४. चतुत्थवग्गो

(३६) ४. समन्नागतकथा

३९३. अरहा चतूहि फलेहि समन्नागतोति? आमन्ता. अरहा चतूहि फस्सेहि चतूहि वेदनाहि चतूहि सञ्ञाहि चतूहि चेतनाहि चतूहि चित्तेहि चतूहि सद्धाहि चतूहि वीरियेहि चतूहि सतीहि चतूहि समाधीहि चतूहि पञ्ञाहि समन्नागतोति? न हेवं वत्तब्बे…पे….

अनागामी तीहि फलेहि समन्नागतोति? आमन्ता. अनागामी तीहि फस्सेहि…पे… तीहि पञ्ञाहि समन्नागतोति? न हेवं वत्तब्बे…पे….

सकदागामी द्वीहि फलेहि समन्नागतोति? आमन्ता. सकदागामी द्वीहि फस्सेहि…पे… द्वीहि पञ्ञाहि समन्नागतोति? न हेवं वत्तब्बे…पे….

अरहा सोतापत्तिफलेन समन्नागतोति? आमन्ता. अरहा सोतापन्नो सत्तक्खत्तुपरमो, कोलङ्कोलो, एकबीजीति? न हेवं वत्तब्बे…पे… अरहा सकदागामिफलेन समन्नागतोति? आमन्ता. अरहा सकदागामीति? न हेवं वत्तब्बे …पे… अरहा अनागामिफलेन समन्नागतोति? आमन्ता. अरहा अनागामी, अन्तरापरिनिब्बायी, उपहच्चपरिनिब्बायी, असङ्खारपरिनिब्बायी, ससङ्खारपरिनिब्बायी, उद्धंसोतो अकनिट्ठगामीति? न हेवं वत्तब्बे…पे….

अनागामी सोतापत्तिफलेन समन्नागतोति? आमन्ता. अनागामी सोतापन्नो सत्तक्खत्तुपरमो, कोलङ्कोलो, एकबीजीति? न हेवं वत्तब्बे …पे… अनागामी सकदागामिफलेन समन्नागतोति? आमन्ता. अनागामी सकदागामीति? न हेवं वत्तब्बे…पे….

सकदागामी सोतापत्तिफलेन समन्नागतोति? आमन्ता. सकदागामी सोतापन्नो सत्तक्खत्तुपरमो, कोलङ्कोलो, एकबीजीति? न हेवं वत्तब्बे…पे….

३९४. सोतापत्तिफलेन समन्नागतो ‘‘सोतापन्नो’’ति वत्तब्बोति? आमन्ता. अरहा सोतापत्तिफलेन समन्नागतोति? आमन्ता. स्वेव अरहा, सो सोतापन्नोति? न हेवं वत्तब्बे…पे….

सकदागामिफलेन समन्नागतो ‘‘सकदागामी’’ति वत्तब्बोति? आमन्ता. अरहा सकदागामिफलेन समन्नागतोति? आमन्ता. स्वेव अरहा, सो सकदागामीति? न हेवं वत्तब्बे…पे….

अनागामिफलेन समन्नागतो ‘‘अनागामी’’ति वत्तब्बोति? आमन्ता. अरहा अनागामिफलेन समन्नागतोति? आमन्ता. स्वेव अरहा, सो अनागामीति? न हेवं वत्तब्बे…पे….

सोतापत्तिफलेन समन्नागतो ‘‘सोतापन्नो’’ति वत्तब्बोति? आमन्ता. अनागामी सोतापत्तिफलेन समन्नागतोति? आमन्ता. स्वेव अनागामी, सो सोतापन्नोति? न हेवं वत्तब्बे…पे….

सकदागामिफलेन समन्नागतो ‘‘सकदागामी’’ति वत्तब्बोति? आमन्ता. अनागामी सकदागामिफलेन समन्नागतोति? आमन्ता. स्वेव अनागामी, सो सकदागामीति? न हेवं वत्तब्बे…पे….

सोतापत्तिफलेन समन्नागतो ‘‘सोतापन्नो’’ति वत्तब्बोति? आमन्ता. सकदागामी सोतापत्तिफलेन समन्नागतोति? आमन्ता. स्वेव सकदागामी, सो सोतापन्नोति? न हेवं वत्तब्बे…पे….

३९५. अरहा सोतापत्तिफलेन समन्नागतोति? आमन्ता. ननु अरहा सोतापत्तिफलं वीतिवत्तोति? आमन्ता. हञ्चि अरहा सोतापत्तिफलं वीतिवत्तो, नो च वत रे वत्तब्बे – ‘‘अरहा सोतापत्तिफलेन समन्नागतो’’ति.

अरहा सोतापत्तिफलं वीतिवत्तो तेन समन्नागतोति? आमन्ता. अरहा सोतापत्तिमग्गं वीतिवत्तो, सक्कायदिट्ठिं विचिकिच्छं सीलब्बतपरामासं, अपायगमनीयं रागं, अपायगमनीयं दोसं, अपायगमनीयं मोहं वीतिवत्तो तेन समन्नागतोति? न हेवं वत्तब्बे…पे….

अरहा सकदागामिफलेन समन्नागतोति? आमन्ता. ननु अरहा सकदागामिफलं वीतिवत्तोति? आमन्ता. हञ्चि अरहा सकदागामिफलं वीतिवत्तो, नो च वत रे वत्तब्बे – ‘‘अरहा सकदागामिफलेन समन्नागतो’’ति.

अरहा सकदागामिफलं वीतिवत्तो तेन समन्नागतोति? आमन्ता. अरहा सकदागामिमग्गं वीतिवत्तो, ओळारिकं कामरागं, ओळारिकं ब्यापादं वीतिवत्तो तेन समन्नागतोति? न हेवं वत्तब्बे…पे….

अरहा अनागामिफलेन समन्नागतोति? आमन्ता. ननु अरहा अनागामिफलं वीतिवत्तोति? आमन्ता. हञ्चि अरहा अनागामिफलं वीतिवत्तो, नो च वत रे वत्तब्बे – ‘‘अरहा अनागामिफलेन समन्नागतो’’ति.

अरहा अनागामिफलं वीतिवत्तो तेन समन्नागतोति? आमन्ता. अरहा अनागामिमग्गं वीतिवत्तो, अणुसहगतं कामरागं, अणुसहगतं ब्यापादं वीतिवत्तो तेन समन्नागतोति? न हेवं वत्तब्बे…पे….

अनागामी सोतापत्तिफलेन समन्नागतोति? आमन्ता. ननु अनागामी सोतापत्तिफलं वीतिवत्तोति? आमन्ता. हञ्चि अनागामी सोतापत्तिफलं वीतिवत्तो, नो च वत रे वत्तब्बे – ‘‘अनागामी सोतापत्तिफलेन समन्नागतो’’ति.

अनागामी सोतापत्तिफलं वीतिवत्तो तेन समन्नागतोति? आमन्ता. अनागामी सोतापत्तिमग्गं वीतिवत्तो, सक्कायदिट्ठिं…पे… अपायगमनीयं मोहं वीतिवत्तो तेन समन्नागतोति? न हेवं वत्तब्बे…पे….

अनागामी सकदागामिफलेन समन्नागतोति? आमन्ता. ननु अनागामी सकदागामिफलं वीतिवत्तोति? आमन्ता. हञ्चि अनागामी सकदागामिफलं वीतिवत्तो, नो च वत रे वत्तब्बे – ‘‘अनागामी सकदागामिफलेन समन्नागतो’’ति.

अनागामी सकदागामिफलं वीतिवत्तो तेन समन्नागतोति? आमन्ता. अनागामी सकदागामिमग्गं वीतिवत्तो, ओळारिकं कामरागं, ओळारिकं ब्यापादं वीतिवत्तो तेन समन्नागतोति? न हेवं वत्तब्बे…पे….

सकदागामी सोतापत्तिफलेन समन्नागतोति? आमन्ता. ननु सकदागामी सोतापत्तिफलं वीतिवत्तोति? आमन्ता. हञ्चि सकदागामी सोतापत्तिफलं वीतिवत्तो, नो च वत रे वत्तब्बे – ‘‘सकदागामी सोतापत्तिफलेन समन्नागतो’’ति.

सकदागामी सोतापत्तिफलं वीतिवत्तो तेन समन्नागतोति? आमन्ता. सकदागामी सोतापत्तिमग्गं वीतिवत्तो, सक्कायदिट्ठिं…पे… अपायगमनीयं मोहं वीतिवत्तो तेन समन्नागतोति? न हेवं वत्तब्बे…पे….

३९६. न वत्तब्बं – ‘‘अरहा चतूहि फलेहि समन्नागतो’’ति? आमन्ता. ननु अरहता चत्तारि फलानि पटिलद्धानि, तेहि च अपरिहीनोति? आमन्ता. हञ्चि अरहता चत्तारि फलानि पटिलद्धानि तेहि च अपरिहीनो, तेन वत रे वत्तब्बे – ‘‘अरहा चतूहि फलेहि समन्नागतो’’ति.

न वत्तब्बं – ‘‘अनागामी तीहि फलेहि समन्नागतो’’ति? आमन्ता. ननु अनागामिना तीणि फलानि पटिलद्धानि, तेहि च अपरिहीनोति? आमन्ता. हञ्चि अनागामिना तीणि फलानि पटिलद्धानि तेहि च अपरिहीनो, तेन वत रे वत्तब्बे – ‘‘अनागामी तीहि फलेहि समन्नागतो’’ति.

न वत्तब्बं – ‘‘सकदागामी द्वीहि फलेहि समन्नागतो’’ति? आमन्ता. ननु सकदागामिना द्वे फलानि पटिलद्धानि, तेहि च अपरिहीनोति? आमन्ता. हञ्चि सकदागामिना द्वे फलानि पटिलद्धानि तेहि च अपरिहीनो, तेन वत रे वत्तब्बे – ‘‘सकदागामी द्वीहि फलेहि समन्नागतो’’ति.

अरहता चत्तारि फलानि पटिलद्धानि तेहि च अपरिहीनोति, अरहा चतूहि फलेहि समन्नागतोति? आमन्ता. अरहता चत्तारो मग्गा पटिलद्धा तेहि च अपरिहीनोति, अरहा चतूहि मग्गेहि समन्नागतोति? न हेवं वत्तब्बे…पे….

अनागामिना तीणि फलानि पटिलद्धानि तेहि च अपरिहीनोति, अनागामी तीहि फलेहि समन्नागतोति? आमन्ता. अनागामिना तयो मग्गा पटिलद्धा तेहि च अपरिहीनोति, अनागामी तीहि मग्गेहि समन्नागतोति? न हेवं वत्तब्बे…पे….

सकदागामिना द्वे फलानि पटिलद्धानि तेहि च अपरिहीनोति, सकदागामी द्वीहि फलेहि समन्नागतोति? आमन्ता. सकदागामिना द्वे मग्गा पटिलद्धा, तेहि च अपरिहीनोति, सकदागामी द्वीहि मग्गेहि समन्नागतोति? न हेवं वत्तब्बे…पे….

समन्नागतकथा निट्ठिता.