८. अट्ठमवग्गो

(७८) ६. अरूपधातुकथा

५१७. अरूपिनो धम्मा अरूपधातूति? आमन्ता. वेदना भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि वेदनूपगं कम्मन्ति? न हेवं वत्तब्बे…पे… अत्थि वेदनूपगा सत्ताति? न हेवं वत्तब्बे…पे… वेदनाय सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… वेदनाय अत्थि वेदना सञ्ञा सङ्खारा विञ्ञाणन्ति? न हेवं वत्तब्बे…पे… वेदना चतुवोकारभवोति? न हेवं वत्तब्बे…पे….

अरूपधातु भवो गति…पे… अत्तभावपटिलाभोति? आमन्ता. वेदना भवो गति…पे… अत्तभावपटिलाभोति? न हेवं वत्तब्बे…पे… अत्थि अरूपधातूपगं कम्मन्ति? आमन्ता. अत्थि वेदनूपगं कम्मन्ति? न हेवं वत्तब्बे…पे… अत्थि अरूपधातूपगा सत्ताति? आमन्ता. अत्थि वेदनूपगा सत्ताति? न हेवं वत्तब्बे…पे….

अरूपधातुया सत्ता जायन्ति जीयन्ति मीयन्ति चवन्ति उपपज्जन्तीति? आमन्ता. वेदनाय सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… अरूपधातुया अत्थि वेदना सञ्ञा सङ्खारा विञ्ञाणन्ति? आमन्ता. वेदनाय अत्थि वेदना सञ्ञा सङ्खारा विञ्ञाणन्ति? न हेवं वत्तब्बे…पे… अरूपधातु चतुवोकारभवोति? आमन्ता. वेदना चतुवोकारभवोति? न हेवं वत्तब्बे…पे….

५१८. अरूपिनो धम्मा अरूपधातु, कामधातुया अत्थि वेदना सञ्ञा सङ्खारा विञ्ञाणन्ति? आमन्ता. साव कामधातु, सा अरूपधातूति? न हेवं वत्तब्बे…पे… साव कामधातु, सा अरूपधातूति? आमन्ता. कामभवेन समन्नागतो पुग्गलो द्वीहि भवेहि समन्नागतो होति – कामभवेन च अरूपभवेन चाति? न हेवं वत्तब्बे…पे….

रूपिनो धम्मा रूपधातु, अरूपिनो धम्मा अरूपधातु, कामधातुया अत्थि रूपं वेदना सञ्ञा सङ्खारा विञ्ञाणन्ति? आमन्ता. साव कामधातु, सा रूपधातु, सा अरूपधातूति? न हेवं वत्तब्बे…पे… साव कामधातु, सा रूपधातु, सा अरूपधातूति? आमन्ता. कामभवेन समन्नागतो पुग्गलो तीहि भवेहि समन्नागतो होति – कामभवेन च रूपभवेन च अरूपभवेन चाति? न हेवं वत्तब्बे…पे….

अरूपधातुकथा निट्ठिता.