८. अट्ठमवग्गो

(७९) ७. रूपधातुयाआयतनकथा

५१९. अत्थि सळायतनिको अत्तभावो रूपधातुयाति? आमन्ता. अत्थि तत्थ घानायतनन्ति? आमन्ता. अत्थि तत्थ गन्धायतनन्ति? न हेवं वत्तब्बे…पे… अत्थि तत्थ जिव्हायतनन्ति? आमन्ता. अत्थि तत्थ रसायतनन्ति? न हेवं वत्तब्बे…पे… अत्थि तत्थ कायायतनन्ति? आमन्ता. अत्थि तत्थ फोट्ठब्बायतनन्ति? न हेवं वत्तब्बे…पे….

नत्थि तत्थ गन्धायतनन्ति? आमन्ता. नत्थि तत्थ घानायतनन्ति? न हेवं वत्तब्बे…पे… नत्थि तत्थ रसायतनन्ति? आमन्ता. नत्थि तत्थ जिव्हायतनन्ति? न हेवं वत्तब्बे…पे… नत्थि तत्थ फोट्ठब्बायतनन्ति? आमन्ता. नत्थि तत्थ कायायतनन्ति? न हेवं वत्तब्बे…पे….

५२०. अत्थि तत्थ चक्खायतनं, अत्थि रूपायतनन्ति? आमन्ता. अत्थि तत्थ घानायतनं, अत्थि गन्धायतनन्ति? न हेवं वत्तब्बे…पे… अत्थि तत्थ चक्खायतनं, अत्थि रूपायतनन्ति? आमन्ता. अत्थि तत्थ जिव्हायतनं, अत्थि रसायतनं…पे… अत्थि तत्थ कायायतनं, अत्थि फोट्ठब्बायतनन्ति? न हेवं वत्तब्बे…पे… अत्थि तत्थ सोतायतनं, अत्थि सद्दायतनं…पे… अत्थि तत्थ मनायतनं, अत्थि धम्मायतनन्ति? आमन्ता. अत्थि तत्थ घानायतनं, अत्थि गन्धायतनन्ति? न हेवं वत्तब्बे…पे… अत्थि तत्थ मनायतनं, अत्थि धम्मायतनन्ति? आमन्ता. अत्थि तत्थ जिव्हायतनं, अत्थि रसायतनन्ति…पे… अत्थि तत्थ कायायतनं, अत्थि फोट्ठब्बायतनन्ति? न हेवं वत्तब्बे…पे….

अत्थि तत्थ घानायतनं, नत्थि गन्धायतनन्ति? आमन्ता. अत्थि तत्थ चक्खायतनं, नत्थि रूपायतनन्ति? न हेवं वत्तब्बे…पे… अत्थि तत्थ घानायतनं, नत्थि गन्धायतनन्ति? आमन्ता. अत्थि तत्थ सोतायतनं, नत्थि सद्दायतनं…पे… अत्थि तत्थ मनायतनं, नत्थि धम्मायतनन्ति? न हेवं वत्तब्बे…पे… अत्थि तत्थ जिव्हायतनं, नत्थि रसायतनं…पे… अत्थि तत्थ कायायतनं, नत्थि फोट्ठब्बायतनन्ति? आमन्ता. अत्थि तत्थ चक्खायतनं, नत्थि रूपायतनन्ति? न हेवं वत्तब्बे…पे… अत्थि तत्थ कायायतनं, नत्थि फोट्ठब्बायतनन्ति? आमन्ता. अत्थि तत्थ सोतायतनं, नत्थि सद्दायतनं …पे… अत्थि तत्थ मनायतनं, नत्थि धम्मायतनन्ति? न हेवं वत्तब्बे…पे….

५२१. अत्थि तत्थ चक्खायतनं अत्थि रूपायतनं, तेन चक्खुना तं रूपं पस्सतीति? आमन्ता. अत्थि तत्थ घानायतनं अत्थि गन्धायतनं, तेन घानेन तं गन्धं घायतीति? न हेवं वत्तब्बे…पे… अत्थि तत्थ चक्खायतनं अत्थि रूपायतनं, तेन चक्खुना तं रूपं पस्सतीति? आमन्ता. अत्थि तत्थ जिव्हायतनं अत्थि रसायतनं, ताय जिव्हाय तं रसं सायति…पे… अत्थि तत्थ कायायतनं अत्थि फोट्ठब्बायतनं, तेन कायेन तं फोट्ठब्बं फुसतीति? न हेवं वत्तब्बे…पे….

