुत्ता भगवताति? आमन्ता. हञ्चि तण्हा अकुसला वुत्ता भगवता, नो च वत रे वत्तब्बे – ‘‘धम्मतण्हा अब्याकता’’ति.

धम्मतण्हा अब्याकताति? आमन्ता. ननु लोभो अकुसलो वुत्तो भगवता, धम्मतण्हा लोभोति? आमन्ता. हञ्चि लोभो अकुसलो वुत्तो भगवता, धम्मतण्हा लोभो, नो च वत रे वत्तब्बे – ‘‘धम्मतण्हा अब्याकता’’ति.

६७८. धम्मतण्हा लोभो अब्याकतोति? आमन्ता. रूपतण्हा लोभो अब्याकतोति? न हेवं वत्तब्बे…पे… धम्मतण्हा लोभो अब्याकतोति? आमन्ता. सद्दतण्हा…पे… फोट्ठब्बतण्हा लोभो अब्याकतोति? न हेवं वत्तब्बे…पे….

रूपतण्हा लोभो अकुसलोति? आमन्ता. धम्मतण्हा लोभो अकुसलोति? न हेवं वत्तब्बे…पे… सद्दतण्हा…पे… फोट्ठब्बतण्हा लोभो अकुसलोति? आमन्ता. धम्मतण्हा लोभो अकुसलोति? न हेवं वत्तब्बे…पे….

६७९. धम्मतण्हा अब्याकताति? आमन्ता. ननु वुत्तं भगवता – ‘‘यायं तण्हा पोनोब्भविका नन्दीरागसहगता तत्रतत्राभिनन्दिनी, सेय्यथिदं – कामतण्हा, भवतण्हा, विभवतण्हा’’ति [महाव. १४; दी. नि. २.४००]! अत्थेव सुत्तन्तोति? आमन्ता. तेन हि न वत्तब्बं – ‘‘धम्मतण्हा अब्याकता’’ति.

६८०. न वत्तब्बं – ‘‘धम्मतण्हा अब्याकता’’ति? आमन्ता. ननु सा धम्मतण्हाति? आमन्ता. हञ्चि सा धम्मतण्हा, तेन वत रे वत्तब्बे – ‘‘धम्मतण्हा अब्याकता’’ति.

धम्मतण्हा अब्याकतातिकथा निट्ठिता.