(७७) ५. रूपधातुकथा

५१५. रूपिनो धम्मा रूपधातूति? आमन्ता. रूपं भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि रूपूपगं कम्मन्ति? न हेवं वत्तब्बे…पे… अत्थि रूपूपगा सत्ताति? न हेवं वत्तब्बे…पे… रूपे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… रूपे अत्थि रूपं वेदना सञ्ञा सङ्खारा विञ्ञाणन्ति? न हेवं वत्तब्बे…पे… रूपं पञ्चवोकारभवोति? न हेवं वत्तब्बे…पे….

रूपधातु भवो गति…पे… अत्तभावपटिलाभोति? आमन्ता. रूपं भवो गति…पे… अत्तभावपटिलाभोति? न हेवं वत्तब्बे…पे… अत्थि रूपधातूपगं कम्मन्ति? आमन्ता. अत्थि रूपूपगं कम्मन्ति? न हेवं वत्तब्बे…पे… अत्थि रूपधातूपगा सत्ताति? आमन्ता. अत्थि रूपूपगा सत्ताति? न हेवं वत्तब्बे…पे….

रूपधातुया सत्ता जायन्ति जीयन्ति मीयन्ति चवन्ति उपपज्जन्तीति? आमन्ता. रूपे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… रूपधातुया अत्थि रूपं वेदना सञ्ञा सङ्खारा विञ्ञाणन्ति? आमन्ता. रूपे अत्थि रूपं वेदना सञ्ञा सङ्खारा विञ्ञाणन्ति? न हेवं वत्तब्बे…पे… रूपधातु पञ्चवोकारभवोति? आमन्ता. रूपं पञ्चवोकारभवोति? न हेवं वत्तब्बे…पे….

५१६. रूपिनो धम्मा रूपधातु, कामधातुया अत्थि रूपन्ति? आमन्ता. साव कामधातु, सा रूपधातूति? न हेवं वत्तब्बे…पे… साव कामधातु, सा रूपधातूति? आमन्ता. कामभवेन समन्नागतो पुग्गलो द्वीहि भवेहि समन्नागतो होति – कामभवेन च रूपभवेन चाति? न हेवं वत्तब्बे.

रूपधातुकथा निट्ठिता.