(७३) १. छगतिकथा

५०३. छ गतियोति? आमन्ता. ननु पञ्च गतियो वुत्ता भगवता – निरयो, तिरच्छानयोनि, पेत्तिविसयो, मनुस्सा, देवाति [म. नि. १.१५३]? आमन्ता. हञ्चि पञ्च गतियो वुत्ता भगवता – निरयो, तिरच्छानयोनि, पेत्तिविसयो, मनुस्सा, देवा; नो च वत रे वत्तब्बे – ‘‘छ गतियो’’ति.

छ गतियोति? आमन्ता. ननु कालकञ्चिका [कालकञ्जिका (सी. स्या. कं.), काळकञ्जका (पी.)] सुरा पेतानं समानवण्णा समानभोगा समानाहारा समानायुका पेतेहि सह आवाहविवाहं गच्छन्तीति? आमन्ता. हञ्चि कालकञ्चिका असुरा पेतानं समानवण्णा समानभोगा समानाहारा समानायुका पेतेहि सह आवाहविवाहं गच्छन्ति, नो च वत रे वत्तब्बे – ‘‘छ गतियो’’ति.

छ गतियोति? आमन्ता. ननु वेपचित्तिपरिसा देवानं समानवण्णा समानभोगा समानाहारा समानायुका देवेहि सह आवाहविवाहं गच्छन्तीति? आमन्ता. हञ्चि वेपचित्तिपरिसा देवानं समानवण्णा समानभोगा समानाहारा समानायुका देवेहि सह आवाहविवाहं गच्छन्ति, नो च वत रे वत्तब्बे – ‘‘छ गतियो’’ति.

छ गतियोति? आमन्ता. ननु वेपचित्तिपरिसा पुब्बदेवाति? आमन्ता. हञ्चि वेपचित्तिपरिसा पुब्बदेवा, नो च वत रे वत्तब्बे – ‘‘छ गतियो’’ति.

५०४. न वत्तब्बं – ‘‘छ गतियो’’ति? आमन्ता. ननु अत्थि असुरकायोति, आमन्ता. हञ्चि अत्थि असुरकायो, तेन वत रे वत्तब्बे – ‘‘छ गतियो’’ति.

छगतिकथा निट्ठिता.