(३४) २. उपपत्तिकथा

३८८. सह उपपत्तिया अरहाति? आमन्ता. सह उपपत्तिया सोतापन्नो होतीति? न हेवं वत्तब्बे…पे….

सह उपपत्तिया अरहाति? आमन्ता. सह उपपत्तिया सकदागामी होतीति? न हेवं वत्तब्बे…पे….

सह उपपत्तिया अरहाति? आमन्ता. सह उपपत्तिया अनागामी होतीति? न हेवं वत्तब्बे…पे….

सह उपपत्तिया सोतापन्नो न होतीति? आमन्ता. हञ्चि सह उपपत्तिया सोतापन्नो न होति, नो च वत रे वत्तब्बे – ‘‘सह उपपत्तिया अरहा’’ति.

सह उपपत्तिया सकदागामी न होतीति? आमन्ता. हञ्चि सह उपपत्तिया सकदागामी न होति, नो च वत रे वत्तब्बे – ‘‘सह उपपत्तिया अरहा’’ति.

सह उपपत्तिया अनागामी न होतीति? आमन्ता. हञ्चि सह उपपत्तिया अनागामी न होति, नो च वत रे वत्तब्बे – ‘‘सह उपपत्तिया अरहा’’ति.

३८९. सह उपपत्तिया अरहाति? आमन्ता. सारिपुत्तो थेरो सह उपपत्तिया अरहाति? न हेवं वत्तब्बे. महामोग्गल्लानो थेरो …पे… महाकस्सपो थेरो…पे… महाकच्चानो थेरो…पे… महाकोट्ठिको थेरो…पे… महापन्थको थेरो सह उपपत्तिया अरहाति? न हेवं वत्तब्बे…पे….

सारिपुत्तो थेरो न सह उपपत्तिया अरहाति? आमन्ता. हञ्चि सारिपुत्तो थेरो न सह उपपत्तिया अरहा, नो च वत रे वत्तब्बे – ‘‘सह उपपत्तिया अरहा’’ति.

महामोग्गल्लानो थेरो…पे… महाकस्सपो थेरो…पे… महाकच्चानो थेरो…पे… महाकोट्ठिको थेरो…पे… महापन्थको थेरो न सह उपपत्तिया अरहाति? आमन्ता. हञ्चि महापन्थको थेरो न सह उपपत्तिया अरहा, नो च वत रे वत्तब्बे – ‘‘सह उपपत्तिया अरहा’’ति.

३९०. सह उपपत्तिया अरहाति? आमन्ता. उपपत्तेसियेन चित्तेन अरहत्तं सच्छिकरोति लोकियेन सासवेन…पे… संकिलेसियेनाति? न हेवं वत्तब्बे…पे….

सह उपपत्तिया अरहाति? आमन्ता. उपपत्तेसियं चित्तं निय्यानिकं खयगामी बोधगामी अपचयगामी अनासवं…पे… असंकिलेसियन्ति? न हेवं वत्तब्बे…पे….

ननु उपपत्तेसियं चित्तं अनिय्यानिकं न खयगामि न बोधगामि न अपचयगामि सासवं…पे… संकिलेसियन्ति? आमन्ता. हञ्चि उपपत्तेसियं चित्तं अनिय्यानिकं न खयगामि न बोधगामि न अपचयगामि सासवं…पे… संकिलेसियं, नो च वत रे वत्तब्बे – ‘‘सह उपपत्तिया अरहा’’ति.

सह उपपत्तिया अरहाति? आमन्ता. उपपत्तेसियेन चित्तेन रागं पजहति, दोसं पजहति, मोहं पजहति, अनोत्तप्पं पजहतीति? न हेवं वत्तब्बे…पे….

सह उपपत्तिया अरहाति? आमन्ता. उपपत्तेसियं चित्तं मग्गो… सतिपट्ठानं…पे… सम्मप्पधानं… इद्धिपादो… इन्द्रियं… बलं… बोज्झङ्गोति? न हेवं वत्तब्बे…पे….

सह उपपत्तिया अरहाति? आमन्ता. उपपत्तेसियेन चित्तेन दुक्खं परिजानाति, समुदयं पजहति, निरोधं सच्छिकरोति, मग्गं भावेतीति? न हेवं वत्तब्बे …पे… सह उपपत्तिया अरहाति? आमन्ता. चुतिचित्तं मग्गचित्तं उपपत्तेसियं चित्तं फलचित्तन्ति? न हेवं वत्तब्बे…पे….

उपपत्तिकथा निट्ठिता.