अत्थि तत्थ सोतायतनं अत्थि सद्दायतनं…पे… अत्थि तत्थ मनायतनं अत्थि धम्मायतनं, तेन मनेन तं धम्मं विजानातीति? आमन्ता. अत्थि तत्थ घानायतनं अत्थि गन्धायतनं, तेन घानेन तं गन्धं घायतीति? न हेवं वत्तब्बे…पे… अत्थि तत्थ मनायतनं अत्थि धम्मायतनं, तेन मनेन तं धम्मं विजानातीति? आमन्ता. अत्थि तत्थ जिव्हायतनं अत्थि रसायतनं…पे… अत्थि तत्थ कायायतनं अत्थि फोट्ठब्बायतनं, तेन कायेन तं फोट्ठब्बं फुसतीति? न हेवं वत्तब्बे…पे….

अत्थि तत्थ घानायतनं अत्थि गन्धायतनं, न च तेन घानेन तं गन्धं घायतीति? आमन्ता. अत्थि तत्थ चक्खायतनं अत्थि रूपायतनं, न च तेन चक्खुना तं रूपं पस्सतीति? न हेवं वत्तब्बे…पे… अत्थि तत्थ घानायतनं अत्थि गन्धायतनं, न च तेन घानेन तं गन्धं घायतीति? आमन्ता. अत्थि तत्थ सोतायतनं अत्थि सद्दायतनं…पे… अत्थि तत्थ मनायतनं अत्थि धम्मायतनं, न च तेन मनेन तं धम्मं विजानातीति? न हेवं वत्तब्बे…पे….

अत्थि तत्थ जिव्हायतनं अत्थि रसायतनं…पे… अत्थि तत्थ कायायतनं अत्थि फोट्ठब्बायतनं, न च तेन कायेन तं फोट्ठब्बं फुसतीति? आमन्ता. अत्थि तत्थ सोतायतनं अत्थि सद्दायतनं…पे… अत्थि तत्थ मनायतनं अत्थि धम्मायतनं, न च तेन मनेन तं धम्मं विजानातीति? न हेवं वत्तब्बे…पे….

५२२. अत्थि तत्थ घानायतनं अत्थि गन्धायतनं, तेन घानेन तं गन्धं घायतीति? आमन्ता. अत्थि तत्थ मूलगन्धो सारगन्धो तचगन्धो पत्तगन्धो पुप्फगन्धो फलगन्धो आमगन्धो विस्सगन्धो सुगन्धो दुग्गन्धोति? न हेवं वत्तब्बे…पे….

अत्थि तत्थ जिव्हायतनं अत्थि रसायतनं, ताय जिव्हाय तं रसं सायतीति? आमन्ता. अत्थि तत्थ मूलरसो खन्धरसो तचरसो पत्तरसो पुप्फरसो फलरसो अम्बिलं मधुरं तित्तकं कटुकं लोणियं खारियं लम्बिलं कसावो सादु असादूति? न हेवं वत्तब्बे…पे….

अत्थि तत्थ कायायतनं अत्थि फोट्ठब्बायतनं, तेन कायेन तं फोट्ठब्बं फुसतीति? आमन्ता. अत्थि तत्थ कक्खळं मुदुकं सण्हं फरुसं सुखसम्फस्सं दुक्खसम्फस्सं गरुकं लहुकन्ति? न हेवं वत्तब्बे…पे….

५२३. न वत्तब्बं – ‘‘सळायतनिको अत्तभावो रूपधातुया’’ति? आमन्ता. ननु अत्थि तत्थ घाननिमित्तं जिव्हानिमित्तं कायनिमित्तन्ति? आमन्ता. हञ्चि अत्थि तत्थ घाननिमित्तं जिव्हानिमित्तं कायनिमित्तं, तेन वत रे वत्तब्बे – ‘‘सळायतनिको अत्तभावो रूपधातुया’’ति.

रूपधातुया आयतनकथा निट्ठिता.