(१३१) ६. सम्मुखीभूतकथा

६६८. सम्मुखीभूतो संयोजनं जहतीति? आमन्ता. रत्तो रागं जहति, दुट्ठो दोसं जहति, मूळ्हो मोहं जहति, किलिट्ठो किलेसे जहतीति? न हेवं वत्तब्बे…पे… रागेन रागं जहति, दोसेन दोसं जहति, मोहेन मोहं जहति, किलेसेहि किलेसे जहतीति? न हेवं वत्तब्बे…पे….

रागो चित्तसम्पयुत्तो, मग्गो चित्तसम्पयुत्तोति? आमन्ता. द्विन्नं फस्सानं…पे… द्विन्नं चित्तानं समोधानं होतीति? न हेवं वत्तब्बे…पे… रागो अकुसलो, मग्गो कुसलोति? आमन्ता. कुसलाकुसला सावज्जानवज्जा हीनपणीता कण्हसुक्कसप्पटिभागा धम्मा सम्मुखीभावं आगच्छन्तीति? न हेवं वत्तब्बे…पे….

६६९. कुसलाकुसला…पे… सम्मुखीभावं आगच्छन्तीति? आमन्ता. ननु वुत्तं भगवता – ‘‘चत्तारिमानि, भिक्खवे, सुविदूरविदूरानि! कतमानि चत्तारि? नभञ्च, भिक्खवे, पथवी च – इदं पठमं सुविदूरविदूरं…पे… तस्मा सतं धम्मो असब्भि आरका’’ति. अत्थेव सुत्तन्तोति? आमन्ता. तेन हि न वत्तब्बं – ‘‘कुसलाकुसला…पे… सम्मुखीभावं आगच्छन्ती’’ति.

सम्मुखीभूतो संयोजनं जहतीति? आमन्ता. ननु वुत्तं भगवता – ‘‘सो एवं समाहिते चित्ते…पे… आसवानं खयञाणाय चित्तं अभिनिन्नामेती’’ति! अत्थेव सुत्तन्तोति? आमन्ता. तेन हि न वत्तब्बं – ‘‘सम्मुखीभूतो संयोजनं जहती’’ति.

६७०. न वत्तब्बं – ‘‘सम्मुखीभूतो संयोजनं जहती’’ति? आमन्ता. ननु वुत्तं भगवता – ‘‘तस्स एवं जानतो एवं पस्सतो कामासवापि चित्तं विमुच्चति…पे… अविज्जासवापि चित्तं विमुच्चती’’ति! अत्थेव सुत्तन्तोति? आमन्ता. तेन हि सम्मुखीभूतो संयोजनं जहतीति.

सम्मुखीभूतकथा निट्ठिता.