७. सत्तमवग्गो

(७१) ९. अरियधम्मविपाककथा

४९८. नत्थि अरियधम्मविपाकोति? आमन्ता. ननु महप्फलं सामञ्ञं महप्फलं ब्रह्मञ्ञन्ति? आमन्ता. हञ्चि महप्फलं सामञ्ञं महप्फलं ब्रह्मञ्ञं, नो च वत रे वत्तब्बे – ‘‘नत्थि अरियधम्मविपाको’’ति.

नत्थि अरियधम्मविपाकोति? आमन्ता. ननु अत्थि सोतापत्तिफलन्ति? आमन्ता. हञ्चि अत्थि सोतापत्तिफलं, नो च वत रे वत्तब्बे – ‘‘नत्थि अरियधम्मविपाको’’ति. ननु अत्थि सकदागामिफलं…पे… अनागामिफलं…पे… अरहत्तफलन्ति? आमन्ता. हञ्चि अत्थि अरहत्तफलं, नो च वत रे वत्तब्बे – ‘‘नत्थि अरियधम्मविपाको’’ति.

सोतापत्तिफलं न विपाकोति? आमन्ता. दानफलं न विपाकोति? न हेवं वत्तब्बे…पे… सोतापत्तिफलं न विपाकोति? आमन्ता. सीलफलं…पे… भावनाफलं न विपाकोति? न हेवं वत्तब्बे…पे….

सकदागामिफलं…पे… अनागामिफलं…पे… अरहत्तफलं न विपाकोति? आमन्ता. दानफलं न विपाकोति? न हेवं वत्तब्बे…पे… अरहत्तफलं न विपाकोति? आमन्ता. सीलफलं…पे… भावनाफलं न विपाकोति? न हेवं वत्तब्बे…पे… दानफलं विपाकोति? आमन्ता. सोतापत्तिफलं विपाकोति? न हेवं वत्तब्बे…पे….

दानफलं विपाकोति? आमन्ता. सकदागामिफलं…पे… अनागामिफलं…पे… अरहत्तफलं विपाकोति? न हेवं वत्तब्बे…पे… सीलफलं…पे… भावनाफलं विपाकोति? आमन्ता. सोतापत्तिफलं विपाकोति? न हेवं वत्तब्बे…पे… भावनाफलं विपाकोति? आमन्ता. सकदागामिफलं…पे… अनागामिफलं …पे… अरहत्तफलं विपाकोति? न हेवं वत्तब्बे…पे….

४९९. कामावचरं कुसलं सविपाकन्ति? आमन्ता. लोकुत्तरं कुसलं सविपाकन्ति? न हेवं वत्तब्बे…पे… रूपावचरं कुसलं…पे… अरूपावचरं कुसलं सविपाकन्ति? आमन्ता. लोकुत्तरं कुसलं सविपाकन्ति? न हेवं वत्तब्बे…पे….

लोकुत्तरं कुसलं अविपाकन्ति? आमन्ता. कामावचरं कुसलं अविपाकन्ति? न हेवं वत्तब्बे…पे… लोकुत्तरं कुसलं अविपाकन्ति? आमन्ता. रूपावचरं…पे… अरूपावचरं कुसलं अविपाकन्ति? न हेवं वत्तब्बे…पे….

५००. कामावचरं कुसलं सविपाकं आचयगामीति? आमन्ता. लोकुत्तरं कुसलं सविपाकं आचयगामीति? न हेवं वत्तब्बे…पे… रूपावचरं…पे… अरूपावचरं कुसलं सविपाकं आचयगामीति? आमन्ता. लोकुत्तरं कुसलं सविपाकं आचयगामीति? न हेवं वत्तब्बे…पे….

लोकुत्तरं कुसलं सविपाकं अपचयगामीति? आमन्ता. कामावचरं कुसलं सविपाकं अपचयगामीति? न हेवं वत्तब्बे…पे…. लोकुत्तरं कुसलं सविपाकं अपचयगामीति? आमन्ता. रूपावचरं…पे… अरूपावचरं कुसलं सविपाकं अपचयगामीति? न हेवं वत्तब्बे…पे….

अरियधम्मविपाककथा निट्ठिता.