८. अट्ठमवग्गो

(७४) २. अन्तराभवकथा

५०५. अत्थि अन्तराभवोति? आमन्ता. कामभवोति? न हेवं वत्तब्बे…पे… अत्थि अन्तराभवोति? आमन्ता. रूपभवोति? न हेवं वत्तब्बे…पे… अत्थि अन्तराभवोति? आमन्ता. अरूपभवोति? न हेवं वत्तब्बे…पे… अत्थि अन्तराभवोति? आमन्ता. कामभवस्स च रूपभवस्स च अन्तरे अत्थि अन्तराभवोति? न हेवं वत्तब्बे…पे… अत्थि अन्तराभवोति? आमन्ता. रूपभवस्स च अरूपभवस्स च अन्तरे अत्थि अन्तराभवोति? न हेवं वत्तब्बे…पे….

कामभवस्स च रूपभवस्स च अन्तरे नत्थि अन्तराभवोति? आमन्ता. हञ्चि कामभवस्स च रूपभवस्स च अन्तरे नत्थि अन्तराभवो, नो च वत रे वत्तब्बे – ‘‘अत्थि अन्तराभवो’’ति. रूपभवस्स च अरूपभवस्स च अन्तरे नत्थि अन्तराभवोति? आमन्ता. हञ्चि रूपभवस्स च अरूपभवस्स च अन्तरे नत्थि अन्तराभवो, नो च वत रे वत्तब्बे – ‘‘अत्थि अन्तराभवो’’ति.

५०६. अत्थि अन्तराभवोति? आमन्ता. पञ्चमी सा योनि, छट्ठमी सा गति, अट्ठमी सा विञ्ञाणट्ठिति, दसमो सो सत्तावासोति? न हेवं वत्तब्बे…पे… अत्थि अन्तराभवोति? आमन्ता. अन्तराभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि अन्तराभवूपगं कम्मन्ति? न हेवं वत्तब्बे…पे… अत्थि अन्तराभवूपगा सत्ताति? न हेवं वत्तब्बे…पे… अन्तराभवे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… अन्तराभवे अत्थि रूपं वेदना सञ्ञा सङ्खारा विञ्ञाणन्ति? न हेवं वत्तब्बे…पे… अन्तराभवो पञ्चवोकारभवोति? न हेवं वत्तब्बे…पे….

५०७. अत्थि कामभवो, कामभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? आमन्ता. अत्थि अन्तराभवो, अन्तराभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि कामभवूपगं कम्मन्ति? आमन्ता. अत्थि अन्तराभवूपगं कम्मन्ति? न हेवं वत्तब्बे…पे… अत्थि कामभवूपगा सत्ताति? आमन्ता. अत्थि अन्तराभवूपगा सत्ताति? न हेवं वत्तब्बे…पे… कामभवे सत्ता जायन्ति जीयन्ति मीयन्ति चवन्ति उपपज्जन्तीति? आमन्ता. अन्तराभवे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… कामभवे अत्थि रूपं वेदना सञ्ञा सङ्खारा विञ्ञाणन्ति? आमन्ता. अन्तराभवे अत्थि रूपं वेदना सञ्ञा सङ्खारा विञ्ञाणन्ति? न हेवं वत्तब्बे…पे… कामभवो पञ्चवोकारभवोति? आमन्ता. अन्तराभवो पञ्चवोकारभवोति? न हेवं वत्तब्बे…पे….

अत्थि रूपभवो, रूपभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? आमन्ता. अत्थि अन्तराभवो, अन्तराभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि रूपभवूपगं कम्मन्ति? आमन्ता. अत्थि अन्तराभवूपगं कम्मन्ति? न हेवं वत्तब्बे…पे… अत्थि रूपभवूपगा सत्ताति? आमन्ता. अत्थि अन्तराभवूपगा सत्ताति? न हेवं वत्तब्बे…पे… रूपभवे सत्ता जायन्ति जीयन्ति मीयन्ति चवन्ति उपपज्जन्तीति? आमन्ता. अन्तराभवे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… रूपभवे अत्थि रूपं वेदना सञ्ञा सङ्खारा विञ्ञाणन्ति? आमन्ता. अन्तराभवे अत्थि रूपं वेदना सञ्ञा सङ्खारा विञ्ञाणन्ति? न हेवं वत्तब्बे…पे… रूपभवो पञ्चवोकारभवोति? आमन्ता. अन्तराभवो पञ्चवोकारभवोति? न हेवं वत्तब्बे…पे….

अत्थि अरूपभवो, अरूपभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? आमन्ता. अत्थि अन्तराभवो, अन्तराभवो भवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… अत्थि अरूपभवूपगं कम्मन्ति? आमन्ता. अत्थि अन्तराभवूपगं कम्मन्ति? न हेवं वत्तब्बे…पे… अत्थि अरूपभवूपगा सत्ताति? आमन्ता. अत्थि अन्तराभवूपगा सत्ताति? न हेवं वत्तब्बे…पे… अरूपभवे सत्ता जायन्ति जीयन्ति मीयन्ति चवन्ति उपपज्जन्तीति? आमन्ता. अन्तराभवे सत्ता जायन्ति जीयन्ति मीयन्ति चवन्ति उपपज्जन्तीति? न हेवं वत्तब्बे…पे… अरूपभवे अत्थि वेदना सञ्ञा सङ्खारा विञ्ञाणन्ति? आमन्ता. अन्तराभवे अत्थि वेदना सञ्ञा सङ्खारा विञ्ञाणन्ति? न हेवं वत्तब्बे…पे… अरूपभवो चतुवोकारभवोति? आमन्ता. अन्तराभवो चतुवोकारभवोति? न हेवं वत्तब्बे…पे….

५०८. अत्थि अन्तराभवोति? आमन्ता. सब्बेसञ्ञेव सत्तानं अत्थि अन्तराभवोति? न हेवं वत्तब्बे …पे… सब्बेसञ्ञेव सत्तानं नत्थि अन्तराभवोति? आमन्ता. हञ्चि सब्बेसञ्ञेव सत्तानं नत्थि अन्तराभवो, नो च वत रे वत्तब्बे – ‘‘अत्थि अन्तराभवो’’ति.

अत्थि अन्तराभवोति? आमन्ता. आनन्तरियस्स पुग्गलस्स अत्थि अन्तराभवोति? न हेवं वत्तब्बे…पे… आनन्तरियस्स पुग्गलस्स नत्थि अन्तराभवोति? आमन्ता. हञ्चि आनन्तरियस्स पुग्गलस्स नत्थि अन्तराभवो, नो च वत रे वत्तब्बे – ‘‘अत्थि अन्तराभवो’’ति.

न आनन्तरियस्स पुग्गलस्स अत्थि अन्तराभवोति? आमन्ता. आनन्तरियस्स पुग्गलस्स अत्थि अन्तराभवोति? न हेवं वत्तब्बे…पे… आनन्तरियस्स पुग्गलस्स नत्थि अन्तराभवोति? आमन्ता. न आनन्तरियस्स पुग्गलस्स नत्थि अन्तराभवोति? न हेवं वत्तब्बे…पे… निरयूपगस्स पुग्गलस्स…पे… असञ्ञसत्तूपगस्स पुग्गलस्स …पे… अरूपूपगस्स पुग्गलस्स अत्थि अन्तराभवोति? न हेवं वत्तब्बे…पे… अरूपूपगस्स पुग्गलस्स नत्थि अन्तराभवोति? आमन्ता. हञ्चि अरूपूपगस्स पुग्गलस्स नत्थि अन्तराभवो, नो च वत रे वत्तब्बे – ‘‘अत्थि अन्तराभवो’’ति.

न अरूपूपगस्स पुग्गलस्स अत्थि अन्तराभवोति? आमन्ता. अरूपूपगस्स पुग्गलस्स अत्थि अन्तराभवोति? न हेवं वत्तब्बे…पे… अरूपूपगस्स पुग्गलस्स नत्थि अन्तराभवोति? आमन्ता. न अरूपूपगस्स पुग्गलस्स नत्थि अन्तराभवोति? न हेवं वत्तब्बे…पे….

५०९. न वत्तब्बं अत्थि अन्तराभवोति? आमन्ता. ननु अन्तरापरिनिब्बायी पुग्गलो अत्थीति? आमन्ता. हञ्चि अन्तरापरिनिब्बायी पुग्गलो अत्थि, तेन वत रे [नो च वत रे (सी. क.), नो वत रे (स्या.)] वत्तब्बे – ‘‘अत्थि अन्तराभवो’’ति.

अन्तरापरिनिब्बायी पुग्गलो अत्थीति कत्वा अत्थि अन्तराभवोति? आमन्ता. उपहच्चपरिनिब्बायी पुग्गलो अत्थीति कत्वा अत्थि उपहच्चभवोति? न हेवं वत्तब्बे…पे… अन्तरापरिनिब्बायी पुग्गलो अत्थीति कत्वा अत्थि अन्तराभवोति? आमन्ता. असङ्खारपरिनिब्बायी पुग्गलो…पे… ससङ्खारपरिनिब्बायी पुग्गलो अत्थीति कत्वा अत्थि ससङ्खारभवोति? न हेवं वत्तब्बे…पे….

अन्तराभवकथा निट्ठिता.