(७०) ८. जरामरणं विपाकोतिकथा

४९५. जरामरणं विपाकोति? आमन्ता. सुखवेदनियं दुक्खवेदनियं अदुक्खमसुखवेदनियं, सुखाय वेदनाय सम्पयुत्तं, दुक्खाय वेदनाय सम्पयुत्तं, अदुक्खमसुखाय वेदनाय सम्पयुत्तं, फस्सेन सम्पयुत्तं, वेदनाय सम्पयुत्तं, सञ्ञाय सम्पयुत्तं, चेतनाय सम्पयुत्तं, चित्तेन सम्पयुत्तं, सारम्मणं; अत्थि तस्स आवट्टना आभोगो समन्नाहारो मनसिकारो चेतना पत्थना पणिधीति? न हेवं वत्तब्बे…पे… ननु न सुखवेदनियं न दुक्खवेदनियं…पे… अनारम्मणं; नत्थि तस्स आवट्टना…पे… पणिधीति? आमन्ता. हञ्चि न सुखवेदनियं न दुक्खवेदनियं…पे… अनारम्मणं; नत्थि तस्स आवट्टना …पे… पणिधि, नो च वत रे वत्तब्बे – ‘‘जरामरणं विपाको’’ति.

फस्सो विपाको, फस्सो सुखवेदनियो दुक्खवेदनियो…पे… सारम्मणो; अत्थि तस्स आवट्टना…पे… पणिधीति? आमन्ता. जरामरणं विपाको, जरामरणं सुखवेदनियं दुक्खवेदनियं…पे… सारम्मणं; अत्थि तस्स आवट्टना…पे… पणिधीति? न हेवं वत्तब्बे…पे….

जरामरणं विपाको, जरामरणं न सुखवेदनियं न दुक्खवेदनियं…पे… अनारम्मणं; नत्थि तस्स आवट्टना…पे… पणिधीति? आमन्ता. फस्सो विपाको, फस्सो न सुखवेदनियो न दुक्खवेदनियो…पे… अनारम्मणो; नत्थि तस्स आवट्टना…पे… पणिधीति? न हेवं वत्तब्बे…पे….

४९६. अकुसलानं धम्मानं जरामरणं, अकुसलानं धम्मानं विपाकोति? आमन्ता. कुसलानं धम्मानं जरामरणं, कुसलानं धम्मानं विपाकोति? न हेवं वत्तब्बे…पे….

कुसलानं धम्मानं जरामरणं, न वत्तब्बं – ‘‘कुसलानं धम्मानं विपाको’’ति? आमन्ता. अकुसलानं धम्मानं जरामरणं, न वत्तब्बं – ‘‘अकुसलानं धम्मानं विपाको’’ति? न हेवं वत्तब्बे…पे….

कुसलानं धम्मानं जरामरणं, अकुसलानं धम्मानं विपाकोति? आमन्ता. अकुसलानं धम्मानं जरामरणं, कुसलानं धम्मानं विपाकोति? न हेवं वत्तब्बे…पे….

अकुसलानं धम्मानं जरामरणं, न वत्तब्बं – ‘‘कुसलानं धम्मानं विपाको’’ति? आमन्ता. कुसलानं धम्मानं जरामरणं, न वत्तब्बं – ‘‘अकुसलानं धम्मानं विपाको’’ति? न हेवं वत्तब्बे…पे….

कुसलानञ्च अकुसलानञ्च धम्मानं जरामरणं, अकुसलानं धम्मानं विपाकोति? आमन्ता. कुसलानञ्च अकुसलानञ्च धम्मानं जरामरणं, कुसलानं धम्मानं विपाकोति? न हेवं वत्तब्बे…पे….

कुसलानञ्च अकुसलानञ्च धम्मानं जरामरणं, न वत्तब्बं – ‘‘कुसलानं धम्मानं विपाको’’ति? आमन्ता. कुसलानञ्च अकुसलानञ्च धम्मानं जरामरणं, न वत्तब्बं – ‘‘अकुसलानं धम्मानं विपाको’’ति? न हेवं वत्तब्बे…पे….

४९७. न वत्तब्बं – ‘‘जरामरणं विपाको’’ति? आमन्ता. ननु अत्थि दुब्बण्णसंवत्तनियं कम्मं अप्पायुकसंवत्तनियं कम्मन्ति? आमन्ता. हञ्चि अत्थि दुब्बण्णसंवत्तनियं कम्मं अप्पायुकसंवत्तनियं कम्मं, तेन वत रे वत्तब्बे – ‘‘जरामरणं विपाको’’ति.

जरामरणं विपाकोतिकथा निट्ठिता.