४. चतुत्थवग्गो

(४२) १०. सब्बसंयोजनप्पहानकथा

४१३. सब्बसंयोजनानं पहानं अरहत्तन्ति? आमन्ता. अरहत्तमग्गेन सब्बे संयोजना पहीयन्तीति? न हेवं वत्तब्बे…पे….

अरहत्तमग्गेन सब्बे संयोजना पहीयन्तीति? आमन्ता. अरहत्तमग्गेन सक्कायदिट्ठिं विचिकिच्छं सीलब्बतपरामासं पजहतीति? न हेवं वत्तब्बे…पे….

अरहत्तमग्गेन सक्कायदिट्ठिं विचिकिच्छं सीलब्बतपरामासं पजहतीति? आमन्ता. ननु तिण्णं संयोजनानं पहानं सोतापत्तिफलं वुत्तं भगवताति? आमन्ता. हञ्चि तिण्णं संयोजनानं पहानं सोतापत्तिफलं वुत्तं भगवता, नो च वत रे वत्तब्बे – ‘‘अरहत्तमग्गेन सब्बे संयोजना पहीयन्ती’’ति.

४१४. अरहत्तमग्गेन सब्बे संयोजना पहीयन्तीति? आमन्ता. अरहत्तमग्गेन ओळारिकं कामरागं ओळारिकं ब्यापादं पजहतीति? न हेवं वत्तब्बे…पे….

४१५. अरहत्तमग्गेन ओळारिकं कामरागं ओळारिकं ब्यापादं पजहतीति? आमन्ता. ननु कामरागब्यापादानं तनुभावं सकदागामिफलं वुत्तं भगवताति? आमन्ता. हञ्चि कामरागब्यापादानं तनुभावं सकदागामिफलं वुत्तं भगवता, नो च वत रे वत्तब्बे – ‘‘अरहत्तमग्गेन सब्बे संयोजना पहीयन्ती’’ति.

अरहत्तमग्गेन सब्बे संयोजना पहीयन्तीति? आमन्ता. अरहत्तमग्गेन अणुसहगतं कामरागं अणुसहगतं ब्यापादं पजहतीति? न हेवं वत्तब्बे…पे….

४१६. अरहत्तमग्गेन अणुसहगतं कामरागं अणुसहगतं ब्यापादं पजहतीति? आमन्ता. ननु कामरागब्यापादानं अनवसेसप्पहानं अनागामिफलं वुत्तं भगवताति? आमन्ता. हञ्चि कामरागब्यापादानं अनवसेसप्पहानं अनागामिफलं वुत्तं भगवता, नो च वत रे वत्तब्बे – ‘‘अरहत्तमग्गेन सब्बे संयोजना पहीयन्ती’’ति.

अरहत्तमग्गेन सब्बे संयोजना पहीयन्तीति? आमन्ता. ननु रूपरागअरूपरागमानउद्धच्चअविज्जाय अनवसेसप्पहानं अरहत्तं वुत्तं भगवताति? आमन्ता. हञ्चि रूपरागअरूपरागमानउद्धच्चअविज्जाय अनवसेसप्पहानं अरहत्तं वुत्तं भगवता, नो च वत रे वत्तब्बे – ‘‘अरहत्तमग्गेन सब्बे संयोजना पहीयन्ती’’ति.

४१७. न वत्तब्बं – ‘‘सब्बसंयोजनानं पहानं अरहत्त’’न्ति? आमन्ता. ननु अरहतो सब्बे संयोजना पहीनाति? आमन्ता. हञ्चि अरहतो सब्बे संयोजना पहीना, तेन वत रे वत्तब्बे – ‘‘सब्बसंयोजनानं पहानं अरहत्त’’न्ति.

सब्बसंयोजनप्पहानकथा निट्ठिता.

चतुत्थवग्गो.

तस्सुद्दानं –

गिहिस्स अरहा, सह उपपत्तिया अरहा, अरहतो सब्बे धम्मा अनासवा, अरहा चतूहि फलेहि समन्नागतो, एवमेवं छहि उपेक्खाहि, बोधिया बुद्धो, सलक्खणसमन्नागतो, बोधिसत्तो ओक्कन्तनियामो चरितब्रह्मचरियो, पटिपन्नको फलेन समन्नागतो, सब्बसंयोजनानं पहानं अरहत्तन्ति